Monday, November 03, 2008

滙豐一日升數倍?

孫柏文喺花旗國時,曾經擁有過一架保時捷。雖然係架88年嘅924S,不過到我買嘅時候,已經係千禧年初。仲因為架車一路都係喺啲冬天要灑鹽嘅地方行走,所以到我手上時,真係生銹生到千瘡百孔。最後因為當年嘅924S,內裏機件係同大眾汽車嘅Audi一齊研發,所以經常被朋友問:「你架深圳的士Jetta點?」

點都好,部車好爽。

保時捷撼贏淡友

不過,保時捷同大眾汽車多年嚟真係有好多轇轕。大眾汽車嘅甲蟲,就係保時捷先生幫大眾打工時設計。之後自立門戶設計出嚟嘅911,就係用同一理念,所以甲蟲同911嘅DNA出自同一個人。

其實,今時今日關於保時捷嘅熱門問題,有兩個。

第一條問題就係,啲洗腳唔抹腳、就嚟被裁員嘅後生投資銀行家,幾時恐慌性拋售佢哋呢幾年買落嘅保時捷?製造機會畀啲平民百姓買。

第二條問題就係,買保時捷嘅車好?定係買保時捷公司嘅股票仲好?相信大家都聽過,上個禮拜保時捷進行過史無前例嘅挾淡友活動。佢哋運用衍生工具,理論上增持大眾汽車嘅股權,令街貨量跌到得5%。淡友拋空超過10%,個個即刻要購回,股價暴升數倍。賬面上,保時捷當然大贏。

托市要識揀地頭

不過餘波未了。原來,大眾佔有德國股市非常大比重,佔德國DAX指數比重超過20%。

咁樣被人舞高弄低,指數公司同監管機構都冇晒面,話要人為地限制大眾嘅指數比重。保時捷嘅反應:「打淡友喎!」

可惜保時捷唔係喺特區咁做,特首曾蔭權不知會幾開心。試諗吓,如果滙豐(005)一日之內升數倍?

4 comments:

  1. 嘩,揸波子咁威

    ReplyDelete
  2. All I can say is...

    Snow + Rear Wheel Drive = drift

    ReplyDelete
  3. 柏文兄認為匯控會再跌到咩位?

    ReplyDelete