大陸有按揭詐騙 = 樓升係虛火？

OK。

你係一個喺加州起樓嘅地產商。

你喺07年動工嘅住宅大廈，差唔多完工。

你一路有錢繼續起樓嘅原因，係因為07年銀行為咗搶生意，借錢嘅條款寫到好就你，冇因金融海嘯落雨收遮。

不過到09年第一季，根據你同銀行嘅協議，你要賣樓，仲一定要喺某個底價之上，如果唔係你公司要即刻賠錢。

問題係，現市價低過銀行定嘅底價好多，如要賠錢，公司即刻周轉不靈，要結業。點算？好簡單。求其搵十個八個喺信貸泡沫度冇借過錢，身家清白嘅墨西哥新移民做人頭。

跟住叫佢哋喺底價買，又搵個「幫弱勢社群置業慈善基金」送兩成首期畀佢哋，之後就做按揭。

因花旗政府已命令兩房有錢放錢，佢哋一定會借到錢。買賣成功後就畀每個墨西哥新移民一筆安家費，叫佢哋返鄉下。啲人頭失蹤後，兩房就要接收啲樓，你作為地產商就成功甩身。

樓價升係虛火？

大家可能會話：「美國人正騙子！」

其實，我係講緊祖國。你只要將「墨西哥新移民」變成「民工」、「兩房」變「大陸銀行」就係今時今日大陸第一季，信貸額大幅飆升嘅結果。

為咗「抗海嘯」，銀行嘅風險部門俾人擺埋之後，就會有咁嘅後果。

係咪大鑊？咁就要睇究竟銀行接咗啲銀主盤之後，樓價點走。

如果升，銀行仲賺多筆，變成啲人越呃、銀行越搵錢嘅奇怪現象。

最後，千祈唔好覺得因為有大規模按揭詐騙，大陸樓市升係短暫虛火。睇花旗國就知，只要按揭詐騙規模真係夠大，可以長升長有、升到你唔信。