嚴守Sell in May（三之一）

Sell in May，go away。三月開始不時見到好多行家評論員，寫文章或上公仔箱提醒大家今年要嚴守Sell in May呢個策略。

策略呢啲嘢，永遠都係冇壓力嘅情況下制訂嘅。問題係，講就天下無敵，做嗰陣就千祈唔好因貪婪或恐懼而變成有心無力。

如果要跌，肯定唔會由基本因素引致。因為基本因素冇好過，啲乜嘢green shoots「青筍」，係啲花旗國官員老吹，你見到嗰啲疑似經濟「青筍」，根本唔係有生命力嘅植物，其實係大陸製嘅綠色硬膠粒，完全係大陸人為插落地。

唔講基本因素，就要講心理同氣氛。如果要我估，又係花旗吹來嘅冷風。一切由佳士拿同奧巴馬所致。

喺花旗國，當一間公司進入破產保護、重組狀態，間公司就係喺法庭，即三權其中嘅司法制度控制下。

好簡單，立法機關通過破產法之後，即係定破產程序，法庭就會跟程序做。好處就係有完善嘅破產法，有資本嘅人就知一旦債仔出事時，點樣解決。透明度夠高，有資本嘅人就肯借錢出去。

問題係，佳士拿上個禮拜進入破產保護後，行政機關阿頭奧巴馬就指手畫腳，係咁插手破產程序。

奧巴馬踩過界有後遺症

原先，一間公司破產，排頭位攞番錢嘅應該係嗰啲當時要有抵押品先放水嘅債主。點知喺佳士拿，奧巴馬居然想將呢班人貶喺原先排最後嘅員工後面，畀佢哋攞得番雞碎咁多。

無他，佳士拿員工有工會，工會支持奧巴馬。

如果奧巴馬成功，後遺症係乜？所有有工會嘅公司即時冇人會借錢畀佢哋。大家就睇吓奧巴馬越界侵蝕司法獨立成唔成功，一旦成功，花旗又掀信貸緊張情況，股市就大煲。