電盈目標價：$0

由於特區始終係國際資金集散地，大家炒港股嘅時候，無可避免一定要留意外國好似唔關我哋事嘅嘢。

大家千祈唔好覺得孫柏文講緊墨西哥豬瘟，其實我係想提吓大家關於巴勒斯坦嘅哈馬斯，佢哋卒之成功開發大殺傷力武器。

冇錯！上個禮拜哈馬斯宣佈，成立佢哋第一間銀行。你話驚唔驚？

股價越高小股東越啱

講起驚，我真係為嗰啲上個禮拜企喺上訴庭出面，不知幾咁開心嘅電盈（008）小股東擔心。點解？好簡單，李澤楷出4.5元向你買股票，仲話係明益你，就即係李澤楷同你講：「李澤楷管理嘅電盈唔值4.5元一股。」

你唔同意，就即係信「李澤楷管理嘅電盈唔止值4.5元一股。」

原本私有化成功，究竟邊個啱會係一個謎，但依家繼續有得買賣，股價就一目了然。

好，如果我問你：「李澤楷會用盡全力證明佢自己啱？定係錯呢？」佢錯，就等於股價升過4.5元。甚至升得越高佢就越錯，上訴庭法官、小股東越啱。

不過掉轉頭，股價越低過4.5元，李澤楷就越啱，上訴庭法官、小股東就會大大聲聽到李澤楷沉默地話：「I told you so，suckers！」

買李澤楷管電盈唔值$4.5

咁最能證明李澤楷「啱」嘅股價係幾錢？如果越低就越啱，冇嘢低得過零。

我今日就買李澤楷嘅「李澤楷管理嘅電盈唔值4.5元一股論」啱，仲要極啱。

所以，我嘅電盈目標價係零，遲早被債權人接管。

順帶一提，其實做股東可以「慘過零」。要你供股時就輸晒仲要嘔突。