Sunday, November 09, 2008

點解反對「救市」措施

噚日,孫柏文有份創立嘅自由市場智庫組織獅子山學會,舉辦咗個關於呢場金融海嘯嘅研討會。發言人係學會主席Bill Stacey。

如果你以為喺金融海嘯下,獅子山學會會支持對上12個月嘅連串「救市」措施,咁我可以好肯定你係個同一時間都覺得克魯明好英明神武嘅硬膠。

研討會度主席就「救市」措施逐單逐單咁分析,解釋點解越救越大鑊。今日,我想集中講Stacey對嗰個10月份8000億美元「買垃圾資產」方案,引發出嚟嘅後果睇法。

買垃圾方案幫倒忙


佢話:「現在其中一個令信貸系統停頓最重要原因,就係金融體制內嘅破產、清盤程序已經近乎完全崩潰。銀行應該像其他行業一樣,一旦資不抵債要清盤,手上資產應該盡快賣出,等股東、債主有個了斷。死嘅就死,幸存活下來嘅就可以好好活下去。

其實,喺 8000億『買垃圾』方案推出之前,銀行已將有還款問題嘅貸款,賣畀啲追數好叻嘅人。雖然銀行輸錢,但起碼有個了斷。美林就係咁,所以可毋須政府介入,善價沽咗自己。

點知,一推出『買垃圾』方案,所有銀行即刻停止出售問題貸款,個個都知政府出價一定高過市價,因為如果出市價根本毋須要政府介入。最後令所有銀行運作停頓,即係包括停止放款,個個等各地政府嘅下一步。

鼓勵銀行等人救


如果我只能作一項建議,就肯定係政府要即時發出唔會再干預金融機構生死嘅強烈訊號,之後確保清盤程序有效率咁運作。私人機構手中有大把錢同方法,去重新撻番着信貸系統,不過佢哋一日要驚自己唔知政府會做啲乜,一日都唔會出手。」

大家明白點解獅子山學會堅決反對政府出手干預啦,因為最終越救越死。

2 comments:

  1. 你睇吓美國減息,香港D銀行仲唔願意借錢就知喇

    ReplyDelete
  2. 你老友施生話當香港樓價跌過30%時,要政府入市買樓,你又點睇呢位自由市場既戰友?

    ReplyDelete