Wednesday, November 04, 2009

恒指下站17500

50天平均線,真係退後一步睇,其實只不過係每日收市時,用之前50日嘅收市價位總和,然後除50嘅一個簡單數字。原意係俾大家一個方法,撇清波幅後去睇大勢。

因為每月大約有25個交易日,50天平均線,亦即等於之前兩個月嘅平均價。

今日要講50天平均線,係因如果大家睇番好多資產嘅價格、指數走勢,都喺上周下試50天平均線。例如有代表花旗國股市嘅標普500指數、特區嘅恒生指數,又或孫柏文嘅至愛白銀等。

如果從炒賣策略來睇,近幾個月,如每次下試50天平均線時,你都夠膽入市的話,之後都可享有豐厚嘅利益。呢個策略當然唔係咩獨家貼士,今日同大家討論嘅,係恒指因由之前高位22,600點,直至於上周四,恒指跌落50天平均線21,100點時,我身邊有好多朋友,都大手買貨。

到上周五,恒指出現大幅反彈後,呢啲朋友個個都鬆毛鬆翼,大讚自己有眼光。

咁我問佢哋入市因由,問佢哋係咪覺得股票抵買,佢哋異口同聲向我發出恥笑嘅笑聲,仲反問我:「抵買?你仲睇抵唔抵買?你都應該有好多個月冇贏錢,因為你唔敢買貨。」係!我真係唔敢。

問題係,當市場嘅買家,明知唔抵買都入市時,心態就會係博博吓。唔係話佢哋唔做功課,而係話佢哋將會成為驚弓之鳥,一有咩風吹草動,一見勢色唔對,就會急速離場。亦即係炒家主導嘅市場。

雖然上周五嘅恒指,承接上周四花旗股市嘅升勢,成功大幅反彈。不過到上周五晚,標普500指數又再次大瀉,跌穿50天平均線。唔知會唔會令恒指一齊跌穿?

大家可能會問:「如果一路靠50天平均線上,又上到變炒家市,一旦穿咗會點?」咁大家就要參考吓,08年嘅油價圖。

由08年2月,大約80美元一桶油起,你每次見油價下試50天平均線買貨的話,就一路跟住炒上08年中147美元一桶嘅高位。之後一穿,差不多直線、高速落到35美元。炒家市就係咁。

如果恒指一樣,一穿50天平均線,下站應該係200天平均線。雖然冇科學根據,不過?估炒家心理就係咁。咁恒指200天平均線喺邊?咪就係喺17,500點。有貨?又唔想賣?扣好安全帶啦!

4 comments:

  1. 明燈先生:

    閱覽閣下文章, 內心恐懼一掃而空, 決定繼續持貨.

    ReplyDelete
  2. Good good.

    Glad to be of service.

    hor hor hor

    ReplyDelete
  3. 剛從內地坐機回港....

    看到閣下文章....

    反正上過月買的股仔,普遍升一培.
    都好,明天沽吧...

    再做亞Q, icbc $4.2.....
    又有股息收...


    咩... 咩.... 咩...

    ReplyDelete