Sunday, November 16, 2008

填表兩頁 千億到手


噚日,孫柏文喺屋企上網做緊資料搜集時,利世民忽然寄網上短訊畀我。短訊中,世民兄話:「好耐冇見。」亦問我近況如何。見佢咁有心,我就寄咗個網址畀佢,跟住叫佢去個網址度,填張表格去攞錢。

銀行求救易過借火

幾分鐘之後,佢回覆:「嘩!張攞錢申請表得兩頁,就連包括公司名、電話號碼、簽名、填表日期等嘅基本資料,都係得20條問題。攞錢快夾易!」

大家唔好誤會,仲估個網址同表格係啲乜乜兄弟財務公司。其實,個網址係花旗國聯邦政府財政部,而張表格就係畀啲銀行申請去攞嗰筆7000億美元救市方案嘅錢。

相信大家都半信半疑,不過張申請表真係得兩頁A4紙咁長,唔信可以去我嘅blog睇。

一場金融海嘯,監管一掃而空。

做錯決定政府善後


講真,銀行出事皆因太過進取,做錯咗好多商業決定。現在落得呢個田地,居然有人救,不但幾千億,仲要表格得兩頁。咁嘅政策,最憤怒當然就係嗰啲成功時要交重稅,不過作出錯誤商業決定時要自食惡果、冇人救嘅一群。

咁即係邊啲人?咪就係喺花旗國搞高科技嘅人。

大家要記得,當年克林頓可以將財赤變成盈餘,就係依靠科技股升值帶嚟嘅資產增值稅。不過當dotcom泡沫爆破時,有人出手救佢哋咩?

當然,佢哋冇要求政府救,因為佢哋好儍、好天真咁履行「做錯決定要執笠」呢個自由市場定律。到今時今日,佢哋個個都慨嘆,真係太過笨拙兼老實。

矽谷真係怨氣重。

5 comments:

  1. 孫柏文,我係 IT 人,曾幾何時真係對未來嘅世界充滿希冀。特別係 2000年嗰段美好日子,小弟真係覺得連王小虎等黃玉郎漫畫都話攪 web site,呢世真係唔駛憂。

    自科網股爆破後,唯有面對現實。

    家下睇到你呢篇 post,金融機構倒閉有政府救,但當年科網股爆破完全冇聽過話有人會救科技股,火都嚟埋!孫柏文,你好嘢!我真係好嬲,雖然只係嬲呢個世界好唔公平,金融機構就 too big to fail 但 IT firm 就一雞死一雞鳴。

    唔係嬲你但睇完你篇 post 唔知點解真係好火滾。

    孫柏文,我真係好嬲!你成功令到睇你篇 post 嘅 IT 人扯火,明明冇怨氣都變有怨氣,仲攪到我有 D 眼濕濕,你好嘢!

    ReplyDelete
  2. 可能仲要交其他 document 呢 !

    ReplyDelete
  3. 真係好火滾!家下呢個乜嘢世界!?請問有冇人話俾我知乜嘢叫自由市場!?我都有買 AIG 保險,但政府如果因為佢大而唔俾佢死,長遠嚟睇係咪又好心做壞事?

    孫柏文, just want to tell you I feel extremely angry after reading your post. Even 對象唔係你,但睇完你篇 post 真係唔知點解好大反應,家下仲好激動。

    真係好想喺度爆粗!

    ReplyDelete
  4. u guys seem don't get it, we r facing very serious economic melt down, if gov didn't save AIG, there will be numerous banks go bankruptcy because they have brought lots of credit default swaps which will lead to chain effects to other business which we can't bear the consequences.

    ReplyDelete
  5. 唉,係人知 AIG too big to fail 啦,都係嗔下咁啫。

    ReplyDelete