睇市邊個最廢

噚日，孫柏文復出寫《金手指》。點知篇文一出街，就有個叫「cat fukwai」嘅熱心fan屎寫電郵嚟慶祝我回歸。

呢位fan屎嘅電郵，主旨係「孫柏文──恬不知恥」，話我噚日自稱係一個「專業、負責任嘅財經口水 佬」，又叫大家買我只喜愛嘅白銀。不過隻字不提我喺06年最後一個交易日推介嘅H股指數Put輪3497。如果大家有留意開股市，特別係H股指數，就應該 知道H指呢排屢次挑戰高位，所以隻認沽證由推介日嘅0.17元，下跌至0.026元，跌幅達86%。

亦因為噚日我冇講呢隻3497，所以令cat fukwai得出一個非常合理嘅結論：「蝕了86%，他就畏罪潛逃，避開一個月，如今回來，一句不提，竟自稱為一個專業、負責任嘅財經口水佬，實在恬不知 恥。貴報有此種人，實為財經界之不幸。」

首先，真係好不幸。因為孫柏文都仲係成手3497，如果大家當日都有買呢隻Put輪，而到今日都未放，我就只可以 同大家講：「同舟人，誓相隨，有血更有淚。」

「有血」因為要蝕錢，「更有淚」嘅原因係H指喺06年最後一個交易日收報 10340點（見圖）。不過，短短兩個幾月之後，下跌至3月5日收市嘅8528點，跌幅有17.5%。隻3497亦最高見0.305元，比推介價高 80%。因為當時我冇叫大家賣咗佢，所以令到cat fukwai寫電郵嚟。


孫柏文今次放假，有機會坐低檢討自己嘅無能。究竟有啲乜嘢，我係做唔到。其中一樣，就係睇大市轉勢。如果問我：「眾財經口水佬中， 講宏觀分析，睇大市邊個最廢？」就一定係我，孫柏文。

雖然，結論應該係「孫柏文唔好再做宏觀分析」，不過我一定忍唔住再做。如果他朝又見我做宏觀分析，到 時要醒水，將我當做明燈就最安全！聽日，我就講我啲微觀分析。