白高敦狠打奧巴馬

周末舉行嘅G20會議有冇料到？純粹睇聲明，全世界嘅傳媒行家，已經話冇。佢哋咁講，因為聲明中冇啲可以做頭條嘅「開水炮」決定。不過孫柏文話呢個係好事，起碼G20嘅官員知道呢啲水炮動作已經冇用。

例如有行家話冇減息所以冇料到，咁之前減息有用咩？又有啲話冇泵新錢，咁泵幾多先有用？7000億美元？4萬億人民幣？咪就係冇用囉。當今市場參與者，已經好難撻着變興奮，所以份聲明應該冇炒作港股嘅角度。

新政策大方向解危機

不過對於解決根本嘅信貸危機，聲明中有好多新政策「大方向」，如果有心機落實，真係可以解決危機。G20已定咗09年3月31日，作為落實呢啲新政策嘅期限。所以要知係咪可以解決危機，就要睇吓落實細節。

例如，今時今日好多結構性產品市場已完全停頓，冇買賣。箇中原因，就係呢啲結構性產品嘅風險評級冇人信。多都唔講，淨係特區政府嘅證監已經唔信，你試吓今日話要賣AAA級結構性產品，攞銷售刊物畀證監批，睇怕到曾蔭權下台都未批。

所以，G20聲明話要喺 3月31日前，杜絕評級公司嘅利益衝突，如果真係做到就可以令市場對評級重拾信心，買賣又可開始。

通用汽車救不得

最後，一定要讚英揆白高敦，佢係第一個狠打奧巴馬嘅外國領袖。

白高敦已經大聲話，奧巴馬好想救嘅通用汽車唔救得，因為一救就會令全世界嘅社會主義硬膠大玩政府補貼，最後演變成貿易戰爭，世界各國啲排外嘅好戰鷹派就會得勢。

仲有，白高敦話世界貿易一定要更自由，否則一定大鑊，說話擺到明鬧花旗民主黨控制國會同奧巴馬。

今次G20會議，仲有好多嘢要跟。