Monday, December 31, 2007

07金手指頒獎禮

每到年尾,各大傳媒機構就會搞好多乜乜物物頒獎禮。我老竇成日話,一眾只會睇娛樂版嘅特區少女,對經濟事務經常一竅不通,孫柏文絕對唔同意,因為只要比吓今時今日同廿幾年嘅唱歌頒獎禮,就會感受到濫發任何嘢,都會令嗰樣嘢大幅貶值。

有見及此,我今日呢個07年《金手指》頒獎禮會貴精不貴多。甚至不能保證,來年會否繼續頒同一樣嘅獎。點樣都好,頒獎典禮正式開始。

1) 07拿破崙殺入莫斯科大獎

得主:明光社。比喻為Anti-Christ嘅拿破崙,當年係歐洲大陸嘅長勝將軍。因此個心雄咗,舉兵幾十萬,諗住攻陷俄羅斯。點知殺入莫斯科之後,氣候逆轉,冇諗住輸嘅拿破崙,就係咁差點兒全軍覆沒。

本來,特區有好多四、五十歲嘅長輩,因為日日都對住啲「少女索K被迷姦」嘅報道,所以好支持明光社淨化特區。

點知明光社好打唔打,走去打《秋天的童話》。一齣今日長輩,後生時初戀拍拖睇嘅戲。作為一個落rave大嘅人,我想問啲四、五十歲嘅人,係咪針唔拮到肉唔知痛呢?點都好,希望出年可以頒個「拿破崙遇滑鐵盧大獎」畀明光社。

亞軍:特區散戶。原先只係搵啲有「戀中癖」嘅鬼佬笨,點知8月一話有「資金自由行」,個個即時殺氣冲天。溫總:「氣候已逆轉。」小心、小心。

2) 07賣得靚大獎

得主:滙豐(005)。滙豐能夠以天價賣出倫敦總部,仲要穩袋埋啲錢,實在難得。不過滙豐如果真係睇到一次千載難逢嘅大泡沫,咁又點解係咁中招?

亞軍:黑石Blackstone。黑石上市時,孫柏文都警告過。叻人賣嘢畀你已經要小心,更何況「至叻人」。上市之後,黑石一路潛水。當時拗應唔應該買黑石,有人話:「祖國政府都買啦。」我答:「Exactly。」

3) 07過唔到probation大獎

得主:劉鳴煒。劉鑾雄個仔,26歲,3月初做金匡企業 (286)主席。之後消息滿天飛,金匡股價一個月內升十幾倍。不過,劉鳴煒做主席三個月就炒老闆魷魚。之後消息再滿天飛,有啲仲矛頭直指劉鑾雄。我只可以話,真相就係今時今日啲後生仔嘅EQ真係差啲。成日做嘢都過唔到probation。

邊個幫誠哥起新屋

噚日,孫柏文一路睇電視新聞台一路睇《蘋果日報》。我知我知,一心二用真係唔係幾好。不過噚日,我喺電視就仲估睇到長實(001)主席李嘉誠,北上訪京。見到長長嘅紅地氈,第一個反應係:「嘩!香港嘅首富都仲有江湖地位,訪京時,國家最高領導人居然會以最高規格款待。都唔好話我哋香港人冇料到。」

點知,睇真啲。領導人款待嘅,唔係李嘉誠,而係日本首相福田康夫。佢兩位老人家,真係有少少似樣。唔怪之得,我有個auntie話佢哋兩兄弟咁款。

睇完電視報道,睇番我報。噚日,原來係李嘉誠做頭條新聞,話佢搬屋。據聞,李嘉誠嘅新居,係啱啱改裝新建。不過我就想知邊個幫佢起新居。

點解我會咁問?多就唔講,因為我始終對地產唔熟。不過呢幾年嚟,喺股票行好或係其他工作單位,我都有同事每次接到地產經紀cold call時,都會話:「長實起嘅新樓冇興趣。都話冇興趣囉!」點解佢哋會咁?

佢老人家好頭痕

講真,我就想知邊個幫李嘉誠起新居嘅原因,係因為睇我報報道話李嘉誠要搬,理由係喺深水灣住開間屋,因為漏水所以要重建…冇錯,李嘉誠層樓都漏水。所以一旦新屋質素唔好,佢老人家就會好頭痕。

Thursday, December 27, 2007

總結07年的金句

"When the music stops, in terms of liquidity, things will be complicated. But as long as the music is playing, you've got to get up and dance. We're still dancing"


「喺信貸融資議題上,音樂停播時,就真係會難搞。不過,啲音樂一日繼續播,你就要起身跳舞。而我哋仲跳緊。」07年7月10日,當時仲係花旗集團總裁嘅Chuck Prince講嘅。

一句說話就能夠解釋,點解雖然好多聰明人都知,對上幾年嘅超寬鬆、過易信貸環境,係絕對唔健康都好,都要繼續參與。所以孫柏文就揀咗以上一句,去總結07年嘅風風雨雨。

終極dumb money

上周《金融時報》撰稿員Guerrera話:「大家應該可憐股神畢菲特。因為以前信貸危機中,畢菲特往往都係有大把現金,走出嚟執平貨嘅人。不過今時今日,就有來自中東、中國、新加坡等國投公司,出嚟爭。仲有,畢菲特好強調要有良好企業管治,所以,想搵人注資嘅,都鍾意唔干涉內政嘅國投。」

基本上 Guerrera儍嘅。

畢菲特好似爭唔到入資機會,唔係因為爭唔到,而係未發功。孫柏文覺得,啲國投係世界終極「儍錢dumb money」。

多都唔使講,淨係睇吓新加坡就知問題所在。如果淡馬錫輸大錢,個皇親國戚話事人使唔使落台先?咪就係囉。仲有,呢場金融風暴嘅結尾,畢菲特嗰種「粗暴干涉企業內政」嘅聲譽,會令佢大受歡迎。啲公司管理層,分分鐘會提供大幅折扣畀佢,希望借佢聲譽翻身。佢應向《金融時報》講句:「不要為我流淚。Don't cry for me FT。」

After my piece came out... someone agrees hahahah

Wednesday, December 26, 2007

投行08搞笑預測

又到年尾,各大投資銀行又要指定動作咁,出嚟做吓明年預測。今日,孫柏文想同大家分享我對其中幾個預測嘅睇法。

不過講明年預測之前,想重溫吓我舊年年尾提過嘅投資銀行預測。當時,有本花旗國財經雜誌,問咗十幾間投資銀行對07年股市嘅睇法。佢哋竟然一致看好,冇人睇跌。對上幾年都冇出現過一致睇好睇淡。

不過最令人擔心係,對上一次啲投資銀行一致睇好來年走勢,係01年股市。如果大家仲記得,當年花旗國股市跌到喊。所以舊年年尾,淨係呢個「一致」預測,都令我睇淡花旗國股市。

當然,至上個禮拜五,以我覺得最能反映花旗國股市嘅標普500 指數計,今年花旗國股市,就算爆發金融危機,都仲係有少少升,升66點。有機會打破「一致睇好就會跌」嘅厄運,除非保爾森又蝦碌。

講08年預測。首先一定要講Saxo Bank嘅「至離譜預測Outrageous Predictions」。Saxo啲預測「至離譜Outrageous」,唔係我話嘅,係佢哋咁叫自己。例如,Saxo第一個預測,就係話一個叫做 Ron Paul嘅人,將會08年成為花旗國總統。

解散聯儲局

呢個Ron Paul,我喺9月28日都寫過。如果喺打「紙幣狂魔」嘅戰爭中,孫柏文係「白銀戰隊隊長」,Ron Paul就係「黃金軍團大統帥」。佢不單只話美元要同黃金掛鈎,去打擊通脹,仲以策安全咁話,要解散聯儲局制度。

07年嘅呢一刻,呢個預測仲係好離譜。不過,舊年年尾,如果話你知07年國際大銀行間間有事,係咪一樣咁離譜呢?分分鐘畀你鬧係「黑氣石」o忝。

再講,高盛Goldman Sachs大家姐Abby Joseph Cohen,就算花旗國樓市續跌,都話08年花旗國經濟應該避得開衰退。我一聽到,即刻睇吓大姐佢有冇用「outrageous」嚟形容自己個預測。點知係冇。真係outrageous。

如果大家有聽我嘅建議,睇過《Black Swan黑天鵝》一書。亦同意書中,呢個「宏觀嘢冇得預測」嘅結論,都應該知道心中點處理呢啲預測。

Tuesday, December 25, 2007

One Billion Gold... My Dr Evil moment.



For all you warbookers.

This feels good.

My warbook motto, "I can't create land, but I sure know how to print money!"

Saturday, December 22, 2007

聖誕索K經濟學




噚日,孫柏文同《利字當頭》嘅利世民、《蘋果批》嘅高明輝、《案內人隨筆》嘅尹思哲共晉晚餐。因為呢排我哋收到好多就快到期,某花旗國連鎖式快餐店嘅「末日現金券」,所以就集體叫雞。

食雞就當然要鋪報紙,所以我哋攞咗前日嘅《蘋果日報》。食食吓,我就發現一篇題為《每逢節日毒品減價三成》嘅報道。

一睇到,我真係覺得奇,第一個反應係聖誕應該會推高需求。就算可能因供應增加,毒品價格不變,亦唔會平咗。我就算有塊雞皮喺口,都話:「嘩!毒販都搞Christmas sale!」

利世民聽到,就話:「聖誕可能因多咗新客,所以marginal utility(邊際效用)下跌,令價格受壓。」冇錯,孫柏文同大家喺呢刻嘅反應一樣,冇咁嘅智慧去明白利世民嘅解釋方法。

高明輝就話:「買毒品嘅人,相信絕大部份都係後生男仔。一邊廂可能做緊冇雙糧嘅散工,另一邊廂面對住會『屈禮物』嘅港女。所以啲人喺聖誕出糧,可能因為其他使費上升,出現substitution effect(替代效應),減少需求令價格下跌。」

尹思哲諗一諗答:「可能毒販知道喺game theory(博弈論)之下,毒品買賣係個multi round game(非一次性嘅來往)。如果可以令人上癮,聖誕呢啲多人會試毒品嘅日子,就係建立新cash cow(穩定收入來源)嘅好機會。減價,亦係好自然嘅事。」

價格跳升因減低風險

正當佢哋議論紛紛之際,我就睇埋該篇報道。原來,報道中嘅後生仔可以喺聖誕七折買毒,係因為好多朋友會一齊夾錢,叫一個人去買。睇到呢度,我就明點解。

以前喺大學讀「犯罪經濟學」時,教授曾經話過:「毒品由原產地,經偷運者、拆家,到零售,每一步嘅價格都會跳升。跳升原因就係每一步都有增值。增值嘅方法就係成功繞過警察、軍隊、海關等攔截。」亦即係減低被攔截嘅機會,毒販嘅成本就會相應下降。

一個客買10g嘅 K仔,或買100g,對毒販被攔截嘅機會,就係相若。正當被差佬拉嘅「成本」係固定成本,因為個客買多咗,所以分攤出嚟,每1g嘅平均成本就會跌。買得多,有七折?可能已經減得少。

真係想出本叫《SocKonomics》嘅書,寫索 K經濟學。

Friday, December 21, 2007

Colbert

For those of you with Jon Stewart and Jon Colbert withdrawal symptom...

Here's some methadone...

Thursday, December 20, 2007

祖國 = 911消防員

噚日,孫柏文全力推介《Black Swan黑天鵝》呢本書,亦分享過書裏面其中一個非常重要嘅概念。就係一定要將可預測嘅「risk風險」,同冇得預測嘅「uncertainty不明朗因素」分開對待。

我亦用咗「辦賭場」嘅例子,去解釋以上兩個概念嘅分別。對賭場嚟講,可預測嘅「風險」,就係賭枱上輸好多錢畀一個客;而冇得預測嘅「不明朗因素」,就係個賭場裝修時有個工人受傷。工人告賭場,而賭場贏咗。個工人唔服,買炸藥諗住同賭場「一鑊熟」。當「不明朗因素」爆發影響非常大嘅事件,就可以稱為「黑天鵝」。

今日,我想講啲國際銀行,都係面對好多咁樣嘅「黑天鵝」。

噚日,我有機會喺有線電視節目Money Cafe,研究吓啲國際銀行面對「黑天鵝」嘅後果。我有機會聽到胡孟青比喻,經過思考,今日想同大家分享我嘅感受。

青姐引述佢以前老細嘅說話,話次按係911。我諗我係嗰個第一架飛機未撞北塔之前,叫大家逃離現場嘅人。青姐繼續話,當日有好多人喺南塔裏面,覺得唔關佢哋事,所以繼續工作。我諗好多特區投資者,屬於呢類人。

青姐又話,當日亦有喺南塔裏面知道危險嘅人,即時走去七十幾樓嘅「防火層」避難。點知,第二部飛機撞南塔時,就係撞咗落七十幾樓度,喺「防火層」嘅人無一倖免。知危險,做埋避難嘅動作,都係要死。我諗呢啲就係以上買咗「次按債券爆煲保險」嘅國際銀行,因為保險公司執笠,就算做咗避難嘅動作,都係要死。

而我,就沮喪

聽完青姐嘅比喻,再思考之後,亦得知我哋偉大祖國,繼入股「賊船」巴克萊同黑石,再入股Morgan Stanley。祖國政府就係911當日,衝入大廈嘅消防員。

而我,就沮喪。因為我係嗰個知要即走,仲要知越走越遠越好,所以走咗上部「白銀」巴士。點知,幢樓開始冧,部巴士都唔開,唔通我上錯逃生車?




祖國 = 911消防員

Wednesday, December 19, 2007

分清風險與不明朗

差唔多到年尾,相信大家同孫柏文一樣,陸陸續續睇到啲總結07年嘅文章。又適逢噚日喺澳門又有新賭場開幕,今日我想推介一本今年我覺得最有啓發性嘅書。一定要睇。

呢本書,就係上排我去有線電視做Money Cafe成日講嘅《Black Swan黑天鵝》。呢本書簡直就係「Kinder出奇蛋」,睇完有嘢諗、有嘢炒、同有嘢講,聖誕節落吧肯定冇悶場。

點解有新賭場開幕,會令我想重提《Black Swan》?係因為作者Nassim Taleb令我好認真咁將「risk風險」同「uncertainty不明朗因素」分開對待。

佢話,有次出席「如何避開未來大鑊嘢」研討會。出席嘅,由股市炒家到國防軍部都有。主辦單位可能覺得自己有小聰明,所以喺賭場酒店會議廳舉行。到個作者發言時,佢就即時責罵主辦單位。話佢哋根本唔明「風險」同「不明朗因素」嘅分別。亦即時攞「賭場」呢行分析。

佢話,基本上,「辦賭」係當今世上透明度最高嘅行業。例如,一個大有錢佬同一個有上市嘅賭場「肉搏」,跟住贏咗個賭場好多錢,令個賭場要發出盈警。呢個「風險」完全有得計。賭場管理層應該擔心,同準備自己嘅大鑊嘢,唔係呢啲完全有得計嘅「風險」。

國際銀行爆大鑊

大家可能會問:「咁乜嘢先至係要擔心嘅大鑊嘢?」佢話,花旗國有個賭場,裝修時有個工人受傷。工人告賭場,點知賭場贏咗。工人心生不忿,買咗好多炸藥,跟住走去賭場大樓地底停車場,諗住同賭場「一鑊熟」。好彩工作人員發現,先至冇事。呢個就係賭場管理層要擔心嘅「大鑊嘢」。

講咁多為乜?除咗想推介呢本書,大家睇到以上賭場嘅例子,可能會話:「買保險就得啦!」不過,有冇諗過,你係呢個賭場,個工人又成功引爆,你真係買咗保險,不過間保險公司執笠,冇得賠。係咪好恐怖?聽日,我會話你知,點解今時今日啲國際銀行,就係面對咁樣嘅情況。

Tuesday, December 18, 2007

蕭思江係無名腫毒?


No Name Swollen Toxin?

相信大家睇開《蘋果日報》,都知道上排立法會港島議席補選。商業觸覺非常敏銳嘅《蘋果日報》管理層,知道大家對嗰次補選非常有興趣,所以喺補選投票日搞搞新意思,喺日報以外嘅傳媒空間,提供最新資訊。

除咗投票日下午出特刊,仲喺 election.atnext.com 搞咗個直播網站,邀請好多同補選有關嘅人,同大家分享感受。同補選有關嘅,當然一定有當日嘅候選人。

點知,補選結束後,孫柏文睇友報《大公報》,先知有個當日喺我哋網站有份發言嘅候選人,唔開心。聽聞係因網站上嘅言論,所以發律師信嚟。根據《大公報》,呢位候選人就係蕭思江。蕭思江喺《大公報》表示,佢最唔開心係被形容為「無名腫毒」。

大家都知,特區法律界充斥港英餘孽,所以書信來往都會用英文。我喺度諗,究竟點樣繙譯「無名腫毒」呢四個字?諗咗好耐,都諗唔到。

港女,請睇片

最後,我都係要問人。根據我嘅法律顧問,原來「無名腫毒」嘅正確繙譯應該係 No Name Swollen Toxin。真係唔講都唔知。希望大家同我一樣,知道正確繙譯之後,有如前特首董建華話齋,增咗值。

講起嗰次補選,真係雲集唔少唔同背景嘅候選人,各有所長。喺跳舞呢個範疇,相信冇候選人比候選人何來更專業。可能因為呢個原因,所以投票當日,何來做直播網站嘉賓時,主持人就把握機會問:「究竟蕭思江嗰隻『飯碗必勝舞』,係咪舞呢?」何來就斬釘截鐵咁答:「唔係。」真係估唔到專業舞蹈家,同我嘅見解唔同。

最後,噚日我話港女喺舞池上跳舞,雙手同手臂好似啲遇溺嘅人咁,隨機瘋狂擺動。篇文出街後,有好多港女寄電郵嚟問:「跳舞手臂『瘋狂擺動』,唔靚咩?」今日,唔直接答你,用例子答你。自己睇片。


Monday, December 17, 2007

靚女銀行家跳舞



呢幾日,孫柏文深思熟慮,反覆又反覆咁諗一個纏繞我好耐嘅問題。由大學啱啱畢業回流特區嘅時代,到我去股票行做分析員,直至今時今日喺《蘋果日報》寫《金手指》,呢個問題其實已纏繞咗我十年有多。

個問題就係,點解啲港女喺舞池上跳舞嘅時候,雙手同手臂都要學似啲喺海灘或泳池,遇溺嘅人咁,非常隨機同瘋狂地擺動。特區嘅金融業係咪發達?係。係咪吸引咗好多靚女做嗰行?係。不過呢啲投資銀行中嘅靚女,只要踏上舞池,就會令好多「搞乜呀?佢哋喺度做緊乜呀?唔好同我講佢哋喺度跳舞呀?」嘅問題爆發出嚟。

我喺花旗國讀書時,見到啲黑、白、拉丁女同學跳舞,佢哋都會盡量凸顯佢哋嘅身軀。根據我啲讀人類學嘅同學話,人類自古至今,跳舞係用嚟凸顯自己嘅繁殖能力,嚟吸引異性。即係好多時,跳舞盡量希望可令男性覺得佢哋「有前有後」。不過,港女就唔同。

金融女將請參考

可能佢哋一路以嚟嘅歷史任務,就係要推翻呢啲本能性嘅大自然規律。要證明人定勝天,手臂隨機地瘋狂擺動,都可以凸顯繁殖力,吸引異性。

其實,大家睇吓我哋啲「偶像派」女歌手,個個着衫着到好似未發育咁。雖然已經廿幾歲,不過仲要扮係初中生。着埋啲黑白間條「漢堡神偷」嘅服飾。可能就係佢哋,令港女覺得手臂隨機瘋狂擺動「好靚」。

孫柏文今日同大家分享呢個見解,係因為我感覺到喺呢個最黑暗嘅一刻,可能有一線曙光。原來特區有個三女唱歌組合叫做 Freeze。雖然都整過容,有如外國女明星話齋,有部大貨車迎頭相撞,心口未必有知覺。

不過,喺佢哋最新嘅MTV音樂影片「金睛火眼」,就可以見到佢哋有心放棄嗰種手臂隨機擺動嘅跳舞方法。希望所有金融業女從業員,喺你哋下次跳舞之前,睇睇以下短片,先至再跳。唔係叫你學,只係希望你會參考吓。


Saturday, December 15, 2007

This US Presidential Election needs you.


For you Americans.

For those who can donate.

And inject the debate of how the Federal Reserve should be into the US Presidential Election.

Give to Ron Paul.

Our currency, the Hong Kong Dollar, is pegged to the US Dollar. The only way we have a chance to lower our inflation rate, is to have the US monetary policy changed.

This is the only thing a person from Hong Kong can do.

Friday, December 14, 2007

繁體版《貨幣戰爭》

And I am looking for the 繁體字 version of 貨幣戰爭.

Does anyone one of you know where I can buy one?


Cheers all!

任總,邊間銀行賴嘢?




《金手指》一欄其中一個功能,就係為大家問啲大家好想問,不過因為你哋有修養,所以唔問嘅問題。今日,又係時候孫柏文擔起呢個社會責任。

我想問:「老老實實。任總,究竟邊間銀行賴咗嘢?」相信有如早前我為大家問財政司司長曾俊華,點解要入股港交所(388)一樣,任總應該音信全無。

令我非常不安

如果你唔知點解我要問金管局總裁任志剛以上嘅問題,咁我就要搵番嗰塊封晒塵嘅「笑聲拍板」出嚟,大大力拍吓你個頭。

因為任總佢老人家,噚日喺大家食晏時,走嚟同啲記者講話:「大家要有心理準備,有間「本地」銀行因為次按賴咗嘢。」孫柏文睇到嗰段話時,就係食緊飯盒。

任總叫我有心理準備,我只可以話,嗰啲喺我部電視機上嘅飯粒,已經證明我冇呢種心理質素。

任總嘅一句說話,令我非常不安。一向以來,我仲估啲喺公仔紙幣世界裏面做央行行長嘅人,首要條件就係要喺乜嘢情況之下,都唔可以令人對銀行體制不安。唔可以製造uncertainty。唔通,就快要放棄同美元掛鈎,行番1935年之前嘅銀本位silver standard?

使唔使咁絕啊


任總唔講邊間賴咗嘢、唔講間嘢因次按輸咗幾多,淨係要我哋有心理準備。頭先已講過,心理準備我就冇。不過,任總引發市民嘅「準備」,輕則就係股民合埋眼,見「本地」銀行股就沽。嚴重就令我,如果收到匿名sms,分分鐘走去我幫襯嘅銀行,即時擠提。仲因為唔怕一萬最怕萬一,將sms立刻傳寄畀所有我識嘅人。

任總,你就算要迫啲銀行表態,都唔使咁絕啊?真係好不安呀!

Thursday, December 13, 2007

美國熊市正式揭幕

噚日凌晨時分,花旗國聯儲局開會減息0.25%。「減息?好!」一向以嚟都係填鴨式(投資)教育嘅標準答案。不過噚日凌晨,一宣佈減幅,花旗國股市即刻跌你三百幾點。孫柏文覺得,個股市有如唔夠糖食嘅小朋友,喺度扭計。

唔夠糖食扭計

當然,大家可能覺得,噚日凌晨金融系統嘅「反應」,唔係個扭計小朋友,而係唔夠藥嘅癌病人,喺度嘔血。點都好,現實係聯儲局「發功」時,個市居然跌。聯儲局除咗加大力度,已冇板斧。

即係話,除非基本經濟改善,否則股市唔會升,因為從噚日開始,聯儲局為股市提供嘅影響,只會係「負面」。亦即噚日凌晨,花旗國熊市正式揭幕。

去當舖醜怪?搵私貸!

噚晚,5間央行宣佈新嘅「推錢入銀行體制」救市計劃。原因係啲銀行寧願借唔到錢,都唔想去啲央行嘅「緊急借錢處」discount window借錢。理由係如果俾人哋知間銀行要去「緊急借錢處」借錢,就會令人覺得間銀行唔掂。

即係有如孫柏文走去當舖,俾老竇見到,佢一定問我:「呢排係咪輸咗好多?」所以今時今日,我要做個人融資活動時,會望落「好正常」咁,去啲銀行做「私人貸款」。

睇落冇咁尷尬

基本上,做嘅嘢一樣,不過睇落冇咁尷尬。噚晚5間央行宣佈嘅新計劃,就係知啲銀行懶要面,唔肯去央行嘅當舖。所以就推出咗呢個叫做term auction facility嘅「私人貸款」。啲銀行會唔會借?咁我就要問問你,你覺得借「私人貸款」O唔OK?

Wednesday, December 12, 2007

滙豐取消派息?

今朝凌晨,花旗國聯儲局議息。孫柏文落筆一刻,唔知減幾多息。大家都知道,聯儲局減息,係因樓市泡沫爆破,掀起一場又一場信貸風暴,直接影響到金融系統嘅穩健。呢幾日,繼續有信貸風暴帶來嘅新聞值得一提。

前日,瑞銀UBS宣佈,佢哋又要為花旗國次按撥備百億美元。可能因為早前UBS已經做過撥備,而當時又俾人感覺已經做咗「最壞打算」,今次再撥,管理層一定知道股東對佢哋嘅信心完全崩潰,甚至對銀行穩健非常懷疑,所以今次宣佈撥備嘅同時,亦宣佈有新投資者、包括新加坡政府投資公司入股。

UBS取消派息

孫柏文睇過一段新加坡高官訪問,講到金融業定位,佢話,想見到新加坡變成東南亞嘅瑞士。即係附近啲有錢佬擺錢喺度,就算周邊七國咁亂,啲錢都會安全。即係想做A貨瑞士。不過,今次新加坡唔使再做A貨瑞士,因為買起真嘅瑞士都可以。

新加坡政府動用國民嘅血汗錢,入股UBS,我只可以話,佢哋冇吸收我哋祖國嘅教訓。

幾個月前,祖國入股黑石同巴克萊銀行,原來上咗賊船。新加坡政府第日嘅遭遇都會一樣。不過,UBS再撥備嘅公佈中,最值得大家留意嘅係,佢哋決定取消現金派息。奉勸所有同我包拗頸嘅滙豐(005)股東,你哋最鍾意話滙豐派息高,所以買。你哋要記得,派息唔係必然嘅。

最後,我想讚啲喺世界各地主流傳媒(Mainstream Media,MSM)嘅同行。因為,以前每次啲政府或金融機構出嚟「做啲嘢」時,主流傳媒都係會話:「睇吓,做嘢啦!一切問題已受控!」

主流傳媒有料到

遇上《金手指》再次話:「冇料到,繼續死。」就會有一百幾十個網友,發電郵嚟話:「明燈,睇吓啲主流傳媒專家點講先啦。你都唔識,淨係出嚟嘩眾取寵呃飯食。」不過,今次就唔同,主流傳媒「專家」居然比我早好多話,救市計劃冇料到。雖然,我唔係話主流傳媒已變成孫柏文。不過,主流傳媒真係感染咗我啲「明燈」邏輯。

有如幾年前好流行嘅花旗國rapper Eminem曾經問過,will the real 明燈 please stand up?

財經台講伊朗 勁搞笑

噚日晏晝,孫柏文有機會睇到某個收費電視財經台(唔係我有份做節目嗰個)。我睇嗰刻,佢哋啱啱播緊好似叫「商品乜乜騷」,講嘅係石油。佢哋請嚟某金融機構女發言人發表意見。我一睇就諗:「好嘢!講石油,又有女睇,開正我嗰瓣。」所以我就乖乖哋,睇吓有啲乜嘢講。睇完,我就決定寫今日呢篇文。

首先,講油價本身嘅升升跌跌,我唔係好記得佢講過啲乜。淨係記得好多乜乜「花旗國石油庫存量報告」、物物「石油生產國唔會增加產量」等等嘅評語。孫柏文唔記得嘅原因,就係因花旗國石油庫存係呢個石油大升浪當中,冇消失過。話到明大升浪,懶醒走去留意庫存量報告,只會令自己眼花撩亂,分分鐘做錯買賣。

增產?no way

至於嗰啲OPEC石油生產國,講增產減產,真係「超低能、勁搞笑」。

OPEC講「增產」?大家要知道,OPEC已經用緊100%嘅可生產量。OPEC講「增產」,都只不過係講緊「增加生產配額」。大家又要知道,除咗印尼同委內瑞拉之外,其他幾個石油生產國已經超晒配額。

大家可能會問:「個節目講啲嘢咁『行』,你又會去繼續睇?」因為好戲在後頭。節目主持人問:「點解現貨油價比一年後交收嘅油價平?」去到呢度,我仲估個女發言人會好「行」咁話,現貨價比一年後交收價平,係因為石油生產商如果可以即時交收,就可以慳番啲油庫租金。

陰謀論?OK

點知,個女發言人話:「現貨價比一年後交收價平,係因為喺一年後嘅世界,花旗國現任(好戰)總統已經卸任。而且因早排中情局(CIA)出咗份報告,話伊朗已經喺03年放棄核武,所以未來一年打仗機會好微。」

嘩!呢啲陰謀論,一向都係孫柏文嘅專利,估唔到會有人搶飯食。不過我就諗,中情局,係咪就係嗰個喺03年話伊拉克有核武嘅中情局?我知!我知!根據中情局推論,伊朗一定就係喺03年將所有核武研究,送咗畀薩達姆,只不過收得太埋,到今日都未搵到。

講真,如果真係想玩陰謀論,當年伊拉克被花旗國打,係因為佢哋拒收美元。動搖美元喺世界貨幣中心嘅形象。上個禮拜,伊朗宣佈拒收美元。不過,我唔信伊朗會被打。因為呢幾年嘅伊朗,講就天下無敵,做就有心無力。

Monday, December 10, 2007

救市越成功 市越死

上個禮拜五,花旗國政府宣佈,點救「還還吓利息會跳高按揭」Adjustable Rate Mortgage(ARM)嘅業主。

今日,孫柏文再插花旗國財長保爾森呢個計劃。大家要記得,ARM按揭,就好似啲「頭六個月免息或超低息,之後超高息信用卡貸款」咁,還還吓利息會跳高。

保爾森計劃,就係迫啲債主,將超低息期延長五年。不過,唔會一刀切,會有限制。主流傳媒引述專家話:「限制太多,受惠嘅人好少。」我絕對唔同意。

好多人受惠

上個禮拜我講過,啲限制係想甄別啲「真正有需要」嘅業主。不過,睇完啲條文,我可以話,會有好多業主「受惠」。

基本上,甄別方法就係倚靠「未來還款能力」同「按揭、樓值比率」嚟設定。點解啲「專家」話受惠嘅人會好少?

因為要受惠,「按揭、樓值比率」要超過97%。即係理論上做多過3%首期嘅業主冇得受惠。不過,啲「專家」忽略咗,「樓值」呢樣嘢,喺花旗國根本可以亂吹。如果唔係,今日都唔會有咁多問題按揭。所以「按揭、樓值比率」,唔會迫走好多人。

至於「未來還款能力」規限,要扮窮又會幾難?

鼓勵唔履約

保爾森話將做咗ARM按揭嘅人分為四大類:
1.利息跳上,還款冇問題嘅人。(唔想救,不過會成功扮窮扮第四類人)
2.利息就算唔跳上,都還唔到嘅人。(救都死)
3.利息跳上時,能夠轉按嘅人。(想轉按都難,被迫變成第四類人)
4.利息跳上前還款冇問題,利息跳上後就還唔到嘅人。(保爾森想救嘅第四類人)

咁多人「受惠」,咪有料到囉?錯。個計劃最終目的,係穩定樓價。如果冇料到,就等於啲債主可以繼續強制履行合約,收錢或收樓。當咁多債主被迫接受破壞合約嘅要求。邊度再會有新嘅債主同資金,畀花旗國人買樓?真係諷刺,保爾森呢個計劃越成功,樓市越死。


Friday, December 07, 2007

銀主盤隔籬爆大鑊

噚日,孫柏文應承過大家,再插花旗國財長保爾森呢幾日不斷吹風嘅計劃。聽聞,個計劃係希望可救啲做咗「還還吓利息會跳高按揭」adjustable rate mortgage(ARM)嘅業主。即係頭兩年利息超低,兩年之後利息會跳上嘅按揭。因06年係ARM熱潮高峯期,所以08年會係利息跳上高峯期。好多按揭嘅利息跳上,碰上樓市下跌,就會製造負資產斷供潮。好多單位會被債主充公。

董建華又嚟噏嘢


不過,花旗國政府又話唔想「一刀切」,救晒做過呢種按揭嘅業主。如果話要甄別邊個「得救」,邊個冇份,淨係咁都已令計劃冇辦法行得通。

正當我喺網上瀏覽,希望可以搵多啲「拯救負資產」計劃嘅內情。點知,原來花旗國總統會喺噚日我交稿限期之後,發表計劃內容。即係今日篇文未插得保爾森住。不過,噚日正當我諗寫乜好時,喺牆上嘅電視機,突然見到前特首董建華喺中大發言。一睇,百感交集。

以前,特區爆發負資產斷供潮時,亦有好多單位被債主充公,變成冇人住嘅銀主盤。當年,好多斷供被迫遷嘅人,就連搬屋嘅心情都冇。作為鄰舍,分分鐘隔籬個銀主單位嘅雪櫃不單止冇搬走,連雪櫃裏面嘅食物都冇清理。如果遇上個單位被斷電,就會有好多曱甴。

其實,呢種斷供潮爆發嘅「社區問題」,不單止喺人口密度高嘅特區出現。今年夏天,我曾經解釋過喺花旗國,有好多有泳池,不過冇人住嘅銀主盤,喺雨季時爆發蚊患。

保爾森用心良苦

原來,喺冬天一樣有問題。正當大雪紛飛時,好多省市有條例要求業主喺24小時之內將門前行人路嘅積雪鏟走。業主唔鏟走,政府幫你鏟。不過要收錢同罰款。今時今日實在有太多銀主盤,政府鏟都唔夠人。仲要因啲按揭已經被賣出、分、拆再賣出,政府要搵個話得事嘅銀主代表都好難。保爾森想阻止斷供潮發生,唔係淨係為咗啲銀行咁簡單。

Thursday, December 06, 2007

冇料到的保爾森

相信大家都知,次按問題一路爆緊煲。孫柏文講都講咗成年,真係有如百集長劇。咁基本上,次按或其衍生出來嘅信貸危機,就係一班人或機構借咗太多錢。借錢畀收入卑微嘅人,唔等於好危險,唔好借咁多就得。反轉頭,借錢畀薪高糧準嘅人,唔等於好安全,借太多一樣出事。

衰在兩年後跳息

喺呢個信貸風暴當中,最能代表胡亂借貸風氣,就肯定係一種叫做「還還吓利息會跳高嘅按揭」adjustable rate mortgage(ARM)。咁ARM按揭同其他次按一樣出事,所以花旗國財長保爾森,呢幾日嚟就不斷吹風話將會有計劃去救佢哋。孫柏文可以話,保爾森嘅計劃冇料到。

當然,要明點解計劃冇料到,就要知道ARM按揭係乜。

例如,有個人以零首期,做30萬美元按揭去買樓。頭兩年利息超低,兩年之後利息就會跳上。

07年前,花旗國樓市到達高峯時,就係有好多人憑呢啲ARM按揭買樓自住或投資。因為ARM按揭利息,普遍都會喺兩年之後跳上,而06年又係貸款狂熱嘅高峯期,所以08年亦將會係利息跳上嘅高峯期。

對於借款人嚟講,利息跳上嘅最大問題,就係兩年前以超低息借錢嘅人,其實已經覺得頭兩年嘅還款額非常吃力。仲話利息要跳上?肯定出現斷供潮。

咁對於放款人嚟講,斷供其實可以唔係問題。只要本身層樓繼續升值。斷供咪將層樓銀主拍賣,放款人分分鐘執多筆。現在保爾森要出手嘅原因,就係斷供潮遇上樓價跌。到時已經放款嘅人,就會面對嚴重虧損,如果係銀行甚至可能會執笠,危害銀行體制穩健。

先分類再揀嚟救

大家可能會問:「點救?」
首先,保爾森吹風話將做咗ARM按揭嘅人分為四大類:
1.利息跳上,還款冇問題嘅人。(即係毋須要救)
2.利息就算唔跳上,都還唔到嘅人。(即係毋須要救)
3.利息跳上時,能夠轉按嘅人。(即係毋須要救)
4.利息跳上前還款冇問題,利息跳上後就還唔到嘅人。(保爾森想救)

多都唔講,保爾森會點界定一個人為第四類呢?喺第一同第三類人當中,有幾難先可假扮第四類呢?

聽日,我就假設保爾森搵到真係第四類嘅人。再插保爾森個拯救計劃。

Wednesday, December 05, 2007

點解曾特首要特登仆親

噚日,孫柏文睇電視見到一班非常勤力嘅記者,企喺中環政府合署,等特首曾蔭權返工。曾特首到達嗰刻,記者即時問特首點睇陳方安生喺立法會補選嘅勝利。

唔使問亞貴都知陳太贏係因為選民對民主嘅訴求非常堅定,唔通係因競選工程掂咩?當然,曾特首作為一個IQ好高嘅人,唔知選民對民主嘅訴求咩?不過因為佢始終係行政長官,所以冇直接答啲記者,最後用例子答。

預視政制劇變

大家可能會問:「噚日特首連聲都冇發過,有答咩?」有。如果大家同我一樣,有睇電視,應該知特首走過啲記者之後,上樓梯時仆親。

大家都知,對上一次香港人喺電視見到有領導人行樓梯時仆親,就係82年戴卓爾夫人去北京,被小平同志通知香港將被解放嗰次。

即係領導人行樓梯時仆親,就等於該位領導人知道,香港政治制度將會出現無可抵擋嘅劇變。

戴卓爾夫人仆親,香港被解放。曾蔭權仆親,香港有普選?

不過,孫柏文今日想公開鼓勵一位喺禮拜日落選嘅候選人。佢就係凌尉雲。凌尉雲喺佢政綱當中,話明為咗弱勢社群保持有入職機會,堅決反對最低工資。

孫柏文有機會問凌尉雲:「自由黨都反對最低工資,點解唔直接支持自由黨算?」凌尉雲話自由黨反對最低工資,開口埋口都係為咗商家。根本冇用心機去解釋畀市民知,最低工資會害咗啲弱勢社群。我就係憑佢呢句覺得凌尉雲好。

落選希望仍在

仲有,喺質問葉太對23條立法嘅立場,問心邊個問葉太比凌尉雲好?淨係:「究竟乜嘢先至算係『共識』?」已經大快人心。

最後,我曾經直接問凌尉雲:「乜你好支持強積金?如果你對自由市場精神堅挺,一定希望取消強積金。點解家只係要求「改良」強積金?」佢話:「一席,十個月,好難推翻強積金。只能希望『改良』。不過,希望到08年立法會選舉,將會有60個支持取消強積金嘅候選人爭60席。」孫柏文都係咁希望,仲希望60個候選人當中,會有凌尉雲。不要氣餒,再接再厲!

Tuesday, December 04, 2007

卒之有人代政府講真話



今時今日,作為一個普通特區人,無時無刻都可以有好多渠道接收訊息。傳統嘅有電視,而比較新穎嘅就有手機。寫到呢度,孫柏文已經感受到從四方八面而嚟,大家好激情咁大嗌:「呃稿費!呃稿費呀!」

唔係為壓炒風

大家聽埋先。喺對上嘅禮拜六,港島區立法會補選前夕,相信大家同我一樣,都收到好多手機短訊。情況有如除夕夜啱啱過12點時,由唔同嘅電話號碼收到千篇一律嘅短訊。當然,禮拜六收到嘅短訊,就唔係「新年快樂」,而係關於「十成按揭」。

咁啱得咁橋,就喺我刪除第n個「十成按揭」短訊時,我從電視機聽到財經事務及庫務局局長陳家強,喺港台節目《香港家書》裏面講到「七成按揭」政策。

陳局長話,因特區人買樓,只可以做七成按揭,所以特區冇爆發「次按危機」,冇危及銀行體制。一聽到陳局長講嘢,我就諗:「補選前夕夜,局長講按揭,又遇短訊潮,咁啱得咁橋?」Coincidence?… Of course!千祈唔好諗咁多陰謀論,人會好快老。

講真,經過陳局長喺《香港家書》嘅解釋,我相信佢已經成為接任金管局總裁一職嘅大熱門。點解?因為佢係第一個政府官員,坦蕩蕩咁話:「香港人儲首期錢嘅時間長三倍,too bad。想一圓置業夢?No way。我哋為咗班有錢銀行家同銀行股東利益,犧牲港人置業夢絕對冇問題。」咁誠實,近乎想人覺得佢乞人憎嘅特區官員,真係除咗任志剛總裁,冇幾多個。如果唔乞人憎,點樣突出央行獨立性呢?

誠實值得尊敬

雖然今日搞難gag窒陳局長,不過我對佢嘅誠實真係覺得值得尊敬。如果大家記得,當年推行「七成按揭」政策,殖民政府好硬膠咁話係除咗「擊退炒家」、「幫樓市降溫」。即係儲錢時間長三倍,反而更易令大家一圓置業夢。而唔係誠誠實實咁話係為咗維持銀行體制健全。

呢個解釋方法,當然係權宜之計。俗稱「屎橋」。大家可能會話:「Sell到政策就得啦!」問題就係,從嗰一刻開始,政府就承擔控制樓宇價格嘅「責任」。自此之後,民粹「做啲嘢」壓力越來越大。呢股壓力,最終遇到個好心人。呢個好心人,最後推出「八萬五」政策。

所以今日,孫柏文要再次多謝陳家強局長,誠實值得尊敬。

Monday, December 03, 2007

SIV上身 滙豐輸幾多?

上個禮拜,孫柏文解釋過,滙豐(005)股東賬面見唔到嘅兩個SIV 雖然該死,不過點解滙豐仲要攬上身,全因啲財雄勢大嘅投資者,當時入股同借錢畀啲SIV,只因對滙豐管理有信心。如果滙豐今日唔出手相救,呢班投資者一定會翻枱,以後唔幫襯滙豐。

仲有,我亦解釋過,滙豐點解原先要搞啲SIV出嚟。理由係,理論上滙豐只係「管理」啲SIV,賬面上唔關滙豐事,就係咁繞過咗例如存款準備金等嘅政府規定,加大槓桿比率。槓桿大啲,如果順風順水,錢都賺多啲。

SIV本身都係借短債,需要不停循環貸款,一路新錢冚舊數。點知啲SIV 真係出事。借唔到新錢,你可以話因為有credit crunch,又可以學我咁話,因為啲SIV根本係資不抵債。點都好,滙豐就攬上身。

大家自自然然下個問題會問:「上身,滙豐嘅代價係乜?」如果順風順水,SIV啲資產真係冇事。滙豐不但冇代價,仲會賺錢,因為原先SIV股東同債權人會賺嘅錢,全歸滙豐。滙豐仲因為對啲投資者不離不棄,贏埋口碑。

一吓就要跌15元

當然,作為叫大家「一注獨沽滙豐」嘅財經口水佬,我唔覺得呢個童話故事式嘅結尾,會發生喺滙豐身上。今次,只係一次財富轉移。由005嘅股東,轉移啲資產畀 SIV嘅股東同債權人。

轉移幾多?根據Moody's計算,滙豐兩個SIV嘅資產,大約只值票面嘅70%。揮發咗嘅30%就值125億美元。如果滙豐硬食呢筆虧損,而市賬率唔變,滙豐股價一吓就要跌15元。即係離我叫大家「一注獨沽滙豐」嗰日嘅112.5元目標價不遠。如果你係滙豐股東,就要小心、小心。

最後,噚日孫柏文睇報紙,見到屯門有個叫陳耀聰嘅中學生,踩單車飛落山。

原來,佢係無需要跌落去。佢跌咗落去嘅原因,係因為佢喺懸崖邊掙扎時,唔肯放棄架單車。真係寧願死都用大髀夾實架單車。點知支持唔住,人車齊墮懸崖。

聽聞,佢係文武全才,他朝做邊行,我真係唔知。不過,如果佢選擇做金融業,我就真係希望佢可以從今次事故吸取教訓。有危險時,就算係愛股,頂唔順都要放出去。今次佢只係小小損手爛腳,他日可能冇咁好彩。

I do wonder why HK politician fails to have the audacity of hope.



Obama at the Jefferson-Jackson dinner in Iowa

Thursday, November 29, 2007

為公義 政府社工減酬!

噚日,應承大家繼續講滙豐將「癌症」SIV注入身體。不過今日想講可以扭轉國運嘅嘢先。話到明癌症,等到下個禮拜都應該未死,到時續談。

噚日,孫柏文經過灣仔,諗住去胡忠大廈,搭巴士去中環。點知,嗰度個巴士站被警方勒令暫停使用,因為附近有大群社工罷工要求同工同酬,搞到我要行多一個站。

應該減半

行過啲示威者時,我真係有啲驚。因為一班覺得孫柏文唱歌,同張學友唱歌應該有「同酬」嘅人,真係唔知佢哋會點做。

當然,我明白點解社工覺得不公平。例如,不排除有張學友fan屎,覺得佢唱歌同孫柏文一樣咁好。不過張學友喺私人市場出唱片,我就係政府請嘅「社會歌手」。張學友出唱片賺嘅錢只得我嘅一半,所以要求「同工同酬」。

講真,如果歌迷覺得張學友唱歌同孫柏文一樣好,就應該立刻要求政府將我嘅薪酬減一半。

因為除非我唔唱轉行,政府將我嘅薪酬減半,我都會繼續做公僕,貢獻社會,因為走出嚟出唱片,薪酬都係咁。

同一邏輯,達到同工同酬目的嘅最好方法,就係將不合理咁高人工嘅政府社工薪酬減半。仲有,慳番嚟嘅錢,就可以做多啲醫療、教育等。為公義政府社工立刻減酬。

早前,法國新總統Sarkozy(薩爾科齊),面對鐵路工人罷工,都冇向呢啲既得利益集團屈服,佢大獲全勝,被譽為80年代「戴卓爾夫人打礦工,扭轉英國國運」式嘅勝利。工人罷工嘅神髓,係要令各界覺得佢哋非常重要。鐵路工人罷工,交通網癱瘓,非常重要,Sarkozy仍勝。社工罷工就…I don't know。

加幾多分?

我哋特區就冇咁好彩,有個競選時大大聲話會打工會,一人一票選出嘅領袖。因為睇吓七.一前,一班班醫生等嘅高薪厚職工人,要求政府合埋眼一刀切加薪。政府嘅答覆?就有如一位老師,被一群學生要求合埋眼一刀切加分時,問啲學生:「加幾多分?」

Sarkozy vs曾蔭權。歷史會覺得邊個係真正嘅政治家?如果有普選,我買曾蔭權。

SIV該死 滙豐為乜上身?

相信大家噚日已經知道,孫柏文曾經叫過大家一注獨沽嘅滙豐(005),卒之出招去應付佢旗下管理嘅兩間special investment vehicle(SIV)。滙豐點樣搞掂呢兩間SIV,或者搞掂嘅方法啱唔啱,遲啲先講,我首先想解釋SIV究竟係乜。

SIV基本上係銀行成立嘅獨立公司,呢間公司首先會搵投資者,問吓佢哋有冇興趣夾份入股。間公司就由銀行自己管理,先問人入股做股東,集資例如100萬。

之後再向債市舉債,例如借900 萬,以發出短期例如4個月嘅債券借錢。每4個月就會借一批新嘅去還舊一批嘅錢。假設,向債市舉債900萬嘅利息成本係5厘,亦即每年利息開支係45萬。

成功得到1000萬之後,佢哋就會買啲不同嘅資產。可能啲資產因成交不足,又或風險較高,回本期較長,所以就算風平浪靜時,呢批資產嘅回報就都係6厘。 1000萬等於有60萬嘅收入,扣除利息支出45萬,等於有15萬收入。

貴客點可以得罪

因為係銀行管理嘅,佢都要收管理費,咁就可能要收番收入嘅20%作為管理費,即係3萬。

有剩嘅派畀股東,即係等於12萬,對於原先投資100萬嘅股東,即係12厘嘅回報。

買6厘風險回報嘅嘢,居然有12厘嘅回報。所以呢個如意算盤咁多人受落。因為佢理論上獨立於銀行,監管機構唔會煩。咁嘅情況下,監管機構向公眾表示做咗啲嘢,銀行同時又可以收取管理費。表面上皆大歡喜。

最壞情況,就係SIV沒有能力每4個月借新錢去還舊錢。理論上SIV收場,資產被拍賣,首先還錢給債權人,如果有剩就歸股東。

理論上搞SIV嘅銀行毋須上身,咁點解滙豐又要?可以投資落呢間SIV嘅投資者,應該係滙豐非富則貴嘅顧客,唔可以激嬲。如果滙豐唔出手救SIV,迫 SIV「賤賣」資產,餘下嘅股東會覺得滙豐出賣佢哋,怒炒滙豐。

亦都唔知借錢畀SIV嘅人,會唔會因為今次SIV唔肯還錢,而同滙豐一刀兩斷。最後就係滙豐本身擁有類似SIV裏面嘅資產,如果「賤賣」價唔靚,滙豐就要重估手上資產值。所以滙豐要攬個SIV上身,雖然不至於話引火自焚,但係都係肯定高風險,聽日再作討論。

你係明日之星

今日,孫柏文想賣吓廣告。我哋《蘋果日報》每日4:30pm有個財經節目「你貼股、我教路」,登上我哋嘅appleactionews.com/features/finance/網站就可以。

平時,呢啲有讀者參與嘅財經節目,都會搵識嘢嘅靚女做主持,但係我哋冇乜budget,所以就有我。節目除咗有我,仲會有好多重量級嘉賓。

呢個節目絕對唔係「問冧巴」節目,我哋想做到嘅係發掘「未來明星分析員」,即係你哋。

你哋上嚟sell心水股票。我哋就聽吓你哋嘅推銷手法sales pitch。

你哋只要用有webcam嘅電腦,就可以做我哋嘅joiner。你哋推銷完,我哋會記錄在案。

未來,其他讀者可以輸入你嘅真名或花名,喺短片檔案庫,睇番你貼過嘅股票。大家作為《金手指》fan屎,都知道我嘅「一注獨贏」貼股紀錄好廢。呢個節目就係畀大家一個機會,證明你哋勁過我好多。我深深相信,呢個節目一定會搵到新嘅財經口水佬。

你可以做阿Webb

仲有,你哋毋須一定以「一注獨贏」去推介股票。你可能買咗、或正在等待機會入某隻股票,間公司可能啱啱出咗業績,或者宣佈咗收購重組。你哋亦可以喺節目內拆局分析。因為未來除咗可以輸入你嘅名睇番短片,仲可以憑股票代號或公司名,睇番啲短片。大家買賣某隻股票前,可以睇番對嗰間公司嘅拆局分析。

其實,你哋仲可以上嚟分享自己嘅投資感受,股票機畫面上只有數字,不過背後有好多喜悅同眼淚。大家甚至可以上我哋嘅節目去責罵上市公司管理層,做吓David Webb。

大家上節目時,不妨花點心思去改名。直至今日,節目中最有特色嘅名,就係一個好鍾意推介衍生工具嘅讀者,叫自己做「玩輪員」。

真係唔可以懶音。最後,如果你上我哋嘅節目,貼嘅股票係阿里巴巴(1688),我會唱歌。大家都知道我就係「技安」,所以唔好迫我唱,唔好貼阿里巴巴。唔好話我冇警告過!

Tuesday, November 27, 2007

一刀切推環保

聽聞喺前宗主國,有個「環保分子」Toni Vernelli,覺得生兒育女只會製造更多人,人多會消耗更多資源,所以反對生仔。佢對「環保」嘅堅定程度,仲令佢喺27歲時主動進行絕育手術。

雖然,孫柏文向來非常反對「一刀切」政策。如果有人想爭取或政府想落實「一刀切」政策,我唔該嗰啲人請先身體力行。例如,喺教育議題上,政府想推行啲乜乜好似母語教學等「一刀切」改革時,負責嘅官員,唔該將自己嘅小朋友留番喺本地教育制度之內。唔好好似現在咁,畀自己嘅小朋友喺國際學校,或送去外國讀書。

不過,對於 Vernelli式嘅「環保一刀切」方法,我覺得值得尊重。見到前宗主國嘅Vernelli,不但口頭上話環保好重要,仲要身體力行,更令我覺得特區嘅「環保分子」得個講字。

所以,如果要贏得尊重,特區「環保分子」就先唔好搞乜嘢司法覆核、爭取膠稅。第一件事就係先行自宮。呢班特區「環保分子」,唔落實呢個「一刀切」政策的話,就只不過揭開自己嘅偽善。點呀?究竟你哋對嘅環保訴求有幾堅定?

有幾堅定先?

反飲管?唔係嗎?畀人兒戲嘅感覺,令社會對環保嘅支持減少,特區嘅「環保分子」該當何罪?

不過講起反飲管。孫柏文真係想知特區啲牙醫去晒邊。飲汽水唔用飲管,唔係對啲牙唔好嘅咩?特區面對住「環保分子」時,點解好似牙醫學會主席梁訓成醫生,呢啲可以為討論注入一些理性嘅專業人士,完全唔出聲?

唔通,梁醫生為咗保住同行利益,希望見到香港小朋友嘅牙爛晒先至開心?見到有「環保分子」為自己嘅吸水局大開綠燈,咪咪嘴笑?原來佛利民真係講得冇錯,啲乜乜專業人士協會,全部都只係想加大向社會吸水嘅能力。

Saturday, November 24, 2007

送你一篇最行貨文章

90年代初,孫柏文開始讀經濟學嘅時候,嗰位從前宗主國嚟老師,好多時都會慨嘆:「實在太懷念蘇聯嘅存在,因為蘇聯實在提供太多教材。」大家要知道,我呢位老師係一個自由市場信徒,佢最鍾意嘅一句說話就係:「Planned economy just doesn't work!」

當年,老師最鍾意攞蘇聯未解體前,自己拍攝市民日常生活嘅照片做教材。曝光率最高嘅一幅,就肯定係影住十幾人排隊嗰幅。曝光率之高,到今時今日我仲記得,嗰十幾人着緊乜。老師往往會揸住幅相,跟住話:「睇吓!高高在上嘅官員,以計劃指導形式去分配資源嘅後果。唔靠消費者同供應商,自行摸索一個可以滿足供求嘅市價,就等於日日叫啲市民去排隊嘥時間。不過冇啦。現在已經冇呢個現象出現。」

聽聞,老師最後同殖民政府一齊,退休回流祖國。所以,我絕對相信佢老人家呢排冇機會北上旅遊、走訪華南地區。如果有,佢部相機就有東山復出嘅機會。先有早排以計劃指導形式,唔畀深圳市民提現鈔,令啲有現鈔嘅提款機大排長龍。再有今日,喺華南地區各大小油站,出現貨櫃車車龍。因為以計劃指導形式,決定柴油售價,令柴油冇得賣。

麪包當波踢

試問,如果要限制貨幣供應。最好方法一定係畀市場決定貨幣嘅「市價」,即係畀市場決定貨幣利息。如果人民幣利息有十幾二十厘,邊度要「限制」啲人提鈔?又或者如果柴油以市價出售,啲貨櫃車司機就毋須忍住唔去,或抱壺度日。

最弊就係,如果「去排隊」決定資源分配方法,就會令到啲「時間唔值錢嘅人」先分配到,仲要攞到之後攞嚟浪費。老師永遠警惕我哋:「喺蘇聯,麪包非常平。不過成功買到嘅人往往係小朋友,佢哋仲要唔係攞嚟食,係攞嚟當波踢!」大家作為《金手指》嘅fan屎,相信應該都係自由市場支持者,呢篇文對大家可能非常行貨。最弊就係對好多高官唔係囉!

Thursday, November 22, 2007

一嚿嚿現金買美地產

This piece has been hacked to death by my editor.

NOT goldfinger's finest hour.

-----------------------------

今年8月,正當因次按爆發嘅金融危機去到最危險嘅時候。花旗國最大按揭中介公司Countrywide,一夜之間通知所有應承提供信貸額嘅商業銀行,Countrywide會攞盡錢,借爆個額。

佢大大聲話借爆額,肯定唔係好事。難怪當時仲好口硬嘅伯南克,突然將貼現率discount rate減0.5厘。所以間Countrywide唔掂,最驚嘅一定係借咗錢畀佢嘅銀行。啲銀行為求保住佢,一定全力救佢。其中Countrywide最大債主,就係美銀BoA。

當時,美銀以18元一股,用20億美元入股Countrywide。Countrywide股價由5月嘅40元,跌到8月嘅20 元。美銀入股消息一出,Countrywide股價升到22元。

好多人當時大讚美銀不單止有義氣,仲有眼光,以平價入股。前晚,Countrywide股價跌過一成,見過9元,比美銀入股價平50%。短短4個月,美銀冇咗10億美元。

其實,Countrywide跌咁多,係政府搞出嚟,不過,私有咗嘅按揭債券公司房貸美Freddie Mac,前晚宣佈輸咗好多錢。輸到話要將派息大減,同埋要大量集資。累到佢嘅姊妹房利美Fannie Mae,都大跌。

按揭債券公司跌價

基本上,如果借款人、借款額同物業都符合規定,Countrywide呢啲按揭中介公司,放債畀人做按揭之後,就可以將按揭賣畀房貸美同房利美。所以除咗次按等唔合規格嘅按揭之外,房貸美同房利美差唔多壟斷按揭市場。

大家可能會問:「點解啲按揭中介公司一定賣畀房貸美同房利美呢?」因為佢哋出價最高。佢哋可以出最高價,係因為市場覺得政府生得佢哋出嚟,出事時一定救。

問題就係,房貸美同房利美真係出事。第一個作用就係按揭市場會完全停頓。到時候,你話花旗國樓市會點?唔通要學深圳市民,一嚿嚿現金先至可以買?

第一膠黨「公民黨」

今日,孫柏文要向黃大仙區議會「龍星選區」嘅選民致敬。

好多人話,特區市民喺區議會選舉層面上,只會關心邊個候選人「做到嘢」、邊個搞嘅蛇宴最好食,而唔會理啲「崇高」嘅價值觀。喺禮拜日嘅區議會選舉,黃大仙區嘅龍星選民就徹底將呢個信念打破。因為從佢哋嘅選票,我聽到佢哋維護言論自由嘅堅定訴求。


言論自由勝一仗


喺龍星選區,重要嘅唔係邊個贏咗,而係邊個輸咗。當日,喺龍星輸咗嘅候選人,就係現任公民黨立法會議員譚香文。

咁點解佢會輸?大家問心一句,譚香文做咗咁多年立法會議員,你哋最記得佢做過嘅係乜?
冇錯!就係搭地鐵時聽到有人講粗口,譚議員跟住去報警,而差佬真係拉咗嗰位仁兄。講粗口都係言論,你去報警即係希望政府箝制言論自由。

所有由有言論自由,最後去到冇言論自由嘅地方,政府都係向啲例如粗口嘅言論開刀先。到啲市民習慣政府有「選擇性」禁止言論自由嘅權力之後,政府就會逐步將僅有嘅空間窒息,呢啲就係李柱銘經常提醒市民嘅「溫水煮蛙」現象。講粗口都要報警?譚香文正硬膠。龍星區選民好嘢!

咁譚香文就輸咗。不過噚日,佢同立法會議員梁家傑就為咗選舉日發生過嘅事報警。事發當日,譚香文同梁家傑就企喺「禁止拉票區」入面。我好想問,選舉日,一個候選人同佢嘅「明星級」黨友企喺「禁止拉票區」裏面,究竟做緊乜?

知法犯法博打咩


我知!我知!佢兩個一定喺到玩緊「特異功能」。發功望住啲選民係咁話:「你睇我唔到!你睇我唔到!」點知功力唔夠俾人見到,就俾啲支持言論自由嘅人重重包圍住。咁大家要記得,支持得言論自由嘅人,好多時都會身體力行,將自由發揮得淋漓盡致。

梁家傑自己都承認冇打人嘅情況出現,不過就話有人「出示拳頭」,所以有足夠嘅理據去報警。孫柏文同梁家傑一樣,當然強烈譴責任何「出示拳頭」去恐嚇選舉對手嘅人,所以今日為大家提供一張圖片。大家睇完之後,相信為特首曾蔭權嘅人身安全,即刻去報警!

Tuesday, November 20, 2007

中央投降 重開直通車?

唔知大家有冇好似孫柏文以前做分析員咁,喺返工嘅單位試過去開啲「落實計劃方向」會。

開會時,聽到高層話:「個計劃我哋要有咁北,去咁北!」
自己心裏第一個反應係:「唔係嘛……去北死緊。一定要向南走!呢個會都係遊吓夢算。」
點知發發吓白日夢,高層突然問:「孫柏文!落實計劃向北走,有冇方案?」

我作為一個忠心耿耿嘅員工,當然提供一個有咁激得咁激向北走嘅方案。點知,有時個高層聽完我講之後,真係揀咗我嘅方案。

走激咗 返轉頭

大家可能會問:「明知向南走先啱,提供個向北走方案都話忠心耿耿?」

冇錯!因為正當公司個計劃有咁快得咁快向北走,就會好快出事。之後物極必反,公司投降,個計劃向南走,欣欣向榮。我仲唔係公司忠臣?哈!哈!

今日同大家分享呢個經驗,係因為我覺得喺「港股直通車」議題上,大陸官僚架構中,出現咗個好似我咁嘅官員。

「港股直通車」政策,喺中央官僚中一定分開「支持」同「反對」呢兩大陣營。

咁因為早前香港股民炒高港股,諗住生擒大陸散戶,令反對「港股直通車」嘅陣營佔盡上風。點知反對陣營中,有個好似我咁嘅自由市場信徒。

反對陣營高官:「大陸資金不可外洩炒港股,你有何方案?」
類似孫柏文嘅小馬鈴薯:「聽聞好多人喺深圳攞現鈔去香港炒股,不如禁制啲人喺深圳攞現鈔。」高官:「不會擾民嗎?」
小馬鈴薯:「為求達到政治目的,一定要有決心!」高官:「對。」

限錢 係先兆

就係咁,中央已成功令深圳嘅千幾萬個市民,成為最想盡快落實「港股直通車」嘅人。因為一落實,最起碼提款機有錢攞,唔使再煩。講真,出到一刀切唔畀人攞現鈔,去對付港股炒風,smells like desperation。(嗅到有陣頑固、無計可施、垂死掙扎嘅氣味。)

如果睇番04年初,當時中央政府做宏調亦都有同樣情況。去到4月尾5月頭,市場傳出中央已頒佈命令,一刀切禁止任何銀行貸款,超級擾民。之後出事,中央投降,個市亦升番。今時今日,唔知「冇咗」港股直通車,特區股市要再跌幾多,不過出到咁激咁擾民嘅手法,唔通中央投降在即?


Monday, November 19, 2007

小心睇完會改投資觀

孫柏文呢排反覆諗「Black Swan黑天鵝」概念。相信大家都知,話一件事係黑天鵝,等於呢件事有三大特點。博客Moneycafe解得最好:

1.事出突然,發生前完全預計唔到。
2.影響深遠。
3.不過發生之後,就好多人提供好多合情合理嘅解釋方法,話:「一早應該預計到啦!」

好多人鍾意用911做「負面黑天鵝」嘅例子。將黑天鵝概念發揚光大嘅Nassim Taleb,就鍾意用互聯網、雷射、電腦嘅興起做「正面黑天鵝」嘅例子。呢幾日,博客Moneycafe就諗:「今天金融市場複雜得令人害怕……到底次按危機係咪黑天鵝?」我亦應承今日答佢。孫柏文可以斬釘截鐵咁話:「Depends!」

大家睇到呢度,相信又想「網絡欺凌」我。應該已經破口大罵:「Depends?咁係咪黑天鵝先?」其實一件事係咪黑天鵝,取決於觀點與角度。

「慘過八萬五」

Taleb 喺佢本書裏面講過兩個人。第一個就係投資銀行裏面嘅典型統計學博士。第二個就係投資銀行裏面,由「派信仔」做起嘅高級炒家。

Taleb話如果你問佢哋兩個:「有隻銀仔擲毫連續開咗99次「公」,咁第100鋪開「公」嘅機會率又有幾高?」統計學博士就會話:「擲毫,下次開「公」或「字」嘅機會率都係 50%。」相信你呢個懶醒fan屎都係咁諗。

不過高級炒家就會話:「連續99次「公」?個銀仔肯定有問題啦!第100鋪肯定都係「公」!」

將佢哋嘅分析伸延,如果第101至200鋪都係「公」,對於統計學博士嚟講係一次黑天鵝,因為佢用嘅計算程式model話每鋪「公」得50%機會。

不過對於個高級炒家就唔係,佢未必知個銀仔嘅問題喺邊,但係因體現咗《信報》曹sir嘅「有智慧、不如趁勢」,所以贏大錢。

今時今日,喺各大投資銀行裏面嘅統計學博士,可能覺得每張次按債券爆煲機會得50%。因為呢個係用佢哋嘅model計算出嚟。問題就係100張裏面,已經有99張爆煲,不過如果問第100張會點。佢哋一定話50%冇事。

所以對嗰啲信投資銀行「專家」嘅人,次按危機係黑天鵝。不過,對《金手指》fan屎就肯定唔係。舊年已經話過「花旗國樓市將慘過八萬五」!

Friday, November 16, 2007

陳淑莊︰山頂董建華

孫柏文做過廿幾年司徒拔道街坊,相信大家雖然未必知喺邊度,不過應該聽過司徒拔道嘅「景賢里」。由我得幾歲時,同老竇行寶雲道,喺「景賢里」牆腳,被非法入境者打劫。到廿幾歲學成歸來時,走去放吓家中老狗,點知走失差啲唔見,好彩喺「景賢里」嘅大閘搵番。「景賢里」未必係你嘅回憶,不過絕對係好似我呢啲人嘅集體回憶。

今日,出於我對「景賢里」居然有咁嘅下場嘅悲痛,孫柏文懇請山頂選區嘅選民,呢個禮拜日,千祈唔好投票畀拆「景賢里」嘅兇手──陳淑莊

香港呢幾年被一股「保育」風氣籠罩。我作為「景賢里」嘅fan屎,社會有咁嘅動力,當然係件好事。不過早排,正當風氣變成行動,當喜帖街、波鞋街、裕民坊變成戰場,我就開始為未有人講嘅「景賢里」擔心。

因為政府嘅古蹟條例,完全剝奪私產。由用途到裝修,業主可享有嘅權利同彈性但大大減少。而每一次有好心做壞事嘅「保育人士」,屈政府用古蹟條例去「保護」某些物業,最終後果就係,我哋真正值得保護嘅私人建築,受到不必要嘅破壞。

點解?如果你係一個業主,擁有一棟有幾十年歷史嘅建築物。你雖然非常喜愛嗰棟建築物,不過你知道一旦好似陳淑莊嘅「保育人士」,突然關心你棟建築物,你就連翻新、裝修嘅權利都被剝奪,你問心嗰句,會點做?一係含着淚即刻拆,一係完全唔做維修,令建築物變成頹垣敗瓦,等陳淑莊嗰種人唔覺得有保育價值。

亦即等於,陳淑莊越推動「保育」,香港真正有保護價值嘅私人建築物就越被破壞。好心做壞事嘅政客,可以製造出來嘅破壞力大家都見過。陳淑莊就係山頂嘅董建華。

寧積極不干預

各位山頂選民,問心一句,02年如果特首有秘密不記名嘅直選選舉,你會唔會投董建華一票,支持佢連任,令佢嘅管治方向有mandate?如果當年唔會助長歪風,今日就要為「保育變破壞」拔草除根。就係佢迫「景賢里」變成業主冇產權嘅「古蹟」。今日山腰「景賢里」,他朝山頂你間屋。

我知你哋可能個人層面上認識陳淑莊。覺得佢係一個滿腔熱誠嘅年輕人,覺得應該鼓勵呢啲想為社會作出貢獻嘅人。不過,衷心希望大家可以尊重民主精神。人民共同選出來嘅政府代表,一定要小心揀。寧願積極不干預,好過積極去破壞。



Where's the apology Tanya?
Are you even sorry?

Do you know someone who lives on the Peak?
Tell them what is the right thing to do!


最後,仲要寫呢句畀選委會啲追求形式公平嘅官僚︰07年區議會山頂選區候選人仲有林文傑、梁永安。

Thursday, November 15, 2007

通脹勢將失控

噚日,滙豐為花旗國業務向股東交代。原先想分析吓。不過,喺小弟落筆嘅呢一刻,滙豐只係公佈咗啲報告。因為「講未來」嘅分析員發佈會仲未開始,惟有聽日先同大家講。

今日,孫柏文想繼續講,深圳啲銀行唔畀存戶攞錢單嘢,因為真係令我好不安。相信大家都知,深圳存戶呢幾日提款面對數額限制,每日不能逾3萬。即係自己錢,唔畀攞。

噚日,打電話畀隔籬思哲兄,問吓佢點睇。佢話:「呢個唔畀存戶攞錢嘅指令,真係由央行發出。政府話係去打擊黃、賭、毒。」

大鑊到要講大話

我一聽就答:「打黃賭毒?Oh please,唔好玩啦!即係某間油尖旺的士高裏面有人索K,香港銀行唔畀攞錢?數額總要好奇怪,攞3萬索K肯定OD死。打黃賭毒?講大話都講得咁硬膠。」

經過討論一番之後,思哲兄同我都決定今日寫呢單嘢。因為我哋兩個都絕對同意,政府話限提款為打黃賭毒,係講大話。

問題就係如果政府講大話,咁真正理由係乜?

而真正嘅理由,點解大鑊到要政府講大話?

第一個解釋方法,就係央行冇現鈔。以前細細個過年,老竇話大陸利是用舊銀紙,因為冇budget印新。現在大國崛起,冇理由冇budget。唔通啲印刷機俾聯儲局同日央行霸晒嚟用?冇理由。

第二係因為想維持銀行體制穩定,不斷提高存款準備金,銀行唔想違規,只好焗住啲存款,當自己係曱甴酒店。不過就將情況變得更加不穩定。試問,如果你喺大陸有閒錢鈔票,仲會唔會放喺銀行?

第三就係央行想控制貨幣供應去打擊通脹。理論上市場上冇現鈔,拖慢交易速度,就可以控制貨幣供應。最弊,好多「見得光」或「唔見得光」嘅進口產品,都係經過深圳。如果有個進口巴西豬肉入大陸嘅商人,貨到不過因對方只收現金,所以無法找數畀佢。啲豬肉喺口岸腐爛,未能進口,豬肉價繼而飛升,通脹更加失控,呢隻鑊邊個孭先?

真係好不安。

What's happening in 深圳?

「乜話?一支白醋炒到50蚊?仲要攞嚟煲?大陸搞乜鬼呀?」
──孫柏文03年1月向某的士司機講過嘅話。

噚日,孫柏文睇《蘋果日報》,喺「兩岸版」睇到佛山市郵局局長偷錢18億。大家都知祖國郵局有存款服務,呢個局長向存戶扮到好似代表郵局收存款,令存戶仲估畀緊錢入郵局。點知局長原來中飽私囊。18億,應該牽涉好多存戶。不過,故事嘅關鍵,係被騙嘅存戶冇得賠。

我就喺度諗,如果我識人仲估自己存咗錢入郵局。不過因為郵局內部監管不力,出咗事冇得賠,我啲錢冇晒。我會點做?郵局就係國家嘅,郵局唔肯賠,就即係國家冇得賠。真係唔知仲有邊間郵局、國家嘅銀行分行可能有事。都係攞晒啲錢出嚟安全啲。

容乜易擠提o架

正當我喺度諗時,就聽到話離佛山唔遠嘅深圳,所有銀行突然宣布限制存戶攞錢。傳出嘅理由好多。有啲話要打擊犯罪活動,有啲就話係宏調。有幾個我非常尊重嘅消息來源就話,祖國存戶一早習慣「存錢容易、攞錢難」。銀行分行唔夠現金,我可以明白。不過冇理由咁高調宣佈,阿根廷咩?

呢啲好容易令千萬人嘅城市出現恐慌,出現失控嘅擠提。相信我都係神經過敏,不過,當年你第一次聽到一支醋炒到50蚊時,你又有乜嘢反應?

坐定睇滙控花旗國業績




孫柏文叫大家「一注獨沽」嘅滙控(005),今晚交代花旗國業務。

今日,本想分享我對滙控嘅預期,點知,噚日喺公司嘅「休氣場地」,有位早前乖乖地聽我話買滙控跌嘅同事話:「你呀!你呢個明燈呀!千祈千祈唔好寫滙控會點衰點衰呀!我手上嘅put輪,已經輸咗好多時間值。畀你寫一寫,滙控分分鐘話毋須撇賬,喺未來都唔使撥備。到時正股升,我又輸錢。」

呢個咁誠意嘅訴求,雖然離譜地違反言論自由,不過打動我心靈。

所以,我今日只勸有興趣滙控嘅人,今晚睇佢哋出花旗國業績時,一定要坐定定。特別係如果你一路睇好,更加唔好企響度睇。因為我擔心佢哋一出聲,你會暈低……當然係開心到暈啦!我係明燈啊!

Tuesday, November 13, 2007

印度想人民窮多幾耐?

近幾年,好多人都鍾意攞印度同中國比。話雖然中國「先起步」,不過印度有條件「後來居上」。今日,孫柏文可以同大家話,印度想過祖國?冇可能。一係咁講,印度想過祖國唔係唔得,不過第一件事一定要炒咗佢哋嘅石油部長先。

點解?任何一個21世紀現代經濟體系,都係靠石油推動。任何一個國家,落實將自己石油供應斬斷嘅政策,經濟上只會自取滅亡。上個禮拜,印度石油部長公開發表建議,令我覺得話印度趕上中國,唔好玩啦!

乜咁就壓到油價咩?


呢位叫 Srinivasan 嘅部長,眼見油價居高不下,話解決高油價嘅「方法」係禁止石油喺商品交易所買賣。佢話:「我又見唔到石油出現短缺,供應出現中斷,需求又唔覺有大幅調升。油價升只係啲人喺商品交易所炒炒賣賣。只要禁止石油嘅買賣,油價咪會跌番囉!」

其實,呢位部長究竟明唔明點解石油冇出現短缺?咪就係因為有呢啲「邪惡」嘅商品交易所。石油報價不斷跳動,只不過係用戶搵緊最適合自己嘅供應商,供應商亦係搵緊最適合自己嘅用戶。喺報價清晰易明嘅情況下,唔想喺嗰個價買油嘅人自然唔買,肯喺嗰個價買,就一定買到,咁咪冇短缺囉!

如果印度政府唔鍾意呢個價買油,咁咪唔好買囉。最驚就係有印度人,有方法好有效率咁用石油,肯出高價買,不過政府出嚟話唔得。

仲有,一但冇清晰嘅「高市價」,世界各地嘅供應商,又邊會諗方法去增加供應。邊有人諗方法,直情去取替石油,或者諗方法更加有效用油?印度政府究竟想印度人窮多幾耐?

大家可能會話:「不過市場真係有好多炒賣活動。佢哋嘅錢真係推高油價。」炒家其實好重要,佢哋嘅出現,幫市場提供流通量。真正反映實際供求嘅價格,亦因有炒家嘅出現,更快達到。供應商同用戶,就可以慳番啲時間,盡快調節供求模式。我真係想知,究竟印度政府想印度人再窮多幾耐?!

Monday, November 12, 2007

和諧壓倒一切



上個禮拜某日中午,孫柏文開緊會,亦將手機校做震機。因為當日嘅會議非常引人入勝,所以有人打電話嚟都唔知。到個會開完之後,先至發現,原來老竇打過電話畀我,亦有留言。

老竇搵我,做仔嘅當然第一時間諗吓,呢排係咪做過啲乜嘢衰嘢(呢個就一定),係咪畀老竇知道咗(呢個就未必),所以打電話嚟「訓話」。點都好,我就聽吓老竇喺留言信箱裏面講乜。老竇:「成十二點幾,你都唔聽電話,你今日放假呀?你仲未起身呀?噚晚又去玩嚟呀?叫咗你唔好成日去玩。」。

老竇繼續話:「孫柏文,你要寫吓「生果金」。呢啲唔鬧吓點得o架,你諗吓寫吓啦。」聽完,一頭霧水。最後,都係打電話畀老竇查個究竟,佢對政府畀老人家嘅福利「生果金」有乜咁唔滿意。首先,大家要知道,我老竇啱啱幾個月前退休。作為一個典型香港人,喺冇乜嘢忙嘅情況之下,就開始打聽究竟點樣可以喺現有架構當中「屈機」game the system,屈啲老人着數番嚟。

生果金歧視?

原來,我老竇嬲政府嘅「生果金」政策。佢話:「生果金唔係用嚟敬老咩?敬老有分貴賤咩?點解65至70歲嘅生果金要歧視?要睇收入?要睇資產?我係咪去到65歲時,一鋪過買場馬,輸咗就有得早啲攞?」

我答:「即係你覺得政府鼓勵moral hazard?」

老竇:「我唔理叫乜呀。如果曾蔭權話70歲、75歲先至有得攞,我冇問題。不過,如果你話有得攞,就唔應該歧視。敬老呀,唔係福利,唔係攞綜援。曾蔭權咁搞,只係會分化香港人,分化香港啲老人家。我哋唔係好需要和諧咩?咁樣點和諧呀?你寫吓問曾蔭權,點解要分化香港人。問吓佢,我哋點樣和諧?」

小弟作為自由市場智庫組織「獅子山學會」嘅研究總監,大家都應該知道我對生果金點睇。不過,最令我估唔到嘅係,除咗2000年立法會選舉之外,我老竇係一個由1985年開始已經次次票投李柱銘嘅人。居然都會覺得「和諧」壓倒一切!

One year of counting


It was one year ago today, that I first added Google Analytics counting tools to this blog.

And these are the stats.

157,768 Visits

246,719 Pageviews

in 365 days.

Traffic began with only single digit of visitors a day. To today consistently over 4 digits.

Thank you for visiting. And remember... feel free to continue to air all of your grievances here. Especially if it is me who has caused the grief. ho ho ho


= )

Saturday, November 10, 2007

Why Silver got Beat down on Thursday...


As you can see from the chart above, silver was making a decent move on Thursday HK time. Rose through $16 per Oz (blue line).

But as the market approached New York opening (silver is traded on the NYMEX) it look
as if someone took an axe and chopped the leg off silver.

Silver went from $16.10 to $14.85 in an intraday move. An 8% move. Gut wrenching for those who is 20x leveraged.

Anyhow... After searching high and low for a reason.

I think this is why.

"NYMEX to raise gold and silver futures margins"

Notice, the news broke on Reuters Thursday morning US time. And they raised margin requirements by 50%! Think of how much unwinding of positions if you were not a commercial bank. Hence if you were long. I am sure I won't be the only one blogging about this.

Ah well. At least that potential bad news is out of the way.

Everyone's favourite company since IPO

12月初減息?

前晚,孫柏文放工返屋企開電視睇。因為我每日放工嘅時間比較晏,返到屋企時多數已經過咗凌晨十二點。小弟一向以來,都非常鍾意睇啲有濃厚戲劇性嘅娛樂節目,所以喺嗰個時段,一定係睇財經台CNBC直播花旗國股市最新情況。

其實,好多人批評CNBC只係一間「啦啦隊」財經台,而唔係中立報道、分析財經資訊。情況有如「天氣台」,裏面啲主播,對住啲觀眾希望日日晴天,落雨就會邀請啲會話「雨好快過!好快又會天晴!」嘅嘉賓。

雖然,我對於呢個論調基本上同意,不過我覺得,有兩個會喺CNBC發言嘅人,值得大家睇吓。第一個就係叫 Arthur Cashin,佢喺股市已經打滾好多年,捕捉市場情緒嘅能力非常高。

第二個就係跑債市新聞嘅 Rick Santelli,好多時債券價格走勢反映一啲對股市不利嘅預測時,就算當時股市背道而馳,Rick Santelli就算被千夫所指,都會照直解讀債市走勢。不過,就算CNBC偏向「喜歡」牛市,佢哋對於市場升跌原因嘅掌握都尚算不錯。所以,前晚我對 CNBC都幾失望。大家都應該記得,前晚花旗國股市跌咗360點,特區股市亦承接跌勢,喺噚日跌948點。

金融業瞓低

咁我前晚一路睇CNBC,佢哋完全冇能力解釋,點解股市沽壓咁大。開市就話係油價升,點知油價開始跌,股市繼續沽。之後就話係美元弱勢,點知美滙指數又開始轉強,股市照樣跌。

其實,花旗國同我哋特區一模一樣,已經變咗「政策市」。我哋啲金融從業員北望溫家寶,佢哋啲就仰望伯南克。點解我會話佢哋係「仰」望?因為佢哋嘅金融業已經瞓低咗。

講真,前晚跌360點嘅原因,係因為聯儲局開始以更高姿態方式,希望市場「知道」12月初會議減息唔係必然。孫柏文呢啲死硬派,當然覺得聯儲局一定減息去摧毀美元。至於飄忽無定嘅市場,呢排都好似我咁,覺得減息係必然。

不過,前晚跌嘅360點,就好似有市場參與者,覺得聯儲局會更加大聲,希望市場信吓佢「可能唔減息」。呢幾日,伯南克一定會做做show,講講嘢。不過,市場就算聽到,到最後都會當聽唔到,迫聯儲局喺12月初減息。


Thursday, November 08, 2007

重申一注獨贏買白銀

各位白銀戰隊成員。今日,孫柏文作為「白銀文」,要同大家講句:「以花旗國聯儲局為首嘅紙幣狂魔大聯盟。Tonight, they dine in hell!」

本欄舊年3月6日,第一次以每日見報形式出現。相信大家作為《金手指》fan屎,都應該記得,嗰日篇文嘅題就係《一注獨贏買白銀》。當日,白銀價係10美元一盎斯,我就第一次為大家提供買白銀建議,有效期十年。今日,白銀已升穿15美元一盎斯,我要重申一注獨贏買白銀。

重申建議買入:白銀

目標價:每盎斯120美元

年期:至到2016年3月6日


如果大家未聽過呢個建議,我想你知道你冇睇錯。目標價真係每盎斯120美元。相信大家都知道,呢排白銀「升」係因為美元。就算你同拉登喺阿富汗同巴基斯坦接壤邊境嘅山洞居住,都應該知道美元呢幾日跌到仆直。

美元跌嘅原因有一千幾百個,甚至美元以前唔跌,更需要搵解釋方法。本欄經常重複又重複,喺美元下跌嘅情況之下,乜嘢都會升。

美元跌=>雞犬皆升

就連嗰啲唔鍾意投機買賣,想安份守己乖乖地儲錢嘅人,都被不斷貶值嘅紙幣迫到一定要參與炒作活動。唔識或唔敢,就只可以眼白白睇住自己辛辛苦苦儲番嚟嘅購買力,不斷消散喺空氣中。

大家可能知道,黃金已早幾個月開始升。白銀就大落後。有啲人仲話:「金升,銀唔升,黃金升勢根本係「流嘢」。」其實,白銀同黃金上升,方法非常唔同。黃金往往都會穩步上揚,而白銀就會一路橫行,考驗大家嘅耐性。特別係考驗白銀戰隊成員嘅信念。不過,每次白銀真係開始升,就會爆發上升(看圖)。




救美元?邊度得閒

呢個特性,亦令白銀成為「平均入市法」嘅最佳投資項目。因為你可以一路每個月執平貨,等爆上。今日白銀又結束橫行嘅日子,我絕對相信又會爆上。

今次升浪會升幾多?我唔知。不過,我對目標價不離不棄。大家一定擔心,究竟眾央行會否一齊救美元。我諗佢哋忙緊為佢哋監管嘅商業、投資銀行計數,想搵出究竟啲金融機構賬面上嘅資產值幾多錢,多過救美元。

講多次,tonight, they dine in hell!重申一注獨贏買白銀!

Wednesday, November 07, 2007

阿里巴巴點解值300倍PE

噚日,有間公司令孫柏文百感交集,今日一定要同大家分享。如果大家有留意,噚日有間叫做阿里巴巴嘅公司上市,編號1688。

大家可能會問:「呢幾年,有咁多間公司嚟香港上市,點解要特登寫呢間?」我今日要寫阿里巴巴嘅原因,係因為佢哋係一間非常偉大的公司。佢哋主要有兩大產品,而兩種產品都係對人類非常重要。

產品有驚世貢獻?


阿里巴巴嘅管理層,深深明白人類過去嘅歷史。清楚知道自從文明開始,人類飽受戰火嘅煎熬。人類嘅科技,就算發明嘅人係希望佢嘅科技能夠促進人類生存力,最終都會被好戰者攞去打仗,令歷史中無數無辜嘅平民百姓被殺,血流成河。

甚至乎科技越係進步,無辜要死嘅人就越多。所以,平民百姓對能夠繼續生存嘅需求非常之大。

阿里巴巴就係睇中呢個商機,喺幾年前推出一種叫做「世界和平」嘅產品,英文叫World Peace。

除咗有「世界和平」呢個產品之外,佢哋嘅管理層亦明白就算世界冇戰亂,人,始終都有終老嘅一日。食物產量增加,公共衞生意識日益進步,工業同交通日趨安全,令傳統延壽方法嘅回報,每下愈況。

魂歸天國嘅理由開始轉變,越嚟越多人因一樣叫做「癌症」嘅嘢,面對死亡。所以,世界各國嘅人對能夠擺脫被癌魔纏繞嘅需求非常之大。

阿里巴巴就係睇中呢個商機,喺幾年前推出一種叫做「癌必治」嘅產品,英文叫Cure for Cancer。

阿里巴巴嘅營業額,就係被呢兩種產品帶動,呢幾年節節上升。市場對於「癌必治」同「世界和平」,未開發嘅需求非常之有信心。覺得當今世上 60億人,都會幫襯阿里巴巴。所以噚日就算阿里巴巴嘅市盈率去到300倍,都仲有人買。

怕者睇錯招股書


等等……乜話!孫柏文睇錯咗招股書?原來唔係阿里巴巴有得賣World Peace同Cure for Cancer。死啦!噚日應該有好多同我一樣嘅人睇錯咗。如果唔係,點會300倍PE都仲入貨?

噚日,阿里巴巴最高見過39.95元一股。如果大家識嗰位喺39.95元買入嘅朋友,希望你可以叫佢打電話嚟《蘋果日報》搵我。我只怕佢係講普通話,因為我嘅普通話好差。

Tuesday, November 06, 2007

果然守信用!



我同 Leona 打賭她在抽新股的過程中將會輸錢。她真的輸了。

不過她就算輸了,都有君子的風範,願賭服輸。即時履行承諾,將自己的blog名改了。

早前我暗示她是一名「港女」,是我的錯。今日,孫柏文道歉,因為Leona不是港女

Sweet Sweet Silver!!!

聯儲局 12月必減息

上個禮拜,花旗國聯儲局減息。呢個舉動連牛頭角順嫂都預咗。金融市場參與者關心嘅,唔係當日有冇息減,而係喺未來會否繼續減,特別係12月,咁就要睇吓佢哋會議日出嘅聲明。

啲市場參與者,特別係嗰啲「專家」,睇完個聲明之後,話聯儲局覺得已經冇需要再減息。「打擊通脹」又再次成為首要目標。孫柏文都有睇過份聲明,反覆思考後,發覺呢啲「專家」嘅分析完全冇錯。聯儲局真係想大家覺得:佢哋已經決定冇需要再減息。

不過,我同時發現,聲明嘅語氣似曾相識。聲明當中,最令人覺得,佢哋已經決定冇需要再減息嘅一句係:「The Committee judges that, after this action, the upside risks to inflation roughly balance the downside risks to growth.」特別係用咗balance呢個字,去形容通脹風險同衰退危機已達平衡點。平衡,即係冇需要再做嘢。

誠信一失金爆升

點解我會話似曾相識?原來02年11月6日,格林斯潘主持嘅聯儲局,亦有用balance呢個字。佢哋當日議息,決定減息半厘,由1.75%減到 1.25%。我絕對相信,當時格林斯潘用balance呢個字,唔係因為佢真係覺得冇需要再減息,而係為咗振奮各界信心,惟有硬着頭皮,畀全世界一個「已到谷底,反彈在即」嘅感覺。

當時,好多人話睇死格林斯潘未減完息。最終,經濟繼續有問題,格林斯潘惟有「今日的我打倒昨日的我」,喺03年再減息,減到 1%。

大家可能會問:「02年聯儲局用咗balance呢個字,都咁多人睇死未減完息。最後真係未減完。聯儲局咪面對好大嘅誠信問題?」問得好!大家作為《金手指》fan屎,都知道,如果印紙幣嘅聯儲局失誠信,上帝賜給人類嘅貨幣黃金,就會冒起。如果大家睇吓黃金嘅十年走勢圖,就會發覺,黃金就係喺02年 11月升穿320美元一盎斯嘅多年阻力位。一直升到今日。

伯南克嘅聯儲局,將會面對同一厄運,嚟緊嘅幾個禮拜,會有不斷嘅壞消息湧現。啲壞消息仲要係從紙幣制度心臟地帶嘅銀行業湧出,到12月初,聯儲局必定要繼續減息。紙幣制度誠信破產,黃金、白銀就只會繼續升。對上幾年,啲人買金銀係出於貪念,上個禮拜,我哋卒之正式進入「買金銀係出於恐懼」,出於貨幣貶值恐懼嘅年代。

點解溫總高調叫停車

早喺9月5日,孫柏文寫過《講你知「資金自由行」何時來》。當時,恒指得24000點。我講過話:「中央官員係父母官……祖國散戶就係啲成個袋都係利是錢嘅小朋友……阿媽都希望啲小朋友就算亂嚟,都盡量減低輸錢嘅機會。」

即係點?即係中央如果畀散戶出嚟買嘢,絕對唔希望佢哋接火棒。
即係「資金自由行」要等到股市大跌之後,到時通街平貨,散戶亂買嘢都冇咁大鑊。

點知,我哋呢班特區股民,一聽到話會有祖國散戶落嚟亂買嘢,就個個由羊太變成大盜,想打劫祖國散戶。如果你係其中一個因聽到「資金自由行」政策出台,所以入市嘅股民,問心嗰句:「你係咪大盜?係咪想打劫?」

試問阿拉伯傳說1001夜當中嘅阿里巴巴,係攞邊個嘅錢?試問2007年嘅阿里巴巴(1688)上市cap水,又係攞邊個嘅錢?你仲唔係大盜?

點解中央咁驚祖國散戶輸錢?咁我就問大家:「中央政府最驚啲乜?」相信大家都會答:「亂!」祖國有上億個散戶,如果上街圍堵中南海,點算?




講真,總理溫家寶喺電視鏡頭前叫停「資金自由行」,我都有睇。相信大家都問「點解要喺嗰一刻,投下大殺傷力武器?」其實,如果大家有細心留意溫總嗰一刻嘅服飾,就知點解。

溫總當時着住運動衫(看圖)。孫柏文作為經常做運動嘅人,清楚明白做運動前一定要「拉筋」,拉完就盡快開始做運動,如果唔係,好容易損傷。

下次唔好阻頭阻勢

溫總佢老人家當日諗住拉好筋,準備去跑吓步,點知途中俾班特區記者阻住(看圖)。原本都唔想「畫出腸」,叫停「資金自由行」,諗住「冇講等於冇咗」算。

點知啲特區記者係要唔知情識趣咁阻住溫總,搞到溫總心情唔好,要向特區股民講壞消息。下次要緊記,唔好阻住溫總做運動!如果唔係,連QDII都冇埋,點算?



最後,原來賭牛市玩完,唔係睇乜嘢「藍燈籠」。只要跟新地(016)配股就得,上個禮拜新地已配股,你又點?

Monday, November 05, 2007

The rhetorics heats up concerning the bet between Leona and I...


Well, in my previous post. I have clarified the ground rules concerning the bet between Leona and I.

I am simply betting that Leona will lose money on applying for Alibaba's IPO.

Anyhow... A lot of you have left comments... One left by "dc" I think captures the sentiment.

dc said...

"...說穿了﹐正如其他人所講﹐Pakman一開始已是取巧 - 他bet的是"抽簽抽中買到阿里爸爸"﹐好似買六合彩0甘(當然或然率不同﹐但0甘多人抽相對而言小散戶如Leona抽中機會當然不高)﹐不是他前文所提 "阿里爸爸IPO時入貨買入"﹐擺明佔Leona便宜,有心算無心﹐否則老練滑頭如老孫豈會在自己地頭劃下道兒?

十拿九穩的賭博﹐我是Pakman的話也會這樣耀武揚威﹐不然賭來幹麼? lol

可苦了我們可能無得睇Leona個blog一個禮拜 :( ..."


--------------------------

There is a couple of things I think I need to further clarify.

1. 取巧?

Which part of 打死唔抽阿里巴巴 is 取巧?

打死? 唔抽? Which part?

How much clearer do I have to make it to you dc? hahahahhahaha

Seriously. hahahahahah

An IPO application has costs.

Even if you fill in a white form (which Leona didn't, she clicked clicked clicked her way to application fees), there are still your time needed to fill it in.

Anyhow, the odds of getting shares (500 only too per lot may I add) I doubt very much was worth getting those shares. Perhaps on listing day, QDII will buy all those Alibaba shares from you all. ho ho ho

2. See... You all don't understand. If you have met Leona, you would know she is very very hot, I know dc thinks that Leona is hot hot hot.

Now, just to dispel rumours that I go easy on Hot Chicks that is stricken momentarily with hard plastic, I believe this bet with Leona does it.

If you think this is an attempt to bully anyone... Well, I am sure Leona is not this girl.

3. Also, as for "阿里爸爸IPO時入貨買入". I don't think I have ever written those words. Please check check for me.

4. Finally, why am I so insistent in pursuing this bet. And see Leona's outcome when she goes through Alibaba's IPO?

BECAUSE SHE CAME TO MY BLOG AND PISSED IN IT.




The evidence of her pissing.

So therefore, to s tsui et al. If Leona can't stand the heat, she should stop pissing in other's blog.

My day job. Is partly to recommend actions to my readers. Thats what I get paid for to do. I take it extremely seriously.

If you think going contrary to my beliefs are very profitable, thats fine. But if you come to my blog and shove my face in it. Well, I think you are absolutely fair game... I am sure even s tsui will agree. Right s tsui? Simple decorum is surely not beyond your ilk.

So let's bet! hahahahhaah

One last time... 打死唔抽阿里巴巴 woot woot!

------------------------

Now. I am praying very hard for her not getting any shares hahahahahha
I'm pretty much screwed if she does.




Sunday, November 04, 2007

買Leona 抽阿里巴巴輸錢 II

OK. Follow up bet between Leona and I.

Leona 話...

"(1)我不同意抽不中當輸,但既然你堅持,我不同你爭
(2)in any case,即使我輸,頂多把個blog改名為「我是散戶」一周
你提議的名稱我不喜歡,我寫不出

就這樣定了吧..."

首先,我真的不知道 Leona 抽了多少手
阿里巴巴。只知道不是用白表申請

不同意抽不中當輸?那我要問一問 Leona,抽不中會不會輸錢?你又不是用白表申請,不要那麼港女,輸錢就輸錢,不要話係我堅持吧!一早叫你打死唔好抽阿里巴巴。

原先 Leona 話如果佢贏,我就要剃鬚。我就打電話畀佢:「我叫你將個blog改名一個禮拜,你就要我剃鬚。不如叫我自宮啊?又或者你輸左要剃頭啊? Hahahahaha」最後我們達成了共識。

所以,如果 Leona 贏,我就要一個星期內不准在將軍澳蘋果日報範圍內穿著以下任何一種服式:a.短褲 b. T恤 c.人字拖。

講真,這是一個 HUGE SACRIFICE!!當年唔撈分析員,都是因為不准著以上三種服式上班。

其實,我都明將你個blog改名為《這個blog雖然鱔》,將會太入肉。我明入肉野港女唔鍾意。

所以,如果我贏,Leona個blog改名為《我是散戶》一個禮拜。

The Bet is on!

Lets come out of the closet


"各位土共,在質疑福佳係粗口之前,唔該執執你地屋企果枝「江交棒」......"

hahahHAhAHHAhAhaHAHha

Friday, November 02, 2007

英航公關肥佬

10月17日,孫柏文寫過《Heathrow's Business Model》,解釋倫敦希斯路機場點樣搵錢,同地鐵(066)一樣,唔係靠載客服務,而係靠地產。地鐵建住宅,希斯路就將機場變成購物中心,收租搵錢。

我寫嗰篇文,係因為有個女同事經希斯路返港,航空公司搞唔見咗佢啲行李。我覺得變走啲行李,係希斯路將搵錢絕技發揮得淋漓盡致。行李唔可以寄艙,吓吓要手提,手提咁辛苦,旅客就會選擇喺機場購物。

反面教材


今日重提舊事,係因為有新發展。嗰位女同事,去信質問航空公司︰英航 British Airways,問佢哋希斯路唔見行李嘅事。英航答話,英國政府對手提行李有好多限制,令到處理寄艙行李「面對相當大的壓力」。我都可以理解。不過,英航嘅公關畫蛇添足,臨尾加多句:「我們建議旅客在開展旅程前購買旅遊保險。」

女同事一見到呢句,就火屎都嚟埋。佢話,首先如果英航有咁講,起碼令人覺得佢哋不負責任。最弊,英航冇咁警告過佢。孫柏文作為一個極之負責任嘅傳媒工作者,當然第一時間調查(冇錯,孫柏文──Investigative Journalist)。所以,就派咗呢位女同事做卧底,假扮我嘅俏秘書,去幫我定一張要經希斯路轉機嘅英航機票。

「俏秘書」喺定票過程中,再三問佢哋,如果要經希斯路轉機,喺寄艙行李方面要留意啲乜。點知,個英航售票員只係重複又重複話:「喺希斯路唔使攞行李,喺目的地攞就得。」完全冇提及要買旅遊保險。

講真,我真心相信機場或英航,都唔想特登整唔見旅客啲行李。不過英航啲硬膠公關,不但冇平息旅客嘅反感,仲火上加油。單嘢變成工商管理學「公關」科嘅反面教材。真係唔知啲英航旅客,經過喺機艙內十幾個鐘之後,落機時會否成身膠味。

拋空輸到冇錢買餸 點算?

今晚,花旗國聯儲局議息。如無意外,應該減息。大家作為《金手指》嘅fan屎,都應該知道孫柏文除咗叫大家「一注獨贏買」白銀同中油香港(135)之外,仲叫過大家「一注獨沽賣滙豐(005)」。

如果今晚減息,銀行股、特別係對國際融資市場非常敏感嘅滙豐,就應該升。沽咗滙豐嘅fan屎,就同我一樣暫時繼續輸錢。

輸錢,大家都唔想。不過因為想賺錢,而承受風險,輸錢絕對係一個可能出現嘅結果。所以,投資界往往想發掘一啲必勝嘅投資項目。必勝嘅投資,番鬼佬叫做 arbitrage,中文翻繹成為套戥。

今時今日,大家可能會話「套戥」好容易搵。求其打開《蘋果日報》財經版,睇吓邊一間公司隻H股落後佢嘅A股就得啦。

我今日想同大家講,特區其實有個仲穩陣嘅套戥形式投資項目。大家可能會問:「咁着數?」冇錯!就係咁着數!仲要如果有人嘗試打破呢個套戥投資,就會有好多董建華式好心做壞事嘅人,出嚟幫你護航。呢個咁着數嘅套戥投資,就係如果你喺政府私有化領匯(823)之前,租咗舖位做酒樓。

偏離需求就可套戥


今時今日,任何一間酒樓嘅收費都係跟市價,即收入跟需求情況。不過,如果你喺領匯嘅商場租咗舖,咁你面對嘅租金成本就會遠比市場低。到時候,你根本毋須自己落手落腳經營酒樓,只要你外判就可以。

外判商就會以市值租金,畀錢你,你跟住交平租畀領匯就得。如果領匯想直接租畀外判商,繞過你呢個中間人,你只要搵幾個「社會運動家」番嚟。將「打壓領匯」嘅工序外判畀佢哋,佢哋就會好有效率咁安排啲撈油水政客,同埋啲貌似記者嘅「翻印新聞稿社會主義機器」出嚟反對領匯。幾開心啊!

講番輸錢。早幾個禮拜,隔籬馬經版嘅高乘駿兄話,有個賽馬日身邊朋友問佢,騎師白德民冇馬贏,係咪變咗我「白銀文」嘅大佬──「白果民」?白德民係咪「白果民」我就唔知。不過,以前我跟老竇入馬場,散場時老竇就會叫我「白果文」。「白果文」、「明燈」都係有異曲同工之用。老竇笑話,如果我已經成家立室,分分鐘每個賽馬日都輸到冇錢,要問大耳窿借錢買餸。

不過,以今日嘅融資科技,大耳窿已經冇市場。因為大家只要申請張領匯信用卡,就可以喺領匯旗下嘅街市購買「買餸現金券」。仲要九五折。所以如果你都係「白果X」,都係申請張安全啲。

英超紐卡素 怒炒贊助商

呢幾年嚟,孫柏文相信大家都留意到銀行業一個大趨勢,就係銀行啲分行越來越少。相信大家同我一樣,都可能覺得銀行特登喺度趕客,特別係啲小存戶。

其實,小存戶對銀行嘅價值,真係比二三十年前細咗。原因係銀行嘅賺錢方法,就係放債,例如借錢畀人做按揭。能夠放債,當然要吸引資金先至可以借出,以前小存戶存錢,就等如借錢畀銀行,不過去到千禧年代,銀行只要去到信貸市場,出幾張短期債券就借到錢。咁嘅融資模式,銀行就無需要再擁有龐大、昂貴嘅分行網絡。分析員非常喜愛嘅毛利率,就會膨脹。

融資模式改 分行作用減

當今世上,將呢個辦銀行模式推到極點嘅銀行,應該係前宗主國嘅Northern Rock。雖然Northern Rock都有分行網絡同小存戶,不過規模比較細。

大家都知道Northern Rock最近出事。原因就係Northern Rock借錢畀人做按揭,即係放長債,不過自己融資就倚靠發短期債券。今時今日嘅信貸危機,令Northern Rock無法再發新嘅短期債券,舊嘅短期債券又到期,要還錢又冇新錢,點算?

作為前宗主國中央銀行嘅英倫銀行Bank of England,為咗社會穩定,就借錢畀Northern Rock還啲到期債券嘅錢。希望喺短期之內,Northern Rock可以重新發短期債券。不過到今日,短期債券市場都仲喺度萎縮,「可發新債」遙遙無期。 所以,Northern Rock問英倫銀行越借越多,欠款越滾越大。Northern Rock從英倫銀行得到嘅資金額,已經可以媲美小存戶存款嘅總和。

咁搞落去,英倫銀行就會成為Northern Rock嘅唯一債主。如果有乜風吹草動,債主要變成東主,咁就非常有趣。

Northern Rock有機易主


大家如果有睇開英超足球,都應該知道紐卡素Newcastle United波衫上嘅贊助就係Northern Rock。喺不久嘅將來,如果英倫銀行由債主要變成東主,紐卡素可能要怒炒Northern Rock,換上新贊助商嘅名。


Old Sponsor



New Sponsor (thanks to immobilienblasen)


美電視劇就快冇得睇

今日,孫柏文想向大家發出警告,如果你係花旗國電視劇迷,你可能會喺12個月之內,冇新劇睇。不過講點解之前,想同大家重溫一下歷史。

特區上排出現咗一場非常激昂嘅工潮。大家都應該記得,為脆弱混凝土,建構火紅鋼鐵支架,催生一棟棟摩天大廈嘅扎鐵工人,為生計,為尊嚴,走出嚟抗爭罷工。不過我擔心,就算爭取到名義上嘅加薪,工人如果面對建築科技或製造流程嘅不斷進步,特區建築界對扎鐵工人嘅需求會繼續萎縮。如果供應唔減,實袋日薪亦只會繼續跌。

電視編劇工會醞釀大罷工


咁大家可能會問:「扎鐵工人同美國電視劇,有乜嘢關係?」對於一個21世紀人,房屋同娛樂都係必需品。不過就算兩種產品都係必須,絕對唔等於今日生產流程當中嘅中堅工人,他朝有同等嘅地位。

扎鐵工人因預製造件嘅興起,報紙執字粒員工因電腦排版嘅廣泛採用,百科全書銷售員因互聯網出現,都冇因為樓要繼續起,報紙要繼續出,小朋友要繼續抄功課,可保得住飯碗。

喺花旗國荷李活,電視編劇工會正醞釀一場大罷工。表面上係因01年決定嘅合約,編劇喺當時新興DVD嘅收入分贓覺得唔公平。今年,編劇要同啲電視台談判,決定未來互聯網出售劇集收入嘅分配,不過談判決裂。如果冇進展,啲編劇就會喺11月1日開始罷工。

而花旗國電視劇一路以嚟嘅行規,就係喺秋天開始播新一輯電視劇,劇一路播,編劇一路寫。不過如果11月1日開始,編劇封筆,今年秋天就會冇新劇播。

真人騷收視高編劇需求降

大家可能會問:「世界各國嘅電視台,都因互聯網奪去收視,電視台冇新劇播只會更加大鑊,佢哋唔會屈服於編劇嘅要求之下咩?」照常理係。不過電視台發覺,近年最高收視嘅節目,好多都係例如American Idol或Survivor嘅Reality Show,而呢啲「真人騷」,對編劇嘅需要唔大,所以電視台已經唔係好想同編劇妥協。

最弊啲電視台高層,就連對「電視」呢個概念都開始出現信心動搖。所以希望完全重新評估如何繼續搞「電視」呢門生意。《靚太唔易做》、《CSI》、《24》嘅fan屎,有心理準備啦。

Tuesday, October 30, 2007

Am in Japan

I know a lot of you left comments.

I can`t read any of them as I am in Japan right now.

I will resume posting and settling loose ends when I return on Friday.

Thanks for reading.

Saturday, October 27, 2007

買Leona 抽阿里巴巴輸錢



尋日,我寫左篇題為「打死唔抽阿里巴巴」嘅文章。

咁《這雙手雖然小》嘅 Leona Wong 就留言話...

leona said...

多謝pakman!
我思前想後了好久該不該抽阿里巴巴,遲遲下不了決定。
今天看了你的文章後,決定──去馬!

剛好趕得上截飛。吁。



-----------------------------------------

Well. We are having a bet.

I welcome anybody else to join to either bet on me or her.

I am betting simply,

Leona Wong will LOSE money on her application for shares of Alibaba 1688's IPO.

Thats the bet.

The Stakes are, if I win...

Leona Wong will change the name of her blog for one week beginning from the day of listing to 《這個blog雖然鱔》.

Leona, feel free to tell me what you want if you win.

So far, individuals who has bet on me to win.

1. Martin Oei

So far, individuals who has bet on Leona to win.

1. 9gel

Please feel free to leave your bets on the comments page.

Friday, October 26, 2007

打死唔抽阿里巴巴




呢幾日,孫柏文重複又重複咁睇,封面用咗「盲眼橙色」嘅阿里巴巴(1688)招股書。係咁睇嘅原因,就係想領略到究竟做乜生意,可以上市時市盈率超過100倍。我簡直當咗本招股書為驚世秘笈。點知,睇咗四次都完全冇頭緒。簡直係太深、太難明,就連葵花寶典,就算未能完全掌握,都起碼會知欲練神功,必先自宮…唔通…馬主席,為咗100倍PE,實在太大犧牲啦!

講真,有邊個人搞公司,改名時可以連大盜都唔想做,嫌唔夠勁,以個打劫大盜嘅阿里巴巴命名?講多次,阿里巴巴真係100倍上市!俗語有云:「好佬怕爛佬,爛佬就怕潑婦。」今時今日,我哋呢班日日虎視眈眈,想打劫祖國散戶嘅特區大盜,一定要銘記:「散戶怕大盜,大盜就怕阿里巴巴!」100倍哦!

百蚊先買到1蚊利潤

好。入正題。今日,想同大家講點解我唔會抽阿里巴巴。每次有間公司上市進行招股活動,簡單啲嚟講,就係原先股東,想搵啲外邊人做拍檔一齊做生意。如果想入股,大家第一件事多數都會睇睇一股值幾多錢。阿里巴巴,就係間你要用超過100元先至買到1元利潤嘅人。即就算公司盈利完全派息,都係一厘息都冇。大家一定會話:「盈利增長強勁咪得囉!」啱。

再講,大家第二件事都會想知,點解公司股東想搵啲外邊人拍檔。有時,可能原先股東覺得生意已穩定,想追求刺激同更高回報,賣自己手上嘅舊股畀啲追求穩定回報嘅外邊人;又或者原先股東覺得生意其實可以大得多,所以發行新股畀啲追求刺激嘅外邊人,集資發大生意嚟搞。

如增長勁何解賣舊股

所以,就出現咗Alibaba's Paradox。如果阿里巴巴未來增長唔勁,又何德何能市盈率超過100倍上市?不過如果未來增長咁勁,又點解主要賣舊股?未解決呢個Paradox之前,又會有幾多機構投資者上市日接散戶貨?

有啲人話:「思捷(330)邢先生夠賣舊股,咪一樣升!」咁我又要反問:「究竟有幾多人,好似邢生或愛德華八世咁?不愛江山,愛美人。」記得為100倍,馬主席犧牲咗。

最後,我知道會有好多已借爆孖展抽阿里巴巴嘅人,用文字喺網上打我。不過就算打死,都唔抽阿里巴巴!

Thursday, October 25, 2007

一注獨贏買中油香港

建議買入:中油香港(135)

目標價:HK$8.05

年期:12個月

當年,孫柏文仲係石油股分析員嘅時候,公司要我睇實嘅石油股有三隻,就係中石油(857)、中石化(386)、中海油(883)。不過,如果有客直接問:「咁你最喜愛嘅石油股係邊隻?」我永遠都會笑一笑,跟住答:「公司冇叫我分析嘅中油香港(135)。」

因為公司嘅客,一般炒咗好耐股,佢哋聽到「中油香港」呢幾個字,有時會忍唔住話:「中國神油!」中油香港得到呢個花名嘅原因,係因為喺97年,當時香港未有三大石油股。當年「中國石油」係講緊中油香港。咁點解叫做「神油」?

叫得神油梗係勁

因為當年祖國政府,喺好短時間之內相繼注入兩塊油田。當年sell中油香港呢種紅籌,永遠都係「阿公明益香港人,人民資產賤價注入」概念。咁有兩次注資產行動,就一定有第三、第四次,直到將全中國嘅石油業注入去!有咁嘅概念支持,中油香港嘅股價,就由低於0.2元,炒到97年過6元一股。升幅超過20倍,仲唔係神油?最後紅籌泡沫爆破,中油香港跌到0.5元。

勢似江銅破頂升

不過呢十年嚟,中油香港儲埋儲埋好多世界唔同地方邊緣化、騎呢嘅油田。呢啲油田,往往有較高嘅採油成本,同油嘅質素又比較差。因而提煉成本會高啲,賣價又要有個定額折扣。



大家可能會問:「成本又高啲,賣油又要畀定額折扣。咁又叫我買?」叫一注獨贏嘅原因,就係因我相信濫發鈔票之下,油價會繼續升。其實,油股基本上只係「買油價升」嘅衍生工具,當一家油公司嘅採油成本高、要提供定額折扣,就只不過等於呢隻call輪嘅行使價比較高。

只要你同我一樣信油價會升,中油香港可以帶嚟嘅槓桿效應就會更大。年初,江銅(358)經過多年橫行之後,破頂大升。中油香港已經呈現同一景象,所以一注獨贏買中油香港!



---------------------------------

Today's price action of中油香港 135. Proves one thing. People read my stuff at lunch. HahahAHhA


Apple季度業績點睇

噚日凌晨時分,花旗國蘋果Apple Inc出第四季度業績。好勁,盈利升67%,成隻大陸國企咁。盈利同收入主要來源,係iPod、電腦Mac機繼續熱賣。不過,對股東最厲害嘅,一定係出名一向提供保守業績預測嘅蘋果總裁Steve Jobs,居然大力踢高08年第一季度盈利預測。唔怪得蘋果嘅股價喺出業績後數秒鐘之內飆升。

iPhone賣咗110萬

當然,買咗蘋果股票嘅fan屎,最信Jobs「遠景」嘅投資者,喺今次業績報告中最留意嘅產品銷售情況,就一定係iPhone手機。iPhone喺6月尾推出,第四季度就係第一次有全季銷售報告。至於iPhone,就賣咗110萬部,好勁。

喺iPhone推出初期,有啲比較樂觀嘅分析員,仲話可以好快一年賣超過1000萬部。孫柏文覺得絕對可能。

其實,iPhone面世以嚟,我只係聽過兩個人,真正令我覺得iPhone有啲隱憂。第一個就係位叫做Maddox嘅花旗國blogger。大家如果對佢嘅見解有興趣,可以google吓「Maddox」呢個字,第一個搜尋結果就係佢嘅網站。相信可以啓發大家。

第二個講出理據,令我覺得iPhone有啲隱憂嘅,就係早排我有幸同佢傾偈嘅流動電訊業前輩。佢嘅工作就係Director of Future Services,即係要研究流動電訊未來服務。原先,一聽到佢嘅工作範圍時,我真係好想問問係咪研究緊一種可以殖入十幾歲年輕人身體嘅晶片。

呢隻晶片,將會24小時量度血液中,酒精、尼古丁或其他化學物質嘅濃度。晶片一旦發現以上物質,就會即時寄出短訊畀該位年輕人嘅家長。肯定熱賣!不過,我唔夠膽問。

死穴不能單手操作

講番iPhone。前輩話iPhone嘅隱憂係不能單手操作。特別係短訊,用戶好難用一隻手打短訊。喺歐洲、尤其是意大利,一定會係個問題。其實,今時今日每年全球售出超過10億部手機。iPhone要一年賣1000萬部,都只不過有1%市場佔有率。所以,iPhone就算唔解決不能單手打短訊嘅問題,未來呢幾年嘅銷售量,都應該節節上升。Apple Inc繼續有運行。

Tuesday, October 23, 2007

越搞托市 越未見底

今日,首先要出個更正啓事。大家都知道,花旗國財長Hank Paulson呢排忙緊搞個叫MLEC嘅「接收冇交易、冇市價債券」超級基金。基金現在喺集資階段,籌集用嚟買貨嘅錢。花旗、美銀、JP Morgan應承會參與。

上周末,意大利央行行長Mario Draghi話,Fidelity同債王Bill Gross管理嘅債券基金PIMCO都會搞埋一份。所以噚日孫柏文話Bill Gross有份。不過噚晚,PIMCO發聲明話「不會參與」。

等發掘自己市價

如果要我分析,意國央行行長應該唔係存心老點。只不過事態發展立立亂,所以先至流言滿天飛。呢個MLEC十畫都冇一撇,嗰一撇仲要係用鉛筆寫,分分鐘擦埋。

講真,呢個MLEC我上個禮拜已經鬧過,Bill Gross亦話係lame(廢)。噚日,批評「用MLEC救市」建議又多一個人。佢就係前聯儲局局長格林斯潘。佢話,呢個MLEC接收啲冇交易、冇市價嘅債券,只會拖慢 price discovery。

Price discovery係乜?就係一樣資產發掘自己嘅市價。例如,啲銀行手上有好多票面值100元嘅債券。因為冇人出價買,所以就冇交易、冇市價。格林斯潘想見到啲銀行掛牌放盤,100元冇人買,就試90、80、70餘此類推。如果要去到1元先有人肯買,就算數。起碼啲債券搵到市價。

100元跌到1元咪好大鑊?係。資不抵債嘅投資機構就會執笠,銀行需要大規模撇賬,股價一定大跌特跌。不過,市場就可以見底復活,因為有番透明度,所以財長越搞托市,債市越未見底。相信格林斯潘同Paulson講:「Hank,this plan is so hard plastic。」

煙草商人鬧醫生

不過,格林斯潘批評呢個建議,真係非常諷刺。財長搞MLEC,都係想醫番好因為信貸泡沫爆破,衍生出嚟嘅「債市停頓」問題。大家要問問自己,呢幾年信貸泡沫點嚟?咪就係格林斯潘嘅聯儲局,當年瘋狂減息,濫發鈔票而成。

格林斯潘話MLEC阻住債市復活,話債市停頓問題唔係咁醫。就好似一個前煙草商人,走去鬧一個醫生,話:「肺癌唔係咁醫o架!」成單嘢真係硬膠。

Monday, October 22, 2007

美股夢醒 減息照死

上個禮拜五,花旗國道指跌咗三百幾點,今日特區股市開市時應該會跌得幾甘。當然,好多股民都期望祖國股市會繼續升,托吓我哋,因為可以繼續炒「A、H股差價消失概念」。不過恐怕事與願違。孫柏文曾經講過,A、H股差價要完全消失,一定要A、H股互相流通──即係可以攞H股返上海當A股咁賣。

大家可能話:「上個禮拜咪已經話會研究互相流通囉!差價消失概念應該越嚟越強!」係。全中!不過最弊呢個簡單邏輯,連祖國股民都知。差價收縮,對於特區股民等於H股升到A股嘅股價;對於祖國股民嚟講,分分鐘可能係A股跌到落H股嘅股價。

沽壓肯定浪接浪

不過今日市況係點,都好難抵禦花旗國今晚將會有嘅跌勢。重型機械製造商 Caterpillar 喺禮拜五嗰句:「今時今日花旗國貨車運輸業,係50年嚟最差。」市場一定未完全消化。今個禮拜將會有好多上市公司提供(即調低)未來盈利預測,分析員只要將盈利預測 plug落條「估大市走勢」方程式度,沽壓肯定一浪接一浪。樓市泡沫爆破就係咁,我哋特區人民最清楚。上個禮拜五可能就係花旗國股民夢醒日,知道減息照死。

06年7月,我寫過篇題為「花旗國樓市將慘過八萬五」嘅文。大家繼續放長雙眼,睇吓會唔會靈驗。

再講,早排8月17 日,我寫過篇「泡沫爆破後坐監大熱門」嘅文。因為每一次喺花旗國有泡沫爆破,花旗國嘅民粹政客,一定會搵啲「高調,不過無罪人士」嚟祭祭旗、做做 show。上次科網泡沫,就搵咗教人煮餸嘅 Martha Stewart。咁今次樓市爆破,我就喺篇文預測最有機會出事,就會係花旗國最大按揭中介公司Countrywide Financial行政總裁Mozilo。都係嗰句,大家繼續放長雙眼,睇吓會唔會靈驗。

花旗銀行家大鑊

最後,上個禮拜花旗國政府已經「溫馨呼籲」啲銀行,搞個叫MLEC嘅「接收冇交易、冇市價債券」超級基金。一個債王Bill Gross雖然有份參加,不過照樣評為「廢柴」嘅建議,啲銀行睇嚟有排煩。喺八萬五最黑暗嘅日子,特區業主買過好多鑊同好多炭。孫柏文相信鑊同炭喺花旗國將會熱賣,不過買嘅唔會係啲業主,而係啲銀行家。

Friday, October 19, 2007

任總還拖!

3 days ago on 16th of October, I wrote a piece criticizing the establishment of MLEC by the US Treasury Dept.

In the piece titled 銀行玩連舟 焗央行相救, the first two paragraphs were...

"... 當今世上,最有計劃經濟味道,常出現政府指導啲單位點做生意嘅行業,一定係最能代表「資本主義」嘅銀行業。特區都係咁,唔覺得諷刺咩?

大家都知道銀行係一個中間人,將存戶嘅錢,借畀有需要嘅人,從中賺取息差。情況有如麪包店買麪粉,跟住焗麪包賣。銀行只不過係另一門生意。不過政府唔會同麪包店話一定要保留8%嘅麪粉,作為後備,而銀行存戶嘅錢政府就會。..."



Lo and behold 2 days later on the 18th of October, 金融管理局總裁任志剛 Joseph Yam published a piece titled 銀行是否「與別不同」

Which first sentence was, "銀行業是否與其他行業一樣,抑或是「與別不同」呢?"



After reading that sentence, I was like OMG!!!任總還拖!

I am as surprised as anyone to find out that 任總 is also《金手指》fan 屎! hahahahahaha

Would like to thank vc for providing the tip.

Thursday, October 18, 2007

青姐 fans club update


We now have 300 members!

People always attack 青姐 and say she is too harsh on investors.

I say we stand united behind her. For she is doing a great service to the retail investors in Hong Kong. We need her continued presence. Get people to join. The more people supporting 青姐 means more investors getting smarter!

胡孟青 青姐 fans club (on facebook) rocks!



Wednesday, October 17, 2007

Heathrow's Business Model


上個禮拜,地鐵(066)股東通過同九鐵合併嘅議案。由提出到通過,一路都受到股壇長毛David Webb嘅反對。反對嘅原因,就係地鐵如果想平價攞九鐵嘅資產,政府就要攞番地鐵控制票價嘅權利。Webb兄擔心,地鐵載客服務會冇錢賺,分分鐘仲要蝕。

雖然,孫柏文都反對政府攞番控制票價嘅權利,不過今日想勸Webb兄唔好唔開心。理由係,地鐵嘅載客服務一路都冇乜錢賺,賺錢都係靠發展地產。如果你問我,地鐵根本冇心喺載客服務賺錢,佢哋嘅business model,根本只係利用「有得搭地鐵」呢個賣點,去推銷單位。

掛羊頭賣狗肉


人哋起樓,只會有gym、商場、泳池等配套設施。地鐵起樓,就包埋鐵路服務,問你服未?計我話,地鐵樓盤收嘅管理費,應該加埋搭地鐵嘅車費。

其實,世界上除咗特區地鐵「掛羊頭賣狗肉」,做交通生意為名,做其他嘢為實之外,仲有其他單位都係咁。今日,想同大家分享倫敦Heathrow希斯路機場嘅 business model。令我想寫嘅原因,係因有位港聞版編輯同事,剛從倫敦經希斯路返港,點知航空公司唔見咗佢啲行李。佢想我喺《金手指》寫衰間航空公司,我同佢講:「大姐,我唔係投訴版喎。」

不過,因為佢始終都係個單身女同事,所以我都有查個究竟。原來,根據投訴版嘅同事話,呢排從希斯路起飛嘅乘客,好多唔見行李,一班飛機可以過百單。原本聽到呢個消息,只覺得可惜。不過,一諗就發覺,希斯路機場嘅管理層,只係將business model發揮得淋漓盡致,所以特登唔見旅客嘅行李。

點解?大家唔好以為希斯路機場,係靠飛機升降收費、旅客費等賺錢。其實,希斯路賺錢嘅方法,係將機場變成一個好大嘅購物中心,做地主放租。收租賺到錢,可以補貼飛機升降費。升降費平,就會引嚟更多航空公司同乘客,人流再增,租就可以越貴。

咁點解要特登唔見旅客嘅行李?因為正當旅客發覺唔可以將行李存倉,佢哋就會選擇將乜嘢都手提。大家記得,乜嘢都手提會好辛苦。手提嘢嘅時間越短越好。大家分分鐘會喺倫敦行街時諗:「現在買,跟住攞嚟攞去會好攰,橫掂都要手提,都係去到機場先至買着數。仲可以慳番啲VAT。」家大家知道點解飛希斯路會唔見行李啦!

------------------------------

PS. Thats also why there are so many delays and they make you arrive so early! hahahahah Force you to stay in the shopping mall. How's that for captive audience.

Tuesday, October 16, 2007

銀行玩連舟 焗央行相救

當今世上,最有計劃經濟味道,常出現政府指導啲單位點做生意嘅行業,一定係最能代表「資本主義」嘅銀行業。特區都係咁,唔覺得諷刺咩?

大家都知道銀行係一個中間人,將存戶嘅錢,借畀有需要嘅人,從中賺取息差。情況有如麪包店買麪粉,跟住焗麪包賣。銀行只不過係另一門生意。不過政府唔會同麪包店話一定要保留8%嘅麪粉,作為後備,而銀行存戶嘅錢政府就會。

SIV走法律罅

當政府粗暴介入銀行運作,銀行嘅反應當然係細心研究政府啲規定,跟住搵「法律罅」去走。近年,啲國際銀行就發明咗一樣叫做SIV嘅嘢。

SIV係乜?就係銀行面對政府定下來嘅貸款上限,發明出嚟去繞過上限嘅工具。一間銀行收存戶錢,跟住放數,兩步都會喺銀行賬簿有紀錄。啲銀行知道政府官員會查賬簿,所以就將收存戶錢同放數嘅活動,畀咗由銀行成立、不過賬面上同銀行無關嘅SIV做。

大家可能會問:「存戶邊度會信呢啲SIV,存錢入去?」問得好!存戶信呢啲SIV,因為好多時候成立佢嘅銀行,會全面保證存戶嘅錢。

大家可能會再問:「咁同銀行自己做有乜分別?點解要畫蛇添足?」原因係銀行代SIV提供畀存戶嘅保證,賬簿冇紀錄,官員自然就唔使理。呢啲SIV就可以進行好多放數嘅活動,佢哋就借咗好多畀人做次按。孫柏文隻「愛股」滙豐都有個200億美元嘅SIV。

大家相信會話:「呢啲SIV咁危險,如果政府選擇介入銀行運作,應該快快手手禁止SIV嘅存在。」我同意,不過最弊花旗國政府居然想搞個叫做 SMLEC 嘅「超級SIV」。點超級法?呢個SIV唔會得一間銀行做保證,至少會有花旗、美銀、JP Morgan聯手保證,大玩鐵索連舟。聽聞仲想搵埋巴克萊同滙豐。

聯手保證攬住死

為乜搞個超級SIV?今時今日,好多問題債券冇買賣、成交。所以就搞個超級SIV去接貨。咁啲貨唔掂點算?擔保個超級SIV嘅銀行咪一齊出事囉。

咁危險點解啲銀行又想搞?

因為大家要記得,如果有人借100萬還唔到,就係嗰個人嘅問題;
如果有人借10億還唔到,就係銀行嘅問題;
如果有人借1000億還唔到,就係中央銀行嘅問題。

所以大家明白點解啲銀行要有咁大、搞咁大。全因想迫央行出手相救。


Monday, October 15, 2007

My response to 曾特首's comments on Friday

Our Chief Executive Sir Donald Tsang was interviewed by RTHK on his policy address. The following questions and answers were about our constitutional reforms between the host of the show and our Chief Executive.

… … … … … … … … … … … …

Host :

I was struck by one phrase at the end of the policy address, towards the end of the conclusion, you say, we promote democratic development without compromising social stability or government efficiency, that kind of implies that democratic development does compromise social stability or government efficiency?

… … … … … … … … … … … …

Sir Donald Tsang :

It can, it can, if we go to the extreme, people go to the extreme, and you have a cultural revolution, for instance, in China. When people take everything into their hands, then you cannot govern the place.

… … … … … … … … … … … …

Host :

But Cultural Revolution wasn't really an extreme example of democracy.

… … … … … … … … … … … …

Sir Donald Tsang :

What is it? People taking power into their own hands! Now, this is what it means by democracy, if you take it to the full swing. In other democracies, even if you have an elected person, then you overturn the policy in California, for instance, you have initiative number, number, number what, then you overturn policy taken by the government, that's not necessarily conducive to efficient government.

… … … … … … … … … … … …

特首講英文 番書仔繙譯

如果「曾特首」(2005)係隻股票,佢經過上禮拜初施政報告大幅上揚後,喺禮拜五股價狂瀉。原因,相信大家都知,曾特首嗰日上過番文電台,講過嘢。不過可能係番文,好多人聽完,完全唔明,更加唔知點解要講。

今日,孫柏文想同特首曾蔭權講:「全特區得我明你想講乜。」

大家可能會話:「你明因你係番書仔。」大家啱得一半,因為通街都有番書仔。其實,得我明特首嘅原因,係因為特區得兩個「政治家」。一個就係曾蔭權,一個就係我(當年參選立法會,有咁樣叫過自己),所以得我明。

作為一個「政治家」,一個社會裏面嘅「政府」同其他機構唔同嘅地方,就係「政府」係唯一一個機構,可以強迫市民,做啲佢哋唔會自願做嘅嘢。即係有monopoly power of coercion。例如,如果我迫你畀錢我,就叫做打劫,「政府」迫你就叫做抽稅。

如果一個政府唔能夠行使強迫市民嘅專利權,例如抽你稅,你唔畀都冇事。
或者唔能夠保護強迫市民嘅專利權,例如我收陀地,你唔畀就有事。
對一個政治家嚟講,嗰個政府就係failed state。阿富汗就係個好例子,抽稅冇人畀,通過條「不可謀殺」嘅法例,冇人遵守,不過又拉唔到人。個例子係咪好extreme?係。不過特首嗰日係講 extreme。

政府失去強迫專利權

咁點解要無端端講文革?因為當時祖國政府失去咗強迫市民嘅專利權,好多市民一叫自己做「紅衞兵」,就可以到處殺人。政府頓然喪失殺人嘅專利權。甚至去到政府不能阻止市民殺其他人。個例子係咪好extreme?係。不過特首嗰日係講 extreme。無端端提文革,被人批鬥都係好自然嘅事。

咁點解曾特首又無端端講花旗國加州?用佢做個「極端」嘅例子?我相信特首講緊03年嘅加州。當年,就連《經濟學人》都寫咗篇題為「Is the Golden State governable?」嘅文,因加州嘅財政完全失控。篇文話,加州州政府嘅代議政制representative democracy制度,面臨崩潰,因為佢哋用嘅direct democracy制度出問題。作個比喻,就有如今日特區市民進行公投,決定立法將彌敦道由三線變四線。不過點收樓、路點起等等,由行政機關搞掂。

如果咁「極端」,又唔見加州當時陸沉?呢個就係政治家會諗嘅問題。加州市民面對嘅政府,有聯邦政府、州政府同市政府。因政府嘅強迫專利權分散,所以就算有一環完全崩潰,都唔會陸沉。《經濟學人》當時話如果加州係個國家,IMF一早進駐。

解釋完畀大家聽之後,我想問特首:「你知唔知我哋要嘅係代議政制全面普選,要嘅係立法會同行政長官普選。加州嘅公投制度,關乜春事?」最後,相信曾特首你睇完呢篇文章之後,一定覺得孫柏文係副局長嘅材料。不過,我相信你唔會搵我。因為,始終一山不能藏二虎,一代不能容兩個政治家!這就是歷史的殘酷定律。


Friday, October 12, 2007

中環可陸沉 恒指照新高

噚日,孫柏文同好多冇嘢做嘅「雙失」《金手指》fan屎一樣,晏晝乖乖哋睇電視。點知,四個免費電視台,都播緊特首曾蔭權去立法會答問大會。

不過噚日睇電視,我總覺得有啲地方唔多妥。一個立法會答問大會直播,點解電視畫面會有即時恒指走勢。20世紀嘅施政報告都話啫,因為特區地產商同本地銀行,可能會被影響,所以會左右恒指,先至要即時報道恒指走勢。

今時今日,就算曾特首話:「因為有外星人襲擊,中環地區已經陸沉。」只要港交所(388)電腦冇事,都係繼續會another day,another record high。

點解仲係播恒指嘅

幾年前,記得同我堂哥討論過恒指升跌,究竟可唔可以反映特區經濟情況。當時嘅結論都已經係唔得。所以噚日見到電視畫面會有即時恒指走勢,真係覺得唔多妥。

雖然,曾特首嘅施政報告,對股市提供利好因素嘅能力,比較低。不過,我哋日日炒嘅股市,就一定係政策市,只係祖國政策咁解。所以,如果話直播施政報告,需要有即時恒指走勢,倒不如祖國「政治全運會」嘅十七大會議直播時,同一畫面有即時恒指、H指走勢。

最驚就係,隻字不提「資金自由行」。唔講,即係冇咗啦。到時,真係可以一日跌五六千點。

做乜借錢畀大學生

最後,前晚放工,搭利世民順風車。途中聽到收音機話,今時今日好多本地大學生負債纍纍,借咗好多錢去搞搞震。收音機嘅主持人、嘉賓,就討論究竟政府係咪唔夠資助,定係啲大學生太大使。

我就同利世民講:「啲大學生肯借錢,都係一件好事。因為反映佢哋對未來收入好有信心。」點知,利世民話:「佢哋好似係借錢去炒股,搵快錢。」我就諗一諗答:「咁都唔算係壞事。就算大學生對自己未來收入冇信心,起碼對啲上市公司嘅未來收入仲有信心。」

Thursday, October 11, 2007

Baby, Hong Kong is back!

噚日,財政司司長曾蔭權發表佢嘅財政預算案,sorry I mean特首曾蔭權發表施政報告。今日,孫柏文字數唔多,所以即刻入題。

首先,講tone。我只可以話句:「Baby,Hong Kong is back!」減稅、減少硬膠政策、大大聲重新宣佈,已經撥咗款嘅項目去敷衍啲大政府信徒,簡直好似返番去97年前嘅世界。

減稅。好!仲要有1%咁多。非常好!減稅比退稅好,原因係退稅唔會改變香港人對未來部署嘅方法,不過永久性減稅會。現在,我哋就有誘因去真真正正自我增值。

有人話,施政報告太似財政預算案,所以係錯,孫柏文同意,真係好似預算案,不過覺得冇所謂。盡快提供誘因,去自我增值,好過遲。如果到出年預算案嘅形式,同噚日施政報告差唔多,就當係政府每年同大家update吓政策兩次算,上市公司都有中期業績啦。

講「計劃競爭法」。大家作為《金手指》嘅fan屎,都應該知道,本欄向來反對計劃競爭法。所以見到曾特首話,計劃競爭法會害到中小企,本人都開心。因為證明曾特首都有睇《金手指》。

講教育。曾特首喺呢一環,凸顯政治家嘅風範。佢深知特區中產同富貴階級,完全明白硬性規定每班人數,褫奪學校管理彈性嘅「小班教學」,只會害死啲小朋友。所以大力支持推動國際學校,令中產富貴嘅下一代有出路。亦同時提吓「小班教學」呢四隻字,去安撫嗰啲代表龐大既得利益集團嘅功能組別民粹議員。

撥亂反正百花齊放


講畀啲外國年輕人來港讀書、做嘢,即移民政策。我話非常好!曾特首撥亂反正,令特區政府97年後第一次採納百花齊放、自發秩序式,而唔係官僚揀人嘅移民政策。

最令我敬佩嘅係,亦諗過點樣去甄別「心中有團火」嘅新移民。我曾經講過,要啲移民擺低按金,去反映佢哋幾想做香港一分子。曾特首就要佢哋力讀書、專心考試、攞好成績,去表達佢哋對想做香港一分子嘅真誠。如果要我揀,呢個能夠捕捉到「抵壘政策」裏面,甄別「心中有團火」新移民能力嘅新措施,就係我最鍾意嘅。估唔到,曾特首除咗有睇《金手指》,仲要同大家一樣,係fan屎!

當然,曾特首冇講點樣對付,由華南地區吹來嘅空氣污染物,係有美中不足。最後,特首冇講話要增持港交所(388),如果你係股東,最驚就係「冇講,『增持』政策已經唔存在啦!」

Discount tickets to an investment seminar with me

Boys and girls.

I just remembered today that I was given the power to offer discounted tickets to an investment seminar Apple Daily is co hosting with forex trading service company CMC Markets. This Saturday the 13th of October 2007.

There will be I, and also my very esteemed elder 黃國英.

If you want to come and are interested in the discount tickets. Send me an email over - pie at appledaily.com

青姐 fans club update

Ok.

Here is a video I filmed today, of 青姐 expressing her opinions on the formation of her fans club.

If you are a fan and has yet to join. JOIN 青姐 FANS CLUB.

And recruit your friends too to become members!!


Wednesday, October 10, 2007

上Facebook 學英文

一向以嚟,孫柏文對於啲被批評英文講得唔好,或講英文口音「唔正」嘅人,都覺得冇乜所謂,甚至好支持佢哋。起碼夠膽講、用英文,已經值得敬佩。

講真,用語言去溝通,基本上講到自己想講嘅嘢,對方又明就得啦。我有咁樣嘅價值觀,可能因自己曾經讀過港島區某間「國際學店」,全間學校都係鬼仔鬼妹。入學時,全校千幾個學生當中,數埋都冇十個廿個同學,母語係廣東話。

當年,可能因啲鬼仔鬼妹同本地人嘅交流比較少,所以成日都笑嗰啲英文講得唔好,或講英文有口音嘅人。我就係其中一個。體諒、支持今日英文講得唔好嘅人,等佢哋放膽講多啲,英文亦會自自然然越來越好。

有求必應港女

不過,孫柏文今日真係想提醒吓,一啲英文可能需要糾正嘅人,因為佢哋可能用錯字。呢排,網上有個叫做Facebook嘅「交朋友」網站,吸引咗好多人參加。每一個參加嘅人,都可以將自己嘅資料公之於世,例如個名、性別、出生日期等等。

不過,因為Facebook只得英文版,參加者因此可能用錯字。今日我要提醒吓嘅,就係叫做「Looking for」一欄。

「Looking for」點解?就係參加者,表示自己搵緊邊一種「關係」。

當中嘅選擇有Friendship(做朋友)、Dating(拍散拖)、A Relationship(嚟真)、Random play(啱feel就嚟)同埋Whatever I can get(乜嘢都得)。

Whatever I can get點用?
孫柏文問:「食飯好唔好?」
女答:「Whatever I can get。」
孫:「拍拖呢?」
女答:「Whatever I can get。」
孫:「大被同眠咁又點?」
女答:「Whatever I can get。」
孫:「Good good。」

句句no又點?


點解今日要提醒吓嘅原因,就係孫柏文發現,好多港女揀咗Whatever I can get。次數頻密到,同自己現實經驗完全脫節。

有啲喺「關係狀況」欄仲顯示「已婚」。講真,開放態度唔係唔可以接受,只不過如果令其他人會錯意,發生一啲不必要嘅誤會,咁就真係唔好。大家要記得,要成功溝通,係要講到自己想講嘅嘢,同埋,對方都要明。