笑住送走08年

場景：劍橋大學課室，凱恩斯做講師教經濟學。有一個之前嗰晚，跟佢喺利物浦足球隊踢波嘅朋友去玩嘅學生，因為酒氣未除、筋疲力竭，所以上課時瞓着咗。

凱恩斯見到佢咁，就即刻大發雷霆，走過去學生度大力拍枱，跟住要求個學生答佢啱啱問嘅問題。

學生即時彈起身，雖然嚇一跳，不過清醒起嚟咁答：「亞 Sir，我真係聽唔到你問乜。不過答案係政府應該加大開支！」

格老帶挈滑板仔

喺外國，各行各業好多時有個patron saint「主保聖人」，例如蛋糕師傅嘅主保就係St. Honore。

咁時代變遷、科技先進，好多活動都未有主保，而聽聞喺花旗國踩滑板班板仔，啱啱推薦咗格林斯潘做佢哋嘅主保。

原來啲板仔好鍾意喺啲冇水嘅泳池裏面踩滑板，因為泳池設計往往都有平滑嘅斜坡。最弊係之前啲泳池喺人哋屋企，所以就算冇裝水，去踩板會俾屋主鬧，甚至被差佬拉。

不過到今時今日，板仔踩板嘅「場地」就多咗好多。

咁點解要搵格林斯潘做主保呢？因為如果冇咗佢嘅話，又邊會有咁多被荒廢、冇裝水、點樣踩滑板都冇人鬧嘅泳池？

諮詢未完可推翻

最後，我想令啲合和（054）股東興奮吓。

特區電台節目主持李慧玲，喺上市公司董事禁售期事件中，話到明啲公司反對係錯。原因係諮詢咗一年，o依家先反對，有冇搞錯。

不過早前，90年代合和個前稱Mega Tower嘅計劃，諮詢十幾年，李慧玲咪今年先至做嘢反對。成功推翻之後，仲要將聲帶剪輯成推廣該節目嘅廣告。

孫柏文唔知個廣告仲有冇播，不過是否代表Mega Tower可以復活？唔通一注獨贏買合和？