Thursday, January 12, 2012

一注獨贏中國全通

今朝喺《蘋果日報》我個欄篇文

「喂肥仔,依家有冇嘢好買?」孫柏文呢排撞到啲fan屎、舊同事時,經常聽到呢句說話,而我亦會咁答:「講俾你聽之前,我想問你,中共有乜嘢係點到唔會慳,就算冇錢都唔會cut呢樣嘢嘅budget?」

咁通常,問我嘅人都會停一停、諗一諗,之後就會估,亦通常我覺得估錯。我聽過嘅答案有「搞基建!」(咁答嘅應該冇睇啲鐵路股表現),「當啲人民冇嘢食,點都會make sure啲人有嘢食!」(好似唔知國家發生過三年災害咁),「支持環保嘅投資!」(oh please)。

唯一一個諗都唔使諗,一問即答,仲要係我覺答得全中嘅就係我哋《蘋果日報》政治版同事Rapiere,佢答:「硬係維穩啦!」冇錯,國家各級政府唯一唔會減少嘅項目,一定係「維穩」,亦即係old school叫「鎮壓」嘅開支。

今日,我就係想用我隻金手指,篤呢間叫中國全通(633)作為我回巢第一隻「一注獨贏」嘅推介。大家作為《金手指》fan屎,都知道「一注獨贏」呢個金漆招牌(呢期個招牌係新嘅,因為之前個隻打爛咗)。以下就係投資建議。

建議買入:中國全通 目標價:$2.1 有效期至:2012年1月20日

呢間公司做嘅生意,就係通訊問題嘅解決辦法,客戶係國內各級省市嘅政府。佢哋提供嘅服務,低端嘅就係例如各家各戶嘅水表,由以前要搵個可能收黑錢報細數嘅抄表人,變成喺個水表加粒晶片,定時定候將用量以無線通訊方法,直接傳送到市總部。

而高端嘅例子,就係例如火警、救護、公安、武警等第一時間前線工作者嘅衛星通訊系統。省市政府要買套特別系統嘅原因,係因為有大事故時,天災或人禍下第一套失效嘅系統,多數都係普通電話網絡,因為唔係有發射塔冧檔,就係太多人同時用。

以前美軍做過個實驗,一千名士兵同四千名士兵打模擬戰。裝備一模一樣,唯一分別係一千士兵嗰隊有衛星通訊系統,四千士兵嗰隊冇。結果係一千士兵嗰隊大勝。呢個結果對全球所有揸槍單位領導嘅思維有深遠嘅影響。

而2011年,特別係年初,全球都散發茉莉花香,國內領導啲鼻咁靈敏,一定係聞到鼻敏感要搵藥醫。中國全通亦成靈丹妙藥嘅其中一個供應商。需求自然有如滔滔江水,綿綿不絕。

咁中國全通喺舊年一月同七月,即年結同半年結之後冇三個禮拜都宣佈盈喜,除之後勁升外,之前都出現春江水暖鴨先知嘅走勢。如果今次真係發盈喜,應該喺下個禮拜發,今週餘下交易日,甚至尋日,都可能出現「春江鴨」走勢。亦因舊年相繼有Sino Forest、超大現代(682)等事件,就算分析員對盈利睇好,我相信呢間非國企嘅股價未反應發盈喜呢個可能性。



大家如果跟,而公司真係發盈喜,就喺盈喜後走。唔發嘅,就過年前星期五走,當冇發生過。一注獨贏復出,都算我全面復工囉。


2 comments:

  1. i have 633 too. i agree to wait for a while.

    i also have 1149, bought @1.7 long time ago.
    any comments? shall i sell it or hold it till the report in march?

    thanks!
    (btw, fans. i bought silver and 8271 too HAHAHA)

    ReplyDelete
  2. 8271 was a complete unmitigated disaster.

    Corporate governance case study

    Anyhow, let's see how 633 do when results come.

    ReplyDelete