嚴守Sell in May (三之三)

原先，孫柏文今日《金手指》條題係「一注獨沽港交所（388）」，跟住就解釋港交所雖然今日好大機會升到飛起，但將會從今日嘅高位，今年內跌一半。

不過因上周寫咗「嚴守Sell in May」三之一、三之二，今日就寫埋三之三。

美銀子公司美林，上個禮拜有個叫David Rosenberg嘅經濟師轉工。佢基本上係該行我覺得仲可信嘅分析員，有預測到今次金融海嘯。喺美林臨走嗰日，佢仲留咗13句做預測時要謹記嘅真言。

做預測13條守則

1. 要自己個經濟預測有用，就一定要同時建議埋買乜、沽乜。
2. 千祈唔好做數據奴隸，冇嘢勝過有智慧咁睇番個大環境同趨勢。
3. 主流意見好少啱，太樂觀。除咗見底時。
4. 談戀愛嘅對象應該係自己老婆，唔係自己個預測。
5. 冇兩個周期係一模一樣。
6. 永遠唔可以將責任卸落個預測方程式度。
7. 要不斷搵新證據去測試原先個預測。
8. 「市場先生」講嘅嘢，你要尊重。
9. 要留意自己嘅預測要幾耐先會「靈」，因為好多客其實只想短炒。
10. 咁多個市用不斷跳動嘅市價同你「講」嘢，通常都係債市「講」嘅嘢最準。
11. 一開始就要解釋清楚，你個預測如果唔中，可能會因為啲乜。
12. 估到花旗國消費者嘅意向，個預測都好難錯。
13. 經濟增長時，過癮過衰退時。

佢亦有話，花旗股市今次個升浪，上周五應該見咗頂，之後要再試低位。最後一句，記得今年要嚴守Sell in May。