Tuesday, November 11, 2008

幾個「市道有幾差」指標

孫柏文相信大家都感受到環球市道差。睇數據往往都話係n年嚟最差,不過問題係又有幾多人真係行走江湖n年,知道情況有幾壞。所以,今日我就為大家提供幾個故事指標,希望能令大家更明白今日有幾壞。

指標一:大陸現在廣泛流傳以下睇法。
1949年,只有共產主義能拯救中國。
1979年,只有資本主義能拯救中國。
1989年,只有中國能拯救共產主義。
2008年,只有中國能拯救資本主義。

BitTorrent裁五成員工

指標二:花旗國研發點對點下載軟件嘅 BitTorrent公司,宣佈裁減五成員工。相信作為《金手指》fan屎,你應該知道 BitTorrent,就係啲網民用嚟(有時候冇授權之下)下載電影、電視劇、音樂等嘅軟件。佢哋都要裁員,即係為賊仔造爆格工具都冇運行。

指標三:現在金融危機已令到好多祖宗十八代留咗大把錢喺度,發到毋須要追問世事嘅師奶,都想知究竟發生咩事。當今世上最毋須要追問世事嘅師奶,肯定就係英女皇,連佢都想知前因後果。所以佢就請咗個倫敦政治經濟學院LSE嘅教授,去白金漢宮講解吓。

教授講解完之後,英女皇就問:「點解咁大鑊,都冇人預見到?點解個個都睇唔到?」
教授答:「每一階段,啲有關人士都依賴其他人把關,搞到個個都仲估自己做緊啱嘅嘢。」
英女皇聽完就話:「Awful。」

我只可加多句:「Awful indeed。」

2 comments:

  1. 其實, 依家的股市升升跌跌, 表面上d救市措施好似有效, 但係, 真正的金融海嘯是否已經到咗, 抑或現在只係見到暗湧.

    如果現在只係暗湧, 咁到有一日真係衝擊嚟時, 真係唔知點算!

    換另一個角度睇, 呢d就係中國人嘅傳統智慧, 人有三衰六旺, 看風唔好駛盡悝, 呢d就係大執位嘅時間...好似榮生咁...

    ReplyDelete
  2. 究竟一個國家是否可以破產?係咪因為銀紙可以無限印,所以根本唔會有國家破產呢回事?今日傳 IMF 唔肯對冰島撥出貸款,咁點算呢即係?

    ReplyDelete