千禧選舉翻版？股民自危

「咩話？仲未有新總統？搞咩呀？」記得當年千禧年11月大選日，孫柏文喺花旗國。嗰晚，一見到Fox News Channel話布殊贏咗佛羅里達州之後，就走去瞓覺，諗住事件已塵埃落定。

不過第二朝起身，已經見到我個十年唔睇新聞台嘅同房，開着個電視睇新聞台，仲要係目瞪口呆咁睇。我問佢點解咁神心，佢解釋之後，我就忍唔住咁講咗以上嘅說話。

票站調查信唔過

其實，根據以前民意調查嘅準確度，奧巴馬應該成為下一任花旗國總統。不過如果未來嘅歷史學家，要為2008年用幾個字做總結，一定會將今年形容為「往績不能預測未來」嘅一年。債券市場嗰啲信貸評級錯晒，可能選舉嘅民意調查都係咁。

噚日，已聽到有人話如果禮拜三，花旗國只要能順利選出新總統，只要冇波折，港股已能升。不過作為一個惟恐天下不亂，驚冇新聞嘅傳媒工作者，其實真係有少少想嚟個2000年翻版。

一旦出事股市冧

多唔好講，選舉日做嘅票站調查，應該會學特區選舉咁，錯得好離譜。點解？因為奧巴馬嘅支持者非常熱情，一定大大聲話投咗畀佢，麥凱恩嗰啲就會比較低調。結果可能令票站調查話奧巴馬按韁輕勝，令全世界一早就有迎接黑人總統嘅預期，點知一點票就……

不過，對最唔鍾意不明朗因素嘅全球股市來講，喺信貸危機當中，如果投票率破晒紀錄嘅話，分分鐘會出現好多票站問題。一旦票數接近，官司就會滿天飛。如果你驚有咁嘅情況，好彩今日特區開市時，花旗國仲有地方未投完票──即係仲有機會做買賣保護自己。

今日出唔到新花旗總統，個個股民自危。

---------------------------------

A clear cut election.

I like everyone else, awaits Obama's next move.