《大明燈》名從何來？

From Today's am730...

原本，孫柏文喺周一想同大家解釋，點解我呢個新專欄叫《大明燈》。點知因特首特登為小弟造勢，知道本欄名之後，搞咗個「燈泡事件」，我唔可以唔呼籲「辭職吧，邱騰華！」作為答謝。

大家可能喺其他刊物或電視機睇、聽過我嘅分析同睇法，可能已知我向來寫作嘅風格。

如果未，你又可能聽過朋友講話我只懂譁眾取寵博收視。若你真係有咁嘅朋友，佢真係一個值得珍惜嘅朋友！因敢言，又明察秋毫！

其實，我揀《大明燈》呢個名，係因為一早已有大批網友咁叫我。如果你上去各大網上討論區，你就會見到好多「孫柏文正一係明燈！」之類嘅留言。我見咁多網友欣賞我以分析照亮天下，所以希望呢個精神，成為本欄嘅核心價值。

仲有，因我喺花旗國讀大學，唔多唔少都受到花旗國人影響。所以就一係唔做，要做明燈就要做大明燈，watt數有咁大得咁大。

呢幾日，好多時我行行吓街，都有人截住我問我點睇干德道有層新樓6,000呎賣4億元單嘢，7萬幾元一呎。

首先，根據可靠消息，呢個都仲未係至高價，之後仲會有個單位，會以10萬元一呎成交，問你怕未？知價，患有分析員職業病嘅我，就會開始計數。當你用4億元買樣嘢，假設嗰件東西為你帶來3厘嘅回報，每年就會帶來1,200萬元嘅收入。如果嗰件物件係層樓，咁即係每個月租100萬元。

6,000呎，月租100萬元，你話得唔得？幾日前做電視節目，我問《am730》主席施永青呢個問題，佢話呢啲單位頂多得1厘。如果係咁，租金若冇升跌，不過租金回報率由1厘升到3厘，即係樓價要跌七成。同97年至03年跌幅差不多。

咁嘅豪宅價，就吸引咗一班被保護行業嘅從業員，例如律師、醫生等出來鬧，話買唔到樓。民主黨李永達又好似佢喺96年咁，一齊要求政府做啲嘢，想「八萬五」復活。所以，我今日為佢哋同大家分享朋友Kreme嘅睇法。

「嫌遠
嫌細
嫌唔就腳
嫌間格唔好
嫌風水唔好
嫌鄰居影衰自己
嫌嗰區唔夠高尚

當以上條件都解決晒

就會嫌貴

當八萬五、IT爆波、金融風暴/海嘯/地震
五折
又會唔夠膽入市

結論係呢種人一世都唔會買樓」

你係咪呢種人？