點解美市臨尾彈

禮拜五，花旗東岸時間一點幾。反映大市嘅標普500指數，跌緊廿幾點。離舊年11月嘅低位不遠。全市眼光都係睇緊究竟指數挑戰低位時，穿唔穿。

其實，自從舊年11月美市創新低之後，就算由750點不斷反彈升至930點，好多人都覺得要再落番750點，重試低位，唔穿，先算冇事。

炒美國再派錢畀銀行

咁上個禮拜五就重試，由一點幾鐘開始反彈，而低位真係冇穿。不過如果要炒標普500，孫柏文就建議大家睇多幾日先。因為反彈理由，就係美國政府放風話唔會將啲大銀行，例如花旗、美銀等「國有化」。

大家千祈唔好覺得，美市中人有咩自由市場情意結，唔「國有化」就炒高賀賀佢。

其實佢哋炒嘅係，當政府唔將啲銀行收歸國有時，剩番可做嘅「拯救」行動，就係又再送錢畀銀行。

又有嘢送，點都要炒吓。

相信大家都知，標普500喺現水平，除咗係試緊舊年低位之外，喺同一時間仲試緊係02年做嘅10年低位。一穿，下面唔覺有咩支持位。

13年前750點後飆升

可能俾人笑咗十幾年嘅格林斯潘，可以吐氣揚眉。1996年12月5日，被問及佢老人家點睇個市時，佢一句「市場出現非理性亢奮」，令市場目瞪口呆。特別係因之後幾年，個市升咗一倍。

咁1996年12月5日標普500指數幾多點？750點。

小心、小心。