Sunday, April 15, 2012

一注獨沽城市電訊,除非……

2012年04月12日

噚日起身一擘大眼,孫柏文就見到城市電訊( 1137)出售佢哋嘅本業,將成個電訊網絡賣斷。記得好多年前,我啱啱入行做財演,有日收到城市電訊嘅電郵,話請我同佢哋嘅主席王維基見見面。見面時,講到城市電訊嘅長遠策略,當然就要講佢哋嘅光纖網絡。因為喺 90年代中,我中學畢業之後,幫當時係立法會議員嘅陸恭惠做咗一年 intern,有日跟住佢嘅助理去聽政府 Briefing,關於當時做咗冇幾年嘅有線電視。咁嗰陣聽完 Briefing後,我忍唔住舉手問:「點解鋪網嘅線,唔用 Fibre optics(光纖)?」當時係用 Coaxial cable。

王維基賣網要交代

當時政府個官嘅解釋,光纖本身好平,亦係最快,不過線兩端插嘅嗰部機就好貴,收費電視呢個用途用光纖唔合乎成本效益。唔係好多人會喺 95年想像到之後互聯網勁得咁緊要,如果唔係,相信有線寬頻( 1097)當年就算都係揀鋪 Coaxial cable時,橫掂掘路咁煩同咁貴,一次過同時鋪埋光纖,最多只係擺喺到 Unlit唔着燈,之後等光纖終端機機價跌先用光纖。

就係有呢個記憶,我見王維基時話:「光纖有幾快,唔係條線本身,而係部終端機。個網一鋪好,就唔使再掘路都可以不斷增速,只要冇嘢快過光,光纖網就係最快。」王維基聽到,就笑一笑話 Agree,亦話所以如果要複製同一個網絡,就要同佢哋一樣全港咁掘。我最記得佢嗰句就係:「所以我做緊嘅生意係百年基業,之後個網係可以交畀子子孫孫。」

就係因為咁,噚日睇見城市電訊賣網呢單新聞,對我確實幾震撼。因為王維基賣網,有如李家仁醫生拋棄「小明」, Apple唔再用個「 i」字咁。所以,因為光纖咁掂,前景一片光明嘅話,城電就要向股東交代點解賣網。

第一個理由當然就係因為價好。城電市值 40億元,除手上現金後嘅負債一億幾,家賣個網同其他業務就賣 50億元,理論上,如果股價淨係同交易完畢後每股現金一樣,隻股都應該升兩成半,噚日埋單只升半成,究竟係啲人未瞓醒,定係覺得王維基係會摧毀價值,燒銀紙?

搞電視比想像中難


講到燒錢就要講賣網嘅第二個可能,就係因王維基搞網搞到悶,想搞其他嘢,價好唔好係其次,最緊要有錢玩。咁大家都知佢想大搞電視,以前已話會揼 25億元出來咁做,亦因如壹傳媒( 282)搞電視,都比想像中困難同貴,睇住王維基講電視,好似見佢企喺焚化爐旁般。

相信有唔少城電股東,其實係唔想王維基搞電視,原本買你隻嘢,就係想好似買公用股咁,光纖真係可以係百年基業,當然賣網唔係唔好,價啱當然賣。不過賣完點可以變身變成咁?

光纖係啱,電視就唔係。所以如果真係咁搞,應該一注獨沽城市電訊,除非梁特首救佢。點救?就係唔發電視牌畀佢。呢幾年「香港營」背後有關勢力咁難先收到 TVB同亞視嘅話事權,突然多咗個控制唔到嘅頻道,點算呢?所以,一注獨沽城市電訊,除非攞唔到牌。

No comments:

Post a Comment