上海A股不跌之謎

前日，孫柏文由九龍「飛的」（fly dick）出中環做有線電視節目《Money cafe》嘅嘉賓。到中環嘅時候，就決定煲番支雪茄，喺上節目之前可以定一定驚，思路都可以清晰啲。大家都知道，自從1月1日室內地方全面禁煙之後，煙民 可以食煙嘅地方就所餘無幾，而街邊嘅垃圾桶就變成我哋嘅聚集地。

正當我企喺垃圾桶嘅一邊煲煙，第二邊就有一個一手抓住電話、另一手抓住張申請新股「白表」 嘅嬸嬸。嗰位嬸嬸，眼望垃圾桶，不過就一路講電話解釋某間即將上市嘅公司，究竟做啲乜嘢業務。見到此情此景，我非常安慰，證明我哋特區啲散戶係有做功課先 至抽新股。正當我陶醉於此情此景，嬸嬸突然望高，同我雙目交投。佢一見到我就話：「你咪就係金手指？」 我笑一笑點頭，正當我沾沾自喜嘅時候，佢就以非常凝重嘅聲線話：「一注獨贏買和黃呀嘛！我聽你講買咗啦！」

我即時反應就係心諗：「大鑊！又令fan屎失 望。」所以我就話：「和黃真係郁都唔郁，3冇新消息，我都冇辦法。」不過我講完之後，fan屎嬸嬸轉用非常祥和嘅聲線話：「我都知道，所以我都未放。」聽 佢講完，我都即時冇咁尷尬，笑咗一笑。跟住fan屎嬸嬸就繼續講電話。

講真，和黃嘅3同埋新推出嘅收費模式X-Series真係冇乜新消息，我都係耐唔耐 上搜尋blog好叻嘅icerocket.com，睇吓前宗主國用戶有乜嘢講。我諗大家都要等和黃出中期業績先知道3係點。

Pigs can fly

其 實，和黃唔郁令我尷尬嘅理由係，今時今日真係乜叉都升，冇辦法牛市末期、禾雀亂飛。而近期升得最誇張嘅股票類別，肯定係啲資源變身股。噚日，就連做傳媒、 出版嘅文化傳信，都因被傳可能變身成為資源股，所以升咗一倍。

番鬼佬有一句說話：「Pigs don't fly.」即係話啲豬兜股暴升，遲早會跌番落來。不過，呢句說話就敗露咗啲鬼佬嘅科學常識，始終冇我哋祖國人民咁先進。因為佢哋只係將隻豬用手拋上天空， 當然會跌番落來。不過，我哋祖國就一早發明火藥，繼而成功開發火箭，明白就算係飛豬上天，只要有足夠嘅火箭推動力，隻豬都會進入太空軌迹，唔會下跌。

上海 A股已經日日證明pigs can fly！仲要stay in orbit o忝！所以，咪話豬兜股不受地心吸力影響，只係推動力太強。