Monday, March 31, 2008

杯葛?有種就玩大啲!

一個地方發生緊乜嘢事,如果一個人不在場,要知,就只能依靠從嗰個地方流出嚟嘅消息、資訊。以前,消息、資訊被龐大傳媒機構壟斷,不論私人(CNN、TVB)或者公家(BBC、RTHK、人民日報)嘅傳媒機構,都可以從自己嘅角度報道。

此外,仲因版面、大氣電波有限,要深入知道一個地方發生緊乜事,就難上加難。龐大傳媒機構話嘅版本,就變成「事實」。大家都知,西藏有事發生。不過究竟發生乜嘢事,有冇人可以話你知?講完你又會100%相信?

互聯網拉近事實

一陣時有德國電視台,攞啲尼泊爾警察鎮壓片段出嚟播,話係西藏。

跟住就有我國政府喺倫敦嘅大使館,發放暴徒照片畀BBC等傳媒機構。點知照片一出街,圖中一位持有大關刀嘅「暴徒」,被人認出係西藏啲差佬。互聯網真係令大家對事實嘅距離拉近咗。事實就係乜嘢事都唔係咁簡單。

不過問題就係,如果事實「唔係咁簡單」,不過你又要有反應,你都幾難搞。如果你係一個西方國家嘅領導人,面對呢個情況,你又會有乜反應?

今時今日,就有好多人話要懲罰我國,話最好就係杯葛北京奧運。法國總統話會諗吓去唔去睇開幕,而德國總理就已經話唔去,西洋傳媒話此舉乃是「杯葛」開幕典禮。正當對應否杯葛議論紛紛時,孫柏文聽到句一針見血嘅說話。講嘅人係花旗國國務卿賴斯 Condoleezza Rice。

暗寸德法領導人


賴斯話:「杯葛奧運可以做到啲乜?我唔覺得當年杯葛80(莫斯科)奧運好有效囉。我甚至覺得係低能(feckless)。佢哋(蘇聯)揮軍攻打阿富汗,你還拖最勁嗰招就係杯葛奧運?就係唔畀啲苦練多年嘅運動員去比賽?唔好玩啦。」

講真,賴斯擺到明寸德國總理、法國總統,話佢哋如果有料到,就一早學花旗國對伊拉克一樣,派軍入西藏。杯葛?有種就玩大啲啦!

我覺得賴斯都有暗寸埋祖國啲國家領導人。賴斯心裏面一定問:「係咪真係咁反對分裂先?你哋已經知邊個係幕後主謀。仲唔做嘢?如果畀布殊、切尼做中國國家主席同總理,就算未隊冧達賴喇嘛,都已拉咗去關塔那摩基地Guantanamo Bay露天拜神啦!」

Sunday, March 30, 2008

花旗國銀行的「冇事」煙幕

呢幾日,股市好似平穩好多。起碼比上個禮拜刺激大減。如果大家仲記得3月中花旗國傳出Bear Stearns(貝爾斯登)唔掂,仲因為會火燒連環船,迫到聯儲局喺花旗國上個禮拜一開市前,搞掂Bear Stearns嘅負債。

最後方案,就係摩根大通接管咗Bear Stearns嘅營運。聯儲局就出290億美元接管Bear Stearns嘅負債。

之後,大家都估再有邊間投資銀行會出事。而負債情況最似Bear Stearns嘅投資銀行,就係雷曼兄弟 Lehman Brothers,所以啲人就估佢係下一個。

點知,雷曼兄弟就喺禮拜二宣佈業績,居然上季度賺4億幾美元!全球股市嘅跌勢亦暫時停止。

雷曼兄弟咁叻嘅原因,好多都覺得因為市況轉穩。如果你咁都信,咁你就俾花旗國銀行嘅會計制度呃晒。

舊年,孫柏文曾經解釋過一種叫做negative amortization嘅銀行「收入」,起碼會計上當係「收入」。

上個禮拜,金管局總裁任志剛話銀行放債啲人唔可以淨係還息唔還本。大家都知道,還息唔還本,即係供款幾年之後,本金冇變。以前花旗國啲銀行仲利害,啲人做按揭首幾年連息都唔使還晒,即係供款幾年之後,本金會增大。

Neg-am「收入」,就係本金增大咗嘅部份。借錢嗰日,本金10萬,之後增大到11萬,嗰1萬嘅分別就係Neg-am「收入」。不但係充滿「水份」嘅收入,仲要如果出現斷供潮,以後盈利打擊仲大。舊年年中未出事時,已有好多銀行一旦扣除Neg-am「收入」,就會出現虧損。

債價跌負債減收入增

原來,又有一種更離譜嘅銀行「收入」。

大家都知道,喺新嘅會計制度之下,資產估值如有市價就跟市價計。

原來負債都係一樣,投資銀行發債券借錢,啲債券有市價。一旦市場覺得啲投資銀行風險高咗,啲債券價格就會下跌。

啲債券價格下跌,原來喺會計制度上,令負債下跌。負債跌咗嘅部份,就可以當係「收入」!就係因雷曼兄弟發嘅債,因市場對佢嘅信心大跌,所以價格下跌。因而令雷曼兄弟從呢個途徑錄得6億美元嘅「收入」。

大家要記得,佢哋只係賺咗4億幾。好彩,市場對雷曼兄弟長遠還款能力冇信心!越冇信心越賺錢!

Thursday, March 27, 2008

欠薪基金製造更多欠薪

噚日,差佬又拉人。今次拉嘅人,就係一個拖欠員工薪金嘅老闆。睇電視新聞報道,就話呢個開酒樓嘅老闆,涉嫌經常無端端將酒樓執笠,幾日之後,就會用唔同嘅名,開番間酒樓,重新營業。

而每一次酒樓「結業」,個老闆必定會拖欠員工薪金。不過可能因為個老闆精神分裂,仲以為自己係社工或區議員,所以見到被拖欠薪金嘅員工,就「輔導」佢哋,教佢哋問政府攞番啲欠薪。

幫政府打工?


大家可能會問:「啲員工又唔係幫政府打工,又唔係政府欠佢哋薪水,點解問政府攞?」

原來,政府搞咗個叫做「破產欠薪保障基金」。原意就係一旦有公司倒閉,有員工被拖欠薪金,呢個基金就會根據條款賠畀啲員工。

噚日睇電視,就發覺一個怪現象。電視台完全搵唔到員工訪問,佢哋唔肯出鏡。拖欠薪金喎!點都要出吓聲!大家可能會話佢哋驚炒魷魚,所以先至唔出聲,呢個結論我都同意。不過又為大家提供一條思考題。

你係以上嗰個老闆,你擺到明唔會出糧,如果要請人,基本上佢哋薪金要幾多,根本冇所謂。現在換轉你係一個員工,你知道有「破產欠薪保障基金」,基本上一定有糧出,你最想幫邊個打工?咪就係唔會同你抝數個老闆囉,即係嗰啲擺到明唔會出糧嘅老闆!

「破產欠薪保障基金」最諷刺嘅地方,就係令擺明唔出糧嘅老闆,成為打工仔最受歡迎嘅老闆。所以噚日電視台咪搵唔到員工訪問囉!

嗰段新聞,最後搵個飲食業界工人代表嚟訪問。佢話現在只係罰錢,對老闆唔夠阻嚇作用。唔通要坐監、打靶?我永遠覺得,對一個老闆最有阻嚇作用嘅後果,就係請唔到人幫佢打工。不過一日仲有「破產欠薪保障基金」,啲老闆就唔會面對呢個後果。

任志剛延誤拯救負資產?

舊年之前,孫柏文聽過好多花旗國樓宇按揭嘅故事。聽過好多「乜話?佢都做到按揭買樓?」嘅故事。其中一個最離譜嘅例子,喺06年發生。聽聞,當時有個年薪1.2萬美元、摘生果維生嘅農工。佢零首期,成功借到錢,買到間70萬美元嘅屋。

大家可能會問:「月薪1000美元,可以零首期借五百幾萬港紙買樓?」冇錯,當時嘅信貸泡沫就係咁瘋狂。

雙失青年入市救市

大家可能記得,我曾經講過一種按揭,叫做NINJA按揭。即係解釋為借款人no income(冇收入)、no job(冇工做)、no asset(冇資產)。

咁嘅人,我哋特區曾經都有好多,我當年都係一個。不過我哋就冇叫呢類人NINJA,特區叫法就係「雙失青年」。

大家要知道,以前最多「雙失青年」嘅年代,亦係樓市最悲慘嘅時候。政府當年推出多項政策,希望推高樓市,不過都係失敗。我喺到諗,我「雙失」嘅年代,亦係花旗國信貸泡沫嘅膨脹期。點解我當時都係NINJA,但唔可以零首期買樓?

大家諗吓,如果當年啲「雙失」個個借到錢買樓,當年啲負資產就可以甩難。引進花旗國式嘅放債方法,唔係終極推高樓市嘅方法?點解啲薪高糧準嘅特區高官,冇行呢個政策?仲唔係失職?

利用外資穩定銀行

大家可能會話:「信貸泡沫嘅後遺症,就係銀行體制出現動盪。金管局總裁任志剛就係因為呢個理由,先至唔批准咁嘅放債方法。」

我話冇可能。任志剛咁醒,一定知道咁嘅放債方法,同佢嘅政策目標非常脗合。

大家要記得,任志剛想見到非常穩健嘅本地銀行體制。當花旗國嘅放債公司聯同啲投資銀行,為本港「雙失青年」向全世界撲水,本地銀行仲唔穩健?

因為可以借錢畀NINJA買樓嘅資金來源,一定係非理性。到時候收嘅利息,本地銀行根本冇可能競爭。所以本地銀行惟有撤出按揭市場,到時樓價大跌,本地銀行冇事。死,都係死啲外國資金。

最弊就係信貸泡沫已爆破。外國投資者已經冇機會經「雙失青年」、投資銀行將財富轉移畀我哋特區負資產業主。真係可惜。真係希望當年唔係任志剛阻住佢哋啲錢嚟,延誤拯救啲負資產業主。

Tuesday, March 25, 2008

真正的政治家──李登輝

今日,孫柏文問大家一條思考題。時間係90年代初,你係一個一黨專政嘅獨裁領袖,不過你統治嘅地方,國際政治上已完全被孤立。多年來,有個離開不遠嘅敵對政府虎視眈眈,經常話要用武力去攻打你。而一路冇行動嘅原因,就係因為軍事上,你有花旗國做靠山。

最弊,敵對政府統治嘅地方,經濟蒸蒸日上。雖然仲大落後,不過如果冇咗花旗國呢個靠山,喺未來絕對有能力成功攻打你。以前,花旗國會因為敵對政府信奉共產主義,無條件支持你。不過因為蘇聯瓦解,再會有幾耐嘅「無條件支持」,就冇人知。

以民主政制箍花旗

就係咁,如果你係呢個領袖,你覺得點先可以令花旗國繼續支持你?

答案就係製造一個共產主義制度嘅相反,即係要尊重人民個人決定,體現方法就係走民主政制、自由市場路線。亦因為敵對政府都開始擁抱自由市場,令走民主路線嘅需要更迫切。

從歷史當中,你相信穩定嘅民主政制,好多時都係有兩個政黨互相交替政權嘅社會。所以難題就係從一黨專政,點樣去到有兩個互相交替政黨嘅局面呢?

仲有,如果選擇結束一黨專政,如何對付嗰啲將會阻撓改變嘅既得利益者?

首先,為咗安撫啲執政黨嘅既得利益者,佢哋要相信,執政黨將會係兩個互相交替政黨嘅其中一個。之後,亦要令佢哋相信,就算冇政績嘅在野黨上台,都唔會「世界末日」。

如果要執政黨嘅既得利益者,不但接受,更可能希望在野黨上台,最好方法就係將執政黨繼任嘅第二梯隊極度分化,同越廢越好。而在野黨就有個好好睇睇嘅人接任。不過,如何預防在野黨冇競爭對手?

第三梯隊抗執政黨


所以,分化執政黨嘅第二梯隊時,就需要同時提拔第三梯隊。

方法最好就係搵第三梯隊,去整頓吓執政黨,一方面可以排除黨內惡習,又可以令第三梯隊喺人民心目中,同即將會面對失敗嘅第二梯隊,劃清界線。

等在野黨第一次執政之後,第三梯隊就可以輪替。到第三梯隊上台嘅一刻,就應該出現一個花旗國會支持嘅兩黨互相交替政權。最後,仲要預防「個人崇拜」,點樣可以令自己喺第三梯隊上台嘅一刻,冇晒影響力、廢盡武功?

因為就連作為領袖嘅你,都不能阻撓呢個進程,就應該冇人可以。李登輝係真正嘅政治家?只能等待歷史嘅判決。

Emotional day for an emotional man

See my boss cuss, when asked about whether 馬英九 will betray Taiwan's interest.

Friday, March 21, 2008

聯儲局次按債券當金勞

曾幾何時,即07年7月,Bear Stearns嗰兩個炒賣次按債券嘅基金爆煲時,孫柏文喺度諗,如果我係聯儲局,又想保護嗰啲資不抵債嘅銀行,最終可以點做。

簡單嘅答案,其實由《金手指》創欄嗰日已講過。就係聯儲局化身成為紙幣狂魔,跟住走去啓動印刷機,濫發鈔票。亦因以上嘅理由,我重複又重複叫大家購買實貨白銀。

不過由信貸危機嘅開始,啲銀行逐個逐個宣佈有問題嘅資產,到銀行有倒閉危機。聯儲局如果濫發鈔票,又點樣可以幫啲銀行呢?究竟個步驟係點?同埋有乜嘢先至會觸發聯儲局行呢步?

資不抵債減息難救

喺呢場信貸風暴之前十幾年,差唔多每一次有金融危機,聯儲局只有一招--減息。

最多學98年,對冲基金LTCM爆煲嗰次咁,舉辦一次武林會議,淨係出間房同三文治,叫啲銀行家坐低「搞掂佢」。即係呢場風暴前,除咗減息,聯儲局救市方法,同孫媽媽搞場雀局差唔多。

不過,之前十幾年嘅花旗國金融危機,根本就唔係啲金融機構資不抵債。出事單位往往資產能抵銷債務。出事原因只係周轉不靈,不斷借短錢去買啲要揸好耐,或者流通量唔大嘅嘢。一旦短期內借唔到新錢,還唔到舊債,資產又賣唔出,就會出事。不過,只要還款期增長,資產慢慢賣出,就會解決問題。

最弊,今時今日就算畀再長嘅還款期,金融機構都唔掂。因為佢哋資不抵債。如果資產根本少過負債,就算減息,筆債嘅利息少咗,都唔等於可以還債。到咗呢個地步,如果要救佢哋就只有三個辦法。

聯儲局變成當舖

第一,就係將貨幣貶值,令債務同時貶值,令資產跟隨不受控嘅通脹升值。不過,呢個方法可能唔夠快。

第二,就係當啲有問題資產,會計上暫時消失。到他朝有盈利之後,先至慢慢處理。不過,今時今日呢個消息靈通嘅世界,冇可能學80年代初咁,當啲問題資產暫時消失。任何一個採納呢個政策嘅金融機構,都會面對即時擠提潮。

第三,就係將聯儲局變成「當舖」。金融機構攞啲問題資產嚟,就借錢畀佢。之後,金融機構唔贖啲資產,當舖「沒收」資產。當然,呢個方案要聯儲局濫發鈔票,貨幣貶值,一貶就work。

不過,話將聯儲局變成「當舖」,絕對唔公平。絕對對啲當舖唔公平。因為當舖唔會收假金勞當真金勞。

今日提供選舉必勝街版

可能因為今年9月又有立法會選舉,孫柏文居住嘅深水埗,喺大街大巷又開始見到啲乜乜物物議員嘅海報同街板。唔知大家係咪同我一樣,平時行過啲街板,都唔會特別留意上面寫咗啲乜。

最多只會見到啲議員有「強烈要求」。不久之後,就會出現啲話個議員「成功爭取」嘅街板。

不過噚日,我就真係用咗差唔多半分鐘時間,睇晒一塊寫咗「成功爭取」嘅街板。大家可能會話:「乜你咁得閒。」唔係特別得閒,其實係有原因。

啲掛喺馬路圍欄邊嘅街板,基本上係廣告,而我呢啲登記咗做選民嘅人,就係佢哋要爭取嘅「消費者」。宣傳學上,最會令消費者留意廣告嘅方法,就係焗啲消費者去睇,番文就叫做 captive audience。

我噚日睇晒塊街板嘅原因,係因為我要過馬路,不過燈未轉,車又多,惟有企定等。

不過,睇晒塊街板後,我就有感而發,要寫今日篇文。原因嗰位議員話「成功爭取」嘅嘢,就係財政預算案中政府根本就會做,根本唔需要「爭取」。但點解個議員又會當咗係政績?

成功爭取的真諦

我就諗,咁白癡嘅嘢都要整塊「成功爭取」街板,一定係因為「成功爭取」呢四個字有價值。

講真,喺芸芸立法會議員當中,感覺上做咗嘢嘅議員就好多。不過真係記得當初嘅「強烈要求」,之後又有留意佢「成功爭取」嘅議員,就只得一個。佢就係「長毛」梁國雄。

當年梁議員喺政綱上只有一個「強烈要求」,就係要董建華下台,之後真係「成功爭取」。其他議員,可能到選舉時,只要話自己「成功爭取」過幾多次,不論質、只論量,就可以贏。當年我參選,可能因為冇領略呢個真諦,所以先至包尾而回。

原來,只要積極地「強烈要求」啲政府根本就會做嘅嘢,就可以做議員。今日,就為大家提供一塊我覺得選舉必勝嘅街版。咁嘅「強烈要求」,真係一日之內已「成功爭取」。大家話我可以東山再起,出選做議員嗎?

Tuesday, March 18, 2008

買咗貝爾斯登認沽證

好多人話喺互聯網世代internet age,啲嘢要發生時可以好快發生,快到眨吓眼就可能已經錯過咗。

上個禮拜四紐約黃昏時分,孫柏文睇花旗國財經台CNBC《Fast Money》節目。裏面有個專講窩輪嘅嘉賓,佢就好興奮咁話:「今日禮拜四,隻Bear Stearns(貝爾斯登)裂口低開4蚊之後,最多跌過11蚊,見50美元一股。之後跳番上57美元,同開市價差唔多。不過,就算全日最多只係跌到50美元,啲20、30美元行使價嘅認沽證,就有好多買盤。」

夠膽下注獲大豐收

主持:「即係Bear Stearns跌唔穿20、30美元,呢啲認沽證就變成廢紙。」嘉賓:「咪係囉!買呢啲認沽證嘅人,根本就係恐慌性購入,買Bear Stearns執笠。每一次出現恐慌性買賣,個市就應該差唔多見底。除非……」

主持:「除非咩?」嘉賓:「除非Bear Stearns真係執笠。」

Bear Stearns禮拜四收市價,57美元。禮拜五收市價,30美元。到禮拜日,就突然宣佈JP Morgan將會以每股2美元收購Bear Stearns。幾日之內居然跌咗97%!嗰啲大手、大手買咗嗰批20、30美元行使價認沽證嘅人,小弟佩服、佩服。

盼警早日捉到兇手

最後,特區出現咗一個非常恐怖嘅港版Jack the Ripper。

噚日,已經連續第四日有從事性工作服務嘅鳳姐被殺害。之前,我同好多網友都因為淫照事件中,警方立亂拉人,所以異口同聲話:「又唔見班差佬捉賊咁叻。」今日,真係希望我大錯特錯。希望警方早日捉到兇手,令班搵辛苦錢嘅女仔,可以安全工作。

盲嘅都知如何解決跨代貧窮

上個禮拜四,寫咗篇題為《聯儲局前晚究竟做咗乜?》嘅文章。文章裏面解釋過聯儲局啲新招點運作,同埋分析過究竟聯儲局點解要出呢啲「重藥型」招式。最後得出嘅結論,令我好慨歎咁講咗句:「真係唔知今次邊間銀行出事。」

點知,禮拜四先至啱啱問過以上問題,禮拜五已經知道答案。原來嗰間政府眼中「大到唔死得必定要拯救」級嘅銀行,就係Bear Stearns。佢嘅股價仲要一日之內跌47%。冇辦法,資產減去負債後,Bear Stearns就有117億美元。大家可能會問:「有117億美元淨值,點解股價俾人質到好似會執笠咁?」

第三級資產冇得估


理由係計啲資產值幾多錢,係將啲資產分開三個級別。
首先有「Level 1第一級」資產,有市有價。
而「Level 2第二級」資產,冇市冇價,不過都仲可以估吓啲資產值幾多錢。
最後「Level 3第三級」資產,就係黑洞,估都冇得估,公司年報話值幾多錢,基本上係齋噏。

Bear Stearns就係因為自己賬簿上有呢啲「Level 3」資產,話值280億美元,所以一拍埋117億美元「淨值」,又遇上聯儲局發不尋常新招,所以股價一日跌47%。

作個比較,就算孫柏文點樣睇淡滙豐(005)都好,佢哋始終都冇呢啲「Level 3」資產。仲要因Bear Stearns唔係唯一一間銀行,賬簿上「Level 3」資產,多到可以致命,如無意外會繼續有超級大型投資銀行出事。

真係可以當今時今日嘅花旗國金融股,為2000年嘅dotcom股咁,合埋眼拋空贏錢。唔知邊度可以借幾手高盛嚟拋空呢?

上個禮拜,除咗聯儲局新招外,花旗國金融界話題,就一定係講紐約州州長下台。佢嘅繼任人,就係叫David Paterson(圖),佢係一個視覺有嚴重障礙嘅黑人,而政策取態上好多報章都話佢「左到不堪」。我當然自己親身走去睇吓呢位新州長支持啲乜。

新州長支持學券制

原來,有個政策,佢同我呢個自由市場信徒一樣,都瞓身支持。呢個政策就係「學券制」。

新州長就係多年嚟見到,好多住喺廢柴學網裏面嘅小朋友,因為冇得揀,冇得逃離只顧老師利益嘅官辦學網,被糟蹋。所以就非常支持學券制。

唔通,就連盲嘅都知學券制可以畀機會啲小朋友,脫離跨代貧窮,就係我哋張文光唔知?定係代表老師既得利益集團嘅佢,唔想知呢?開口埋口都冇「學券制」,只得能製造就業職位嘅「小班教育」。唔怪得啲人唔敢生。

「冇社區爆發」五周年紀念

五年前今日,即係03年3月14日,當時嘅衞生福利及食物局局長楊永強走出嚟話:「冇社區爆發」。究竟爆發啲乜,相信孫柏文都唔使提。作為一個喺03年初,有份笑啲人用50蚊買一支白醋嘅人,我對於啲小學生今時今日毋須返學,唔會話呢個決定早定遲、對定錯。現在取態,只能希望大家冇事。

講真,都唔知個天係咪同政府有仇,就喺宣佈強醫金之前,盡量凸顯政府醫療制度嘅漏洞。

強迫金後再呃港人

我以前都講過,香港全體市民上次畀政府呃咗,令到大家都要忍受強迫金,我哋已經學咗教訓。堅決相信,fool me once shame on you,fool me twice shame on me(俾你呃第一次,就係你衰;俾你呃第二次,就係我戇居。)香港市民要堅決唔戇居。

多都唔講,因為今時今日政府直接出錢,如果有轄下醫生喺原本應該睇症嘅時間,走咗去洗車,政府都起碼會做啲嘢。如果有咗強醫金,啲「洗車醫生」就會冇壓力,因為政府都冇誘因睇實。選擇做戇居嘅人可能會話:「政府會睇實啲開支!」咁我就要問嗰啲人:「你啲強迫金,畀緊幾多管理費?政府係咪好熱心咁,減少啲迫金公司嘅打劫費?完全冇囉!」

仲有,搞強醫金係為咗保證未來港人可以更加健康,得到更好嘅醫療服務。不過,如果有間機構,政府迫人一定要幫襯佢,就連錢都幫佢搶埋,呢間機構嘅服務質素會點?

今時今日,自己啲錢仲可以去例如泰國睇醫生,他朝,政府話啲錢點使就點使,點嘥就點嘥。講到尾,政府根本冇決心去減少醫療系統浪費。冇心節流,惟有開源。所以希望大家同我一樣,深信一日唔減少浪費,就唔好叫我哋融資。

錢點使管佢唔到


講真,大家只要墮入特首曾蔭權嘅思維,就可以明白點解冇得節流,惟有開源。點解又要講強醫金。因為,過百萬人嘅勞動人口,唔會喺七.一國家主席胡錦濤來港幾日,玩嘢落曾特首面。不過啲醫生就會。明啦?

Saturday, March 15, 2008

真係唔知今次邊間銀行出事?

I concluded in my Thursday's piece with respect to the new Federal Reserve measures with the following comment - "真係唔知今次邊間銀行出事。"

Now we all know...



Monday March 10: “Bear Stearns' balance sheet, liquidity and capital remain strong”

Wednesday March 12: “We don't see any pressure on our liquidity, let alone a liquidity crisis. Bear finished fiscal 2007 with $17 billion of cash sitting at the parent company level as a "liquidity cushion". That cushion has been virtually unchanged. We have $17 billion or so excess cash on the balance sheet”

Friday March 14: “...our liquidity position in the last 24 hours had significantly deteriorated.”

Alan D. Schwartz, CEO, Bear Stearns

Thursday, March 13, 2008

聯儲局前晚 究竟做咗乜?




前晚,大家都知道聯儲局又發功,令道指彈升416點。如果孫柏文問大家:「咁究竟佢哋做咗啲乜?」相信會有小部份,為追爛Gag睇《金手指》,所以唔係好貼市嘅fan屎答:「umm......二千億......umm......聯儲局攞二千億出嚟囉......umm......攞出嚟派啩…我諗畀啲銀行囉。後果係點?好似你成日話囉…引發通脹。」

其實,我聽到呢個消息嘅第一個反應,同以上嘅答案差唔多。不過,後來記得上個禮拜五,聯儲局先至發過功,提高向銀行嘅貸款額。今次,發覺有少少唔對路,好似唔同,所以我就去研究、研究。

以物易物原因

原來今次真係唔同。以前,銀行攞啲「合規格」資產,例如花旗國國債債券、Freddie Mac同Fannie Mae嘅按揭債券等等,做抵押畀聯儲局。聯儲局就會放現金畀啲銀行。

前晚聯儲局嗰招唔同嘅地方,就係銀行攞啲「以前唔合規格」嘅資產,例如當初話AAA風險評級,今時今日已證明係垃圾嘅按揭債券等,做抵押品。聯儲局就換啲短期國庫債券畀啲銀行。

所以今次唔係放水,只係垃圾債券換國庫債券。大家一定會問:「唔係放水。以物易物,為乜?」問得好!有趣、有趣。

有啲好天真好儍嘅人就會話:「聯儲局驚通脹,所以唔放水,以物易物。」聽到呢啲咁嘅答案就會令我非常懷念以前電視節目《笑聲救地球》中嘅笑聲拍板。

大銀行被挾倉

其實,有個陰謀論,我覺得值得大家信吓。原來,自從舊年8月開始爆發金融風暴之後,有好多政府眼中「大到唔死得」級嘅銀行,走咗去拋空國庫債券。

拋空國庫債券得嚟嘅錢,就攞去買「近似政府般安全」例如Freddie Mac同Fannie Mae出嘅債券。諗住「近似政府般安全」,應該冇事,不過就有少少息差賺。

就喺短短幾個月,啲大銀行拋空國庫債券嘅總數,升咗十倍。點知,啲國庫債券係咁升,而「近似政府般安全」嘅債券就係咁跌。啲大銀行面對前所未見嘅大挾倉,一係投降,一係搵多啲貨去做交收。

所以就算突然多咗國庫債券,會令短息抽上,逆聯儲局減息之意,聯儲局都要照做。真係唔知今次邊間銀行出事。

Here's another theory by the BBC as to why this move was made. To help kill hedge funds and move the unwinding process along. To sum, the banks currently are not making margin calls in fear of getting crappy bonds from debtors... So one can now exchange crappy bonds for treasury bills...

But it means that the banks no longer have to carry these crappy bonds on their books. Nationalisation of these crappy bonds anyone?

Wednesday, March 12, 2008

計價值:Isabella =《信報》?

呢幾日,實在有太多令孫柏文「O」晒嘴嘅新聞。今日特登要攞其中兩單嚟同大家分析。兩單嘢嘅主角,都喺一場科網泡沫響朵。

前晚,開電視轉去花旗國財經台CNBC。一睇,仲估轉錯台,幾個主持、記者、評論員,冇個講股,全部去晒講性醜聞。嘩!原來捲入性醜聞嘅主角,就係今時今日花旗國紐約州州長斯皮策 Eliot Spitzer。老哥佢原來走咗去幫襯啲幾千美元一次嘅性服務供應集團。

抹黑手法得罪人多

點解CNBC要講佢?因為當年佢仲係檢察官時,遇着科網泡沫爆破,佢為咗滿足花旗國人民,耐唔耐爆發「暴徒搵人祭旗」嘅慾望,用盡所有板斧,抹黑啲科網泡沫時代紅人,例如分析員、紐約交易所總裁等等。

佢經常用「李國寶式」唔審、唔使認罪、不過罰款嘅手法去抹黑。而要迫啲「獵物」接受以上嘅安排,就會連你同邊個瞓過覺都會查。跟住要脅如果唔接受抹黑,就揚出嚟。今次,應該冇人幫佢。

原來除咗踩親金融界從業員,佢仲曾經非常自豪咁,瓦解過兩個性服務供應集團。所以,冇人會支持「只許州官養雀,不許百姓餵鳥」。

之前,佢以70%票數當選州長,啲人仲話佢有機會他朝做總統。咁就玩完。可能係報應,科網時代累人輸錢都要拉?有冇搞錯。

第二單嘢,就係呢排吹得好勁,關於李澤楷同梁洛施Isabella嘅新聞。幾日前,都仲話Isabella要同經理人公司解約只要一億元。去到噚日已經話要兩億。升得咁快,唔通張合約好似以前祖國,一連串不平等條約一樣,係用白銀計賠款?

搶番個「戰略高地」


大家可能話,李澤楷「救」Isabella事出突然。我就話絕對有前科。大家要記得,當年就係李澤楷英勇地殺入香港電訊,從殖民帝國手中,搶番呢個「經濟戰略高地」。分別只係,上次對付嘅係「英女皇」,今次對付嘅係「英皇」。

不過,對於好多人嚟講,「億元」係個天文數字。大家可能會問:「兩億等於幾多?」對於李澤楷嚟講,對上一次攞兩億出嚟,就係買《信報》嘅控制性股權。唔通計價值,Isabella =《信報》?

點解,一個斷送做總統嘅未來,一個就將個少女等同全港最有影響力嘅報紙?男人有四個可以幫佢做決定嘅器官。排第四,就係個腦。排第三,就係個胃。排第二,就係個心。After all,they are just men.

Tuesday, March 11, 2008

港大奇拿?

噚日,高明輝拎咗份友報過嚟同我講:「又有奇拿放相喎?」原來早排有對港大情侶跌咗隻USB手指,搞到學生自拍「生活片段」流出。不過,友報標籤為「港大奇拿」就被人拉咗。講真,要拉唔到先算係奇拿,唔明就最好唔好亂用。

講番正題,孫柏文已經同各位忠實Fan屎講過好多次,就係千祈、千祈、千祈,唔好影,No。到咗個個禮拜都有片流出嘅今日,我只可以講,所有拍過嘅年輕朋友要有心理準備,若然未流出,只係時辰未到。好彩嘅話,就係你生咗幾件,人老珠黃。起碼都會有人話:「你身材都幾好喎!」

最後,做咗好多、好多屆立法會議員嘅張文光,就批評互聯網使用者,話佢哋「按一個send掣仲勁過上帝之手,上帝也沒法停止資料擴散,立即失控。」所以就要立法禁止。

原來上帝做唔到,張文光立條法就得。

債保公司 越快落越墮落

大家都知道特區中有小朋友讀緊書嘅家長,都非常關注小朋友每個學期嘅成績,因為越來越多小朋友會揀喺花旗國讀大學。唔同嗰啲今非昔比,今時今日只會 excel in mediocrity嘅前宗主國同特區大學,花旗國大學揀學生時,睇成績唔會齋睇計劃經濟形式嘅公開試分數。

要攞A 換Missy

大家嘗試幻想吓。一路以嚟,你嘅小朋友都科科A,佢又要維持咁樣嘅成績,先至可以去啲你肯畀錢佢讀嘅大學。如果學期尾家長日,其中有一科嘅Missy突然間同你講:「你個小朋友,呢個學期呢一科,應該冇A。」你會點做?

打到個小朋友飛起?叫佢勤力啲讀書?
或者問個Missy可唔可以重新讀過,重新做功課,再補考?
甚至見到個Missy冇人要,應承介紹男仔畀佢,之後求佢「鬆手少少」?

如果你揀咗以上任何一個選擇,究竟能否保得住個A,孫柏文就真係唔知。不過,你就冇能力做花旗國債保公司MBIA嘅管理層。

大家都知,啲債保公司冇AAA評級,就冇得做生意。今時今日,信貸評級公司Fitch就話要將MBIA降級,唔畀AAA。

MBIA點做?就叫Fitch唔需要再為MBIA做評級。

即係點解?即係 Missy話你個小朋友冇A,咪換咗個老師囉。搵個肯畀A嘅就可以啦!
大家明白點解花旗國啲大學咁勁呢?

債保公司股價越快落,風氣就會越墮落。

對抗反吸煙有計

噚日,睇《蘋果日報》國際新聞版,有 段新聞話花旗國明尼蘇達州爆發演戲熱。

據聞,當地通過「特區式」嘅禁煙條例,好多室內場所都禁煙。

不過因為佢哋非常尊重言論同表演自由,所以豁免舞台上禁 煙,因為唔知劇情有冇咁嘅需要。

就係咁,各大酒吧都搞「演劇夜」。酒客只要承諾參與「演出」,就可以食煙。酒吧道具部同事,就管理啲煙灰缸。

有間吧直頭將 「劇名」叫《Before The Ban》,以寫實形式描繪禁煙前嘅世界。

大家可能會問:「冇觀眾,又點算係演出?」其實,世界各地都有好多「社區劇場」,為參與者抒發表現慾,做咗都冇人 睇。

如果,特區都咁尊重言論同表演自由,街頭巷尾就會有一齣齣描述港人同死神慢性掙扎嘅戲。到時你流淚,唔係因為煙熏入眼。Smoke gets in your eyes?

Monday, March 10, 2008

港女問港男:你交標準稅率嗎?

早兩個禮拜,孫柏文約咗兩位朋友去咖啡店,一女一男。

女,冰雪聰明、樣子甜美、博學多才,反應快之餘仲要對世事瞭如指掌,最厲害嘅地方就係佢細過我。

男,如果用「傑青獎」年齡標準嚟界定,肯定係青年才俊,特區政府係我揸fit嘅話,一定搵佢做副局長。

當日,我跑到咖啡店時,已遲到同上氣唔接下氣,仲因為我一向唔飲咖啡,所以就買咗支水。我坐低時,兩位朋友已為早一日宣佈嘅財政預算案,進行激烈辯論。男方堅決為預算案辯護,因為女方步步緊迫。特別為預算案當中,對於入息稅稅階、稅率嘅新安排周旋。

門當戶對免蝕底

我見佢兩個拗得咁精采,就決定做觀眾睇show,開支水,一口氣劈咗佢。

當我飲到一半時,女方突然問咗男方一句:「其實,你係咪交緊標準稅率?」嘩!我聽到呢句時,爭啲連水都噴出嚟。因為女方已經結咗婚,我就即時插嘴問咗女方一句:「你係咪有姊妹介紹?」女方笑咗一吓,就澄清冇呢個企圖。

不過我喺度諗,呢個絕對係一個好問題。因為如果一個男人交緊標準稅率,佢一係收入高,一係就冇負擔。

其實,我呢位港女朋友問嘅問題,將會越來越多港女問。

大家唔好覺得港女將會視港男做搖錢樹,佢哋只係求自保。因為上個禮拜,特區法院上訴庭,出咗新案例,話夫婦離婚,資產分配要一半一半。今時今日,咁多港女收入高到交標準稅率,唔搵番個「門當戶對」,就會蝕底。

所以,唔問清楚點得呀?


Sunday, March 09, 2008

為fan屎增值談花旗國初選

適逢星期五,又係時候孫柏文為各位《金手指》fan屎增值,講吓天下形勢。今日,就同大家講吓花旗國總統選舉嘅初選情況。

喺花旗國,如果你要去選總統,就一定要家人全力支持。

基本上,你家中有一兩個人走出嚟話:「有血緣關係又點?屋企人又點?我唔覺得佢會係個好總統。」咁你已經輸硬。

仲有,你家人會面對前所未見嘅「狗仔隊」壓力。傳媒、對手、想出位嘅blogger,求其任何一個揭你醜聞有着數嘅人,都會查你家人做過嘅事。

例如,花旗國副總統切尼個女,都應該係該國其中一個最多人知道性取向嘅人。淨係2004年副總統辯論中,對手三番四次咁「問候」切尼個女,吓吓問切尼點樣可以一邊廂愛同接受自己個女,另一邊又反對同性戀婚姻。

獲家人支持好辦事

再講,如果你肯定有家人全力支持,佢哋真係想你做總統,你就可以大條道理,叫佢哋出嚟幫你拉票。共和黨嘅羅姆尼(Romney),就發動自己五個仔喺Iowa州幫自己拉票。真係毛主席話齋,人多好辦事。

不過如果大家曾經參選過,又或者睇電視睇過葉劉淑儀拉票。就會知道拉票中,好多時遇着支持對手嘅選民,佢哋可以令你好難受。自己參選都算,親人拉票遇着呢個情況,就會更覺尷尬。

好似希拉莉個女車路士.克林頓Chelsea Clinton。聽聞,有一次深入美軍軍營拉票,有一個士兵同克林頓個女講:「作為一個要保家衞國嘅士兵,一個代表世界第一強國出征去維持世界和平嘅士兵,當今世上只有三個人真係令我驚到瞓唔着覺。



第一個係Osama。




第二個係Obama。



第三個係Your Mama。」



哈、哈。點呀?睇完係咪覺得增咗值?

Thursday, March 06, 2008

「一注獨贏」何處來

今日係《金手指》每日專欄面世兩周年紀念,孫柏文想多謝各位fan屎呢兩年嚟嘅支持。呢兩年真係發生咗好多風風雨雨。當然,參與投機買賣嘅各位,自問有邊「兩年」,股市唔係充滿風風雨雨?

兩年多前,當我知道《金手指》將會每日出街時,我就搵咗以前股票行嘅同事食晏晝。希望可以攞佢哋嘅意見。當時,就有一位現在已失散咗、無法聯絡得到嘅前輩,一齊食飯。佢當時係股票行裏面,資產管理部嘅首席基金經理,佢個名叫做Billy Ho。

通脹下保護自己

由好多年前,我喺股票行開始做嘢嘅一刻,Billy同我已經志同道合。原因係佢同我都深深相信,當時剛展開嘅原材料大升浪,一定會升到冇人信。除咗因印度同祖國等新興國家會令需求飛升之外,仲因我同佢都信,當時仲膨脹緊嘅花旗國樓市,一旦爆煲,就會引嚟中央銀行瘋狂濫發鈔票。鈔票一旦濫發,原材料價格通脹就會一發不可收拾。

仲記得當年我喺股票行做石油股分析員時,佢耐不耐就會走過嚟股票部,同我笑話我將中石油(857)、中石化(386)、中海油(883)等嘅股票目標價,定得太低。不過,真係令我哋產生絕對共鳴嘅原材料,就係白銀。

食晏晝當日,Billy同我講:「你家將會成為一個財經評論員。做你嗰行,每個會令人記得嘅評論員,都會有個代表佢嘅長線投資建議。」

佢都未講完,我已經話:「白銀。」

佢一聽到我咁講,就話:「你e家有個平台,好好把握呢個機會,教啲讀者點樣喺高通脹環境之下保護自己。」

就係咁,我就開始寫將會喺2006年3月6日出街嘅嗰篇文。文中話到明,對白銀作為長線投資建議,充滿無限信心。

我仲話:「每一次升,我都會出來邀功,每一次跌,我都會叫你趁低吸納。」亦提供每盎斯120美元嘅目標價。有效期十年。當日銀價?10美元一盎斯。

冇信心就買位置


篇文寫完之後有個小問題,就係唔知起乜嘢題,所以我就走去請教李兆富。佢睇完篇文後話:「你都好信白銀。」我話係。我又問佢起乜嘢題先可誇張地表達呢份信心。佢話:「以前同你入馬場,你話過冇信心就買啲位置,有信心一注獨贏就得。哈、哈!」

嗰篇文最後起乜嘢題?咪就係「一注獨贏買白銀」。番鬼佬話齋,the rest is history。

最後,我承諾會繼續努力,做到最好,就算幫唔到大家賺錢,都希望可以為大家提供一啲娛樂。再一次,多謝大家!

白銀莊家 斬淡倉定拋磚引玉?

噚日,孫柏文原本想寫白銀,不過見滙豐出完業績之後啲股東咁開心,所以就講吓我對滙豐嘅見解。今日,講番白銀。當今世上,除咗由我做隊長嘅「白銀(香港)戰隊」之外,各地都有白銀戰隊嘅支部。組織架構有少少似Comintern溝阿蓋達。

呢幾個禮拜,世界各地嘅白銀戰隊,都因銀價節節上升,覺得呢場對抗紙幣狂魔嘅戰役,初見成效。各地人民都開始感覺到打擊通脹嘅迫切性。

大手拋空壓抑價格

不過,正當白銀戰隊士氣高昂之際,我哋不得不承認被一股迷思困擾住。好多白銀戰隊嘅老兵,一向以嚟都相信由各國央行為首嘅紙幣狂魔,長期以人為手段操控金銀價格。

一路壓抑金銀價格,就可以製造假象,令世人覺得冇通脹壓力。

紙幣狂魔壓抑金銀價格嘅手法,就係喺商品期貨市場,大手拋空金銀。只要金、銀買家一路唔會收實貨,每一次都會喺期貨合約到期之前,賣出手頭上嘅金銀。金銀買賣,就會冇金銀實貨交手,變成「公仔紙」遊戲,紙幣狂魔就可以繼續玩弄。今日提供一個圖表。大家睇吓,就會發覺喺眾多種商品市場當中,代表紙幣狂魔進行買賣嘅大莊家,拋空最嚴重就係黃金同白銀。



啲大莊家淨拋空咗嘅白銀,相等於超過全球 120日嘅白銀產量。即係如果買家突然要求啲大莊家交貨,世界各地嘅礦,要用四個月時間,淨係為啲大莊家生產,先至可以唔違約。

買家炒上莊家再拋

就算買家唔攞實貨白銀,囤積咗嘅拋空倉,喺今日嘅價位,啲大莊家已經輸緊好多。平時,佢哋有無窮無盡嘅信貸額,買家一路炒上,佢哋一路再拋。到買家購買力開始轉弱時,佢哋就會走出嚟瘋狂打壓,低位平淡倉。擺出一個「拋磚引玉」陷阱。

不過,今時今日所有金融機構都出現信貸危機。理論上,如果我係一間金融機構控制風險部門嘅主管,我就會每日打電話叫拋空咗白銀嘅同事,即刻斬倉。如果所有大莊家一齊斬倉,大家就會見到空前絕後、「賓虛」式嘅夾淡倉潮。白銀一下,就可以去到我嘅目標價120美元一盎斯。

大家要問自己,今時今日啲大莊家究竟係自斬淡倉,定係拋磚引玉?

Tuesday, March 04, 2008

滙豐股東高高興 我都要嚟贈贈興

噚日,大約四點鐘打後,孫柏文喺中環街頭見到好多人咪咪嘴笑。返到《蘋果日報》總部,呢種笑容更加顯眼。我心諗,佢哋為乜咁開心?我一路都諗唔通。直至我行到港聞版編輯部先至明。嗰度有位年資比較高嘅編輯,不如暫時叫佢做「崩牙弘」。佢就好似嗰啲喺中環笑咪咪嘅人一樣,非常開心。佢呢種笑容,我已經好耐未見過,對上一次係07年7月30日。

早已到目標價

噚日「崩牙弘」見到我嘅一刻,就從佢笑得非常燦爛嘅嘴問我:「點呀?滙豐業績點呀?」
我就答:「嘩!上一次見到你咁笑法,係舊年7月30日,你同我講話喺滙豐出中期業績前,你入咗滙豐。當時你仲話打死都唔會放。你係咪仲揸住嗰日入嘅貨?」
佢冇答我,只係笑多一聲,就繼續工作。

真係唔知點解,舊年7月30日,我叫大家「一注獨沽賣滙豐」之後,好多人就當咗我為「反滙豐陣營大旗手」。

就算今年1月23日,我大大隻字寫「一注獨沽滙豐『到價』」,好多人都繼續當我係滙豐淡友。

實不相瞞,滙豐喺1月22日,由建議日140元跌到我定下來嘅目標價112.5元之後,啲人問我點睇滙豐,我都會答:「不如買白銀或中油(香港)135仲好。」大家可能覺得,孫柏文左搖右擺,已經淪為一個冇意見嘅財經口水佬。

大家唔好擔心,如果你今日問我點睇滙豐,我會答:「07年全年業績好勁。就算覺得盈利、賬面值等嘅數字,喺呢場信貸風暴當中完全唔可靠。滙豐不單止冇減派息,仲要真金白銀加派息,呢吓都要啲淡友服。」

會伺機再叫沽


我亦會繼續話:「不過,今次業績報告畀到我嘅感覺,實在同舊年7月30日嘅中期業績太過似。全世界都好似覺得滙豐已大步檻過。所以,如果滙豐股價大幅攀升,我將會等候機會,再一次叫大家一注獨沽賣滙豐。」

原本今日想繼續寫白銀,不過見咁多滙豐股東咁開心,真係要嚟贈贈興。

You bought HSBC? You must be happy...

Alright kiddo's...

I am sure some of you bought HSBC and must be so happy with yourself. hahahahaha

Here's a little walk down memory lane.

From July 31st 2007.
After HSBC came out with 1st Half 07 results.
They were referring to my call 一注獨沽賣滙豐 made on the July 30th 2007.




HAHAHAHAHAHAHAHAHAHAH

Enjoy your day in the sun... While it lasts...



Bullpoo.com's global user ranking...

Alright. You might have heard of the US stock trading website bullpoo.com

Anyhow, although I am not as good as 王雅媛.
See how me, the bonafide 明燈 is doing hor hor hor






Oh yeah... the portfolio has only traded one stock. SLV.


Monday, March 03, 2008

買咗白銀?千祈唔好睇呢篇文

大家作為《金手指》嘅中堅fan屎,好多都有聽孫柏文呼籲,買咗白銀成為「白銀戰隊成員」。「白銀戰隊」當中,因為買白銀嘅年資唔同,所以有新手novice同老兵veteran嘅分別。如果你已經買咗白銀,又想知道自己係新手定係老兵,我只要問你一個問題,你就會知。

問題就係:「喺紐約商品期貨交易所NYMEX,啲金融商業機構戶口Commercial Dealers,對上一次睇好銀價,即係總體上『買升合約』多過『買跌合約』係幾時?」

如果你答:「啲金融商業機構戶口,有試過總體上睇好銀價咩?」你就係老兵。

如果你答:「金融商業機構戶口係乜?」咁你就係新手。

莊家買跌多過買升

大家可能會問:「點解啲白銀戰隊老兵,對金融商業機構戶口做啲乜咁有興趣?」原因係NYMEX,將所有每日喺市場進行買賣嘅戶口,分為三大類。
第一種,就係散戶small speculators。
第二種,就係大鱷large speculators。
第三種,就係金融商業機構commercial dealers,亦即係大莊家戶口。

白銀市場同其他例如銅、黃金、石油市場唔同嘅地方,喺呢廿幾年來,大莊家戶口總體上未試過「買升合約」多過「買跌合約」。即係一路睇淡、造淡白銀。而最大八個莊家,總造淡合約超過全球六個月白銀消耗量。

當然如果啲莊家總體上睇淡,淨低嘅散戶同大鱷就睇升。大家可能會再問:「如果啲莊家造淡拋空,不過白銀呢幾年係咁升,佢哋咪輸好多?」理論上係。不過實際上,每一次白銀價升,啲莊家就會不斷拋空,去到高位時就會大大力打壓。銀價就會以極快嘅速度暴跌,啲莊家就會喺低位買番拋空咗嘅白銀。

所以每次白銀價升,大家就會見到啲莊家「買跌合約」數量,節節攀升。到銀價暴跌之後,啲莊家「買跌合約」數量亦會大幅萎縮。

信貸額不足要斬倉

最弊,啲莊家、散戶、大鱷究竟有幾多「買升」、「買跌」合約嘅報告,唔係即時有。所以往往睇到大波動之後,先至事後孔明。

啲莊家以上嘅如意算盤,一定要有無盡嘅信貸額,先至可以成事。如果冇,佢哋就需要斬倉。高位都要買番拋空咗嘅白銀。大家就會見到銀價升,不過莊家「買跌合約」數量下跌。

恭喜各位「白銀戰隊成員」,上個禮拜就出現咗呢個現象。對上一次有呢個現象係幾時? 06年初。之後銀價五個月內由9元升到15元。叫你唔好睇呢篇文,現在係咪想瞓身呢?

Sunday, March 02, 2008

曾司長,咁都唔算打劫?

噚日,孫柏文繼續被「強醫金」纏繞。財政司司長曾俊華份財政預算案,又再講「強醫金」呢嚿大毒藥。上一次政府講「強醫金」,市民已吸收咗強迫金嘅教訓,好似番鬼佬話齋fool me once shame on you,fool me twice shame on me(俾你呃第一次,就係你衰。俾你呃第二次,就係我衰。)所以為公義,全城齊心反對「強醫金」。

雙層糖衣毒藥

曾蔭權領導嘅政府,當然覺得自己比大眾市民叻好多,簡直覺得普羅大眾係笨蛋,仲要係好X笨嗰隻。所以曾特首就命令曾司長,諗吓點擺個「種金」局,令市民中招。

曾司長就發功,為嚿大毒藥鋪上兩層糖衣。首先豪攞納稅人血汗500億出嚟,即係700萬個香港人,每人7000幾。跟住就攞強迫金出嚟做樣辦,創先河直接注資6000元入某啲人嘅強迫金戶口。到時候,政府照辦煮碗再做。

大家可能覺得:「7000元喎!好筍!」我可以講畀大家知,你已經中招。如果我今日畀你7000元,你可能就有啱啱嗰種喜悅。不過,我同你話:「呢7000元只係可用嚟喺未來畀你食飯。」你可能冇咁high,不過安慰自己,因為「食」,始終都係必須,起碼仲有好多種食物揀。

我又話:「呢7000元只係可用嚟食雲吞麪。」到呢度,你可能已經覺得我冇誠意。跟住我話:「為保證啲雲吞麪能達標,保證我今日畀你嘅7000元唔浪費,你只可喺我開嘅雲吞麪店『麪管局』食。」

最後,我笑笑口話:「你要攞我嘅7000元,條件就係你要每個月供款,入呢個只可幫襯『麪管局』嘅強食金戶口。」我相信因為你曾經睇過《警訊》,你已經行開咗,遠離呢個騙局。

避免醫生罷工

點解係一個騙局?今時今日喺醫管局睇急症假設要300元。政府騙你入局之後,嗰7000元?他朝睇急症要7300元。唔想睇醫管局?Too bad,因為要保證醫療質素「達標」。

點解曾蔭權要做咁多嘢,為醫管局去搶我哋未來源源不絕嘅錢?到7月1日之前附近,嗰班醫生,又喺國家領導人面前罷工,點算?

If these graphs has any meaning to you...

I am not going to add any additional comments...


Here are two images. If you know what it means...
= )

Congrats! You are a true warrior in my "Silver Army Corps"

If you don't know what these images mean,
guess you have to wait for my column on Monday to find out hahahahaha I am Sooooooo excited.






Can you say "Jan 06 all over again"?

Caught on Camera Friday night...

Went out... Took a few pictures of ppl around me...

Yes my friends, when ppl say a man is judged by his peers, I say a man is judged by who he goes clubbing with.





Honestly, they serve Kristal at JJ's. I was mildly surprised that he just drank Krug.