一注獨沽港交所

係《金手指》fan屎都知，孫柏文一出「一注獨贏買XX」，就等於我有股票推介。

今日，我自上次07年7月30日後第二次倒轉。唔係叫大家「一注獨贏」，而係叫大家「一注獨沽」。沽嘅股票就係港交所（388）。

其實禮拜一已經想寫「一注獨沽港交所」，建議大家買佢跌。不過因上周寫咗「嚴守Sell in May」三之一、三之二，所以要寫埋三之三。

禮拜一提過，港交所當日開市好大機會升到飛起，但又要從當日嘅高位，今年內跌一半。咁嗰日港交所因印滿「金融」兩字嘅CEPA 6協議裂口高開，一朝早已見125.7元全年高位。

做咗個預測兼買賣建議，當然要落實。

今日，就提供以下投資建議。

建議沽出：港交所（388）
目標價：62.85元
年期：至09年12月31日

升市動力靠唔住

港交所擁躉好多，喺《蘋果日報》我啲同事當中都唔少。不過今次升浪實在太誇張，短短兩個月由低位升過一倍。

依家被推到呢啲位，第一因資金流向同大家預期流向會繼續，第二就係疑似經濟春筍。

咁第一，我覺得資金好快就會好勁咁流走，第二就係春筍其實係中國製綠色硬膠粒。

已經有18個月冇用過「一注獨贏/沽」呢把劍，今次係咁多年嚟最有信心嘅一次。最後同大家講多一次，一注獨沽港交所！