增長6.1%？好炒！

「保八」、「保八」。重複又重複，相信大家聽過無數次。MC Jin遲早都會用嚟rap。

中央對於保住經濟增長，維持喺8%以上嘅決心，有如當年用嚟「追英趕美」嘅「大躍進」咁強。

大家都知，自從1月開始，祖國啲股市越升越有。大家不知幾開心，諗住升一定係「無所不知」嘅市場，將經濟復蘇反映喺股價中。

點知，一出祖國第一季貸款數字，先知股市升，係啲人被迫借錢後，谷咗入個股市。

迫銀行放水谷股市

當銀行被迫亂借錢畀人，令貸款喺3月比舊年升6.6倍時，可以同時令股市今年至今升39%。

我哋就要問，究竟4月貸款會否比舊年升13倍，令股市升多39%。貸款升13倍。有冇可能？

不如等孫柏文研究吓。

如果係銀行，一定唔會自願咁樣放錢，因會輸太多錢。幾日前講過祖國正在發生全國性大規模嘅按揭詐騙，如無意外，幾年後所有今日放水嘅銀行，將會需要國家注資。咁即係要迫。

會唔會呀？有好大機會。

原因係當新增貸款升5600%，第一季經濟增長都係得6.1%，要第二、三、四季不但要有8%增長，仲要追番第一季剩落嘅2%。13倍？真係可能。

不過如果市場見6.1%增長，都唔升。就等於市場覺得就算中央迫，銀行都放唔到咁多錢。而冇再多貸款，搵邊個接貨炒上？