Monday, June 01, 2009

五月最牛商品將再升

5月真係勁,只要你有貨喺手,不論股票、外幣、商品,都係升到甩轆,唯一唔得就係啲長債,同有異曲同工之效嘅公用股例如中電(002)。禮拜六我哋《蘋果日報》財經版都係以「港股35年來最牛5月」做頭版頭條。35年前,即1974年,孫柏文都未出世。

港股喺5月升咗17%,淨係買恒指牛證都發達。不過大家知唔知,原來有隻商品喺5月嘅升幅不但贏晒其他商品,仲要贏埋恒指?呢隻商品就係白銀,升咗27%,作為白銀戰隊隊長嘅我,當然鼓舞。

央行失控白銀狂升

咁點解啲白銀咁勁?咪就要多謝以花旗國聯儲局為首嘅紙幣狂魔,開始被圍剿囉。甚至可以話市場開始炒「央行失控概念」。

咩係「央行失控概念」?咪就係央行做唔到想做嘅嘢,或做咗想做嘅嘢,不過不但攞唔到想要嘅結果,仲越做越有反效果。

央行想做啲乜?咪就係㩒低長息,令啲借長錢嘅人例如買樓人士,更有意欲去買嘢托市。

點知喺上個禮拜,債券市場參與者已出現「食唔落」現象。喺供過於求嘅情況之下,長債價不斷下跌,令長債息率係咁上。花旗政府喺上個禮拜發嘅新債數量雖然高,不過喺萬億財赤嘅世界算平常,之後至少一年個個禮拜都會係咁。

㩒低長息事與願違


聯儲局其實已預料到會唔夠買家,所以早前3月18日宣佈,會印3000億美元自己買,即「量化寬鬆政策」。佢話啲錢夠用6個月,呢個冇錯,不過佢冇講嘅就係唔加碼利息就係咁升。

伯南克都唔知自己有咩棋可以行,債王Bill Gross仲話如要平息債市嘅不滿,惟有出年初就開始加息。加息?得咩?仲唔令人覺得佢哋已失控?

6 comments:

  1. 小弟認為債息圖表最重要的訊息, 是顯示傳統基金的股票倉量.

    雷曼事件後, 資金避險轉投美債, 令債息於一月跌至極低水平. 1月開始, 有資金開始轉向於股票及其他投資市場執平貨, 美債息開始回升. 3月量化寬鬆抵銷了美國加大發債的影響. 近來, 對沖基金以本傷人, 到處攪大泡沫, 令所有人投降. 由於技術上不能不補倉, 傳統基金開始撤離債市回流股市.

    近日債息已回到雷曼爆煲前水平, 打回原形. 對沖基金料已撤出股市(DJ 圖表兩星期前之兩個大成交日應視為對沖基金散水信號). 股市危矣.

    栢文兄認同否?

    ReplyDelete
  2. US bond market... every week, many billions will be sucked up by the US govt, this week is US$65bil.

    Where is all the money going to come from?

    JP morgan is doing an offering of its own stock to get out of TARP. I guess that is as close to ringing the top of the market as it can be.

    ReplyDelete
  3. Do we have to sell in June ??!!

    ReplyDelete
  4. cheeky... hahahaha

    For if anon have already sold in May, your question would be totally irrelevant.

    ReplyDelete
  5. 點睇呢家美國樓市? 止跌?
    唔睇 d 天水圍地帶.
    美國市區o既樓價比 2003 年. 有 d 仲係升左一個開

    ReplyDelete
  6. 小弟陰謀論觀之, 今次伯南克(同埋奧巴馬)中了伏.

    表面上, 長債價下跌 (或長債息上升) 是由於外間對美國國家財政信心出現動搖. 而解決方法是長遠而言減少財赤.

    但其實過去一段長時間, 美國人就是以「我消費, 你付鈔」的形式生活. 原因只得一個, 就是美國軍事力量冠全球. 美元就如日治時代的軍票的一樣: 你買, 佢會因濫發而貶值; 你唔買, 即係公然同美國對著幹, 找死.


    債息回升主要原因是近來資本市場大量炒作令資金避險意識下降. 如果經濟已真正回穩, 這無傷大雅. 但老美早排落藥太重, 令泡沫發大速度遠超經濟復甦速度. 長息升加埋失業率升樓市實仆直, 而今次金融危機正是由樓市仆直引起. 總之, 一鑊大過一鑊.

    要債息回落得一個方法, 就是再製造危機令資金重投債市. 點製造法? GM 又好, H1N1 又好, 乜都好... 總之股市等仆直.

    ReplyDelete