搵銀行工就要搵佢

花旗國有間銀行叫Beal Bank，各位冇嘢撈嘅財經界才俊如果想搵工，不妨寄信去，因為佢哋請緊人。不過，我要警告所有想幫佢打工嘅人，呢間Beal Bank嘅老闆叫Andy Beal，鍾意飆車、賭啤牌，仲要銀行本身喺06年被監管機構瘋狂問話。

06年停放貸被問話

評級公司雖然冇郁間行嘅信貸評級，但當年都係咁捽Beal Bank，話佢哋個營運模式係「unsustainable（不能維持）」。

大家可能會問：「當年監管機構冇問話嘅公司，今日已出事，評級公司話『AAA』嗰啲，家吓都爆咗，呢間Beal Bank咪好有問題？」

咁大家知唔知點解佢哋俾人捽吖？原因係老闆Andy Beal到04年，覺得個信貸市場已經黐咗線，啲人放債嘅息率冇可能咁低，所以決定完全停止做新貸款。

最緊要係個債市進一步黐線，息率到06年時低到爆，Beal Bank直情自己出債券借錢。30年定息，貴過LIBOR只1.7厘，勁掂。

因為又冇放新貸款，故不用靠存戶存款，變成一間冇存戶嘅銀行，認真少見。

因為評級公司、監管機構唔係捉錯，而係捉啲怪事，所以呢間唔放新款嘅銀行，就係咁俾人鬧。

咁Beal Bank依家點？大舉入市啦！好多被撇咗嘅債，俾佢哋買咗。仲要越買越多，所以先至要請人幫手。

搵銀行工？就要搵 Andy Beal！