早排10月日日大跌市時，孫柏文有次睇花旗國財經台CNBC，節目主持人訪問一位行對冲基金咇嘅記者。
相信大家都記得，當時個市日日跌嘅其中一個原因，就係有好多投資對冲基金嘅有錢佬，大量贖回。引致對冲基金對於手上資產有價就沽，套現去應付贖回要求。
高呼好掂有玄機
當日，主持人問：「啲對冲基金呢排有乜風聲？」嗰位記者答：「以前搵佢哋講多兩句都難。不過今時今日，有幾個好有名氣嘅對冲基金經理，都特登打電話畀我，係咁講佢哋有幾掂。」講到呢到，一眾主持人立即一齊大笑。
跟住位記者補充：「打得電話嚟話自己有幾掂，就肯定唔慌好嘢啦！」講完，眾主持人又再起哄。
今日同大家分享呢個故事，就係因為睇到有個做玩具嘅實業家高姿態講投資貼士，同全世界講話自己掂到可以畀貼士嘅人，佢呢排仲唔掂過碌蔗！
有工冇假仲想點
不過點都好，呢個金融海嘯都好難捱。大到好似通用汽車，都話唔知捱唔捱到09年。所以，我相信大家未必細心研究過09年嘅日曆。
不過如果大家出年仲有份工，咁我有個壞消息。09年嘅清明、佛誕、中秋、boxing day等紅日，全部都係禮拜六。
不過有得怨，總好過冇得怨，起碼冇被裁員。
不過如果你失業，咁我唯一可以安撫你嘅說話，就係嗰班公務員喺09年仲唔還番畀啲納稅人？5天工作咁開心？可以當啲禮拜六紅日冇發生過啦！
Subscribe to:
Post Comments (Atom)
No comments:
Post a Comment