多謝父母官！

父母官萬歲！電盈（008）單嘢真係峯迴路轉，如果有人開盤口，「私有化成功」肯定大熱。如果係亞洲盤，「成功」要讓球畀「失敗」！

呢幾日，我只係聽過一個人估上訴庭會砰低電盈私有化，呢個就係我老竇。不過如果係賭波膽，佢都係買2對1，佢話貌似我嗰個會畀私有化，所以今次3個法官以三比零姿態否決，算爆大冷。

爆冷判決開先例

同分析員預期差咁遠，係因啲分析員淨係識以legal唔legal去睇。大家都知上訴庭今次係社會明燈，手執torch，帶住啲用pitchfork嘅小股東抵抗啲「女巫」。

之前同老竇傾傾吓，佢老人家就開始離題，又講以前殖民地時代點點點。佢話以前有啲律師因深知每個官嘅思維係點，所以有時想自己個客避開某啲官，即judge shopping，老竇話呢個行為好唔得。不過佢話千祈唔好法官人選落實之後想退貨，因為一旦唔成功就……我答：「老竇可唔可以講番電盈？」佢老人家聽唔到我嘅哀求，繼續講殖民地時代。

最後，我想讚上訴庭3位法官，將父母官主義呢個優良普通法傳統發揮得淋漓盡致。

Thank you for legislating from the bench，very proud。

不過唔知噚日電盈宣佈投降唔私有化、唔上訴上終審庭，又係咪出乎所有人意料？係定唔係都好，再多謝法官，congratulations，you have now set a glorious precedent。