綜援集團交差記

禮拜六朝早九點，孫柏文代表獅子山學會到立法會討論關於「市民大眾對綜合社會保障援助受助人的看法」，即係講社會歧視綜援戶嘅問題。

去嘅原因，係因為我哋覺得唔可以再有另一個「黃葵香」，唔可以再有有鬥心脫離綜援嘅人，被政府逼死。

佢被逼死嘅原因，係因為社署喺社會壓力下，要啲某時段收入超標嘅人嘔番啲攞咗嘅綜援津貼出嚟。

咁我哋嘅建議係每個港人可以喺18至65歲嗰47年間，攞某期數限嘅綜援津貼，例如可總共攞260個禮拜。

點解？依家嘅制度，理論上可無止境咁攞，令社會覺得會有綜援戶抱住「唔攞就嘥」嘅心態，令自己墮入綜援制度，安全網變蜘蛛網。亦因社會有咁嘅感覺，逼到政府要攞綜援嘅人面對非常繁複、官僚式嘅高門檻先攞得綜援。

設期數降門檻

亦因為咁，好似黃葵香呢啲想脫離綜援嘅人，雖然有鬥心，但喺勞動人口嘅邊緣，工作穩定性好低，一旦放棄綜援，好驚上唔番車，唔敢同社署講佢有一份可能好快又冇嘅工。悲劇結果係一旦被揭，就會被逼死。

不過如果設期數限制（期數當然可再傾），社會就會覺得綜援戶攞嘅津貼，對於佢哋個人嚟講係有限資源，攞一期就少一期，自然會珍惜。

到時候，政府可大幅簡化攞綜援嘅程序同降低門檻，令自覺有需要嘅人得到幫忙，呢期冇需要就唔攞，黃葵香亦唔會被政府逼死。

咁在場嘅其他綜援既得利益集團代表點睇？佢哋只係不斷話社會嘅歧視，係因政府播過兩段宣傳片，而解決歧視嘅方法，就係政府再拍多段「攞綜援ok」片。

冇錯，我都係諗what the fuck。

你，究竟係想求其交差同人講你做咗嘢？定真係想幫綜援戶？

--------------------------------

The mild as crap 政府宣傳片

腦‧瑜伽

講到咁勁，試試先！

我挺曾特首！

好聽！孫柏文建議大家上港台網站嘅「立法會直擊」網頁，睇吓7月7日行政長官答問會。

高潮應喺第59分鐘開始，李永達問特首關於二氧化碳排放，就用「鬼佬好Q勁、我哋食晒屎」嘅一貫策略，講到英國政府幾咁巴閉、幾咁正視呢個問題。

點知我呢個政治家界師弟曾蔭權答：「平均每人每年嘅碳排放量，香港就6噸，英國就11噸……」我聽到呢度，即刻拍晒手。

最慘特首唔係社民連成員，如果唔係特首一聲：「李永達！」紅衫軍就會嗌：「收皮！」之後就只聽到，李永達，收皮！李永達，收皮！

其實，我對李永達最失望嘅地方，係佢覺得立法要喺某某年減到幾多幾多嘅二氧化碳排放就搞掂。好，就算畀你通過到，嗰年唔達標點算？係咪報警拉晒所有排出二氧化碳嘅人？（真係拉晒嘅話，何其壯觀啊！）

頭先已講過，香港碳排放比每一元嘅經濟生產，其實世界首屈一指。不過你話要再少，當然可以。

促減油稅 民主黨唔環保

外國同特區一樣，交通係碳排放嘅大源頭，咁要減少燒油，最好就係每重量單位嘅燃油加稅、加價（外國話咩cap and trade，其實係因抽油稅太難，而變出嚟嘅怪胎）。不論係私人、運輸、公共交通，全部都要抽。

咁我咪google「民主黨」、「燃油稅」，睇吓佢哋之前講加幾多稅。一睇，oh shit！李永達代表民主黨，喺08年6月建議減收一半燃油稅同免柴油稅。

嘩！好彩係我師弟做特首而唔係李永達。如果唔係，唔好話啲環保分子想「通緝」佢，我相信Greenpeace會學鄭家富嗰隻毋須審訊即行刑嘅司法思維，將李永達「當場槍斃」。

擒芒塞賣的！又有新作品！

高登麻甩筆神「擒芒塞賣的！」又有新作。

可喜可賀！以下就係佢嘅新作...

----------------------

我本身唔係曼迷. 不過鍾意睇英超
隊隊波都睇
我有個friend就做左三十年利物浦迷....
今朝同佢食早餐....由奧雲講起曼聯

我
佢

曼聯上兩年其實踢得幾好....特別係前年拎歐聯果年

勁乜撚, 成鳩日贏埋d付錄波, 99年果年已經付錄贏, 果次又係咁撚樣

咁就算決賽付錄...你都要碌到入決賽架....

屌, 佢地成日都靠運贏波架啦, 場場都係咁

運氣不嬲都係比賽既一部分黎架啦....

食屎啦曼聯, 真係好撚柒, 成日贏埋d 1:0既鳩波, 扮頂班馬

贏波拎3分咪得囉.....1:0都要你唔失波先得架

屌, 場場波打12個人點會失波呀

乜撚野12個人?

球證囉, 成鳩日收買球證, 打埋晒d假波

點解咁講呢?

十二碼又唔罰, 落後就送球十二碼俾佢, 想唔拎三分都唔得啦

有告過佢打假波咩?好似祖記咁

屌, 祖記可能無俾錢足協, 所以先咁既下場, 曼聯大把錢

...............

最撚憎曼聯.....無啦啦俾佢付錄拎兩季英超...

平左利記紀錄喎, 下季好睇喇

利物浦d英超係健康波, 曼聯果d買番黎既

屌....你到底有無睇曼聯d比賽架...成鳩日假波假波

無, 一場都無睇過

----------------------

冇錯，繼續呼籲佢老哥有定期嘅作品。

環保影帝邱騰華

財經演員大家就聽得多，原來特區有好多人同組織，用環保呢個概念搵着數，手持劇本當環保演員做show。

噚日孫柏文睇電視，得出嘅結論就係，眾多演員當中，環保影帝非邱騰華莫屬。

我自己都喺公仔箱示範過，膠袋稅推出後，如何令人用更多塑膠。

例如，製造商會先自行用有手抽裝置嘅膠袋，袋好啲產品，令以前一個膠袋袋五件產品，變成今日用五個膠袋。

就算你有自備不織布袋，變成係用不織布袋袋五件產品加五個膠袋。

當然，呢啲製造商嘅應變措施，就係邱騰華所講嘅「走法律罅」。咁點解要封邱騰華做環保影帝？

噚日，電視報道環保影帝出巡嘅新聞時，開始時鏡頭影住影帝手摸一袋啱啱提過，製造商預先包住產品、有手抽裝置嘅膠袋，點知鏡頭一閃去到邱騰華講嘢時，佢話：「未發覺有人取巧。」

口不對手

我第一個反應係：「唔通佢係盲嘅？」
不過再諗就：「唔係喎，佢係親自用手摸，盲嘅都知係膠袋啦！」

唯一解釋，就係阿影帝佢講嘢，係編劇寫嘅台詞。

編劇寫嘅稿，以影帝嘅專業演員操守，係唔會爆肚亂改。

講真，邱騰華好似某19世紀末嘅後生英國高官一樣，好多動作，不過好多時做嘅嘢危害大英帝國嘅管治同認受性。

當時啲人批評佢嘅說話，絕對適用於環保影帝身上，邱騰華is a young man in a hurry。

個仔叫Wealthee幾好

哨牙通爭千億遺產嘅訴訟正審到如火如荼。好多（甚至太多）details流出，聽落難頂，不過又繼續聽。

其中一個好多人講嘅花邊新聞，就係哨牙通將個仔改名為Wealthee。

經過孫柏文嚴正嘅非正式調查，所有人嘅反應係：「真係好cheap呀！咁貪錢！」我每次聽到咁嘅反應都覺得怪，因為想個仔發達有咩問題？

雖然，Wealthee呢個名係少少非主流，不過咁改名有大把前科。

例如生個仔，好希望佢戰無不勝，咪幫佢改名為Victor。生第二個時，想佢發達咪叫佢做Rich囉！

嗰個大仔叫 Victor、二仔叫Rich嘅仁兄，我又唔見佢同人因金錢糾紛打官司時，會被對方將佢兩個仔嘅名作為證明佢「有問題」嘅證據。

你班覺得叫 Wealthee好cheap，不過叫Rich就冇問題嘅人，真係一世叻極都係做中產。

花旗黑人哲學家Chris Rock曾經講過，wealthy同rich嘅分別，佢話籃球員Shaquille O'Neal（過往6年年薪2000萬美元）就係rich，不過出糧畀佢嗰個班主就係wealthy。

Rich嘅財富係一代即散，wealthy先能世代相傳。

勝在好記易搵

再講，英文叫Wealthee就反感，咁你要問吓自己識唔識人個中文名有「發」、「財」、「利」、「豪」、「富」等字？

最後，Wealthee呢個名有個大好處，就係好易google，第時要做保險經紀，啲客好易搵到你。

---------------------------------------------

黑人哲學家Chris Rock講
wealthy 同 rich 嘅分別

Learn to dance like MJ...

學 MJ 跳舞嘅初級班

金手指貼士第二季總結

7月第二個交易日，係時候總結金手指篤過嘅「一注獨贏」貼士。可以用16個字總結，「全部齊升、beta皆一」。以下係09年第三季嘅展望。

白銀：今時今日，每一次有舉足輕重嘅債仔出事，令債主要求高回報先肯放新債，聯儲局就會做保證人。

如果做保證人都唔夠，就會自己借錢畀嗰啲冇人肯出手相助嘅債仔。不論係單一金融機構例如AIG、花旗，或經「量化政策」畀聯邦政府，甚至提供125%按揭畀業主群，通通都係聯儲局印鈔票「借」嘅。

好多人話印鈔票冇問題，因為只要經濟好轉時抽番啲水出嚟就得。問題係，如果啲債仔還唔到，抽咩呢？錢攞咗出嚟，冇得返轉頭，能保持不變狀嘅嘢（例如白銀）只要一爆通脹，就難收拾殘局。

孫柏文作為白銀戰隊隊長，維持原本建議：強力買入。
目標價：120美元一盎斯。
有效期至：2016年3月6日。

中油香港（135）：返家鄉，所以我亦喺6月17日撤銷「一注獨贏中油香港」嘅建議。幾千股票中，有幾多能重返我建議日07年10月25日嘅價？

港交所年底見$62.85

港交所（388）：5月13日建議大家「一注獨沽港交所」。今年下半年，當人民銀行因呆壞賬爆發而收緊發債時，依家呢個「唔講基本因素，只談資金湧入」嘅股市就散。成交量跌，港交所重傷。

維持目標價：62.85 元。
年期：至09年12月31日。