壹傳媒 變身 壹能源

噚日，孫柏文去完超級市場之後，喺街撞到隔籬《案內人隨筆》嘅尹思哲兄。我見到思哲兄就當然即刻入正題，問佢有冇留意近期股市最當炒嘅資源變身股，特別係前龍尾傳媒股──文化傳信。佢哋一傳可能變身，股價一日之內升一倍。因為思哲兄同 我都為《蘋果日報》寫嘢，所以就諗，如果龍頭傳媒股壹傳媒想嘅話，點樣可以變身資源股呢？幫公司諗到，股價升一倍，仲唔升官發財？

之後我一路返工都諗唔 到，就喺巴士到將軍澳垃圾堆填區旁邊嘅《蘋果日報》總部時，突然被一股堆填區吹嚟嘅惡臭，打通思維。以下就係壹傳媒嘅能源計劃。

首先，多年來困擾《蘋果日 報》嘅堆填區惡臭，就係壹傳媒變身嘅關鍵。啲臭沼氣，含有豐富嘅甲烷methane，亦即係大家熟悉嘅天然氣一樣。壹傳媒將會宣佈將堆填區嘅甲烷收集，興 建管道出售畀特區或華南，亦會宣佈改名做「壹能源 Next Energy」。

百年計劃三部曲

當然，一個好似我咁嘅小職員要 升官發財，條計一定要有遠見。好彩，雖然將軍澳堆填區嘅沼氣有限，不過開採堆填區都仲係個百年計劃，能源長採長有。沼氣用完之後，壹能源就會進行第二步計 劃，開採啲未分解嘅膠袋，到時嘅化工科技應該可將膠袋變電油。其實，大家每日棄置嘅膠袋，只係為本集團累積儲備。

而政府推行膠袋稅，只係因為知道有呢個計 劃，所以想進一步喺財政上向本集團施壓。政府知道，我哋嘅友報如果變成能源公司，都只會學諸葛孔明借東風，依靠風力發電，而佢嘅姊妹刊物就會用solar power發電，所以只打壓膠袋。

叫得做百年計劃，當然要預計埋廿二世紀嘅能源供應方法。到時候，膠袋應該已經開採完。所以，壹能源將會推行第三步計劃， 到時候將會有科技可以將港大醫學院遺棄嘅屍體，徹底復活，不過因為腦死亡，本集團就會將體溫變成能源出售。將人變成電池。到時，希望我嘅子子孫孫可以為集 團效犬馬之勞，不過冇得寫嘢，可以做保安、實Q。