消費券？建華味濃

前日，孫柏文聽到立法會中，啲抽水議員話要求政府派發「消費券」，去幫助零售業。

大家一定會問：「如果要啲一次性還富於民嘅動作，點解啲議員唔直接要求退稅？如果怕交稅多嘅人攞番自己嘅血汗錢，點解唔人人派現金算？」

立法迫消費行唔通

點解唔派現金？因為怕大家攞咗錢之後唔用，擺番喺銀行，而銀行又同時冇能力或唔想放債，到時政府派錢都谷唔起經濟。

有見及此，啲低能議員就提議「消費券」呢條屎橋，諗住立法規定要消費，啲人就會消費。

究竟佢哋明唔明點解我哋唔肯消費？唔係因為我哋冇錢，而係因為我哋對前景冇希望。先唔講當一個消費者諗未來時，政府啲一次性動作係唔會有正面幫助。淨係因為「消費券」呢啲低能屎橋，實在太似當年董建華聽啲抽水議員提議而落實嘅動作。

董建華味太濃，更加嚇到啲人唔消費。

學台灣掂極有限

點解咁低能都提議？因為啲議員中五會考經濟科攞A。根據會考經濟科syllabus，七百萬人每日作出嘅經濟活動決定，用一條方程式就可以推斷。泵好多百億錢、谷谷消費，甚至乎學好似以前財政司梁錦松咁，想做啲嘢「勸阻」個人銀行存款，經濟就會欣欣向榮。

當然，大家可能會話：「不過台灣都推消費券喎。」我可以話，如果台灣啲經濟政策咁掂，經濟上我哋就唔會咁睇佢哋啦。