美財政部應學《有線》

孫柏文老竇成日都話，考試要公平，就一定要有普通法制嗰種「考試面前人人平等」嘅精神。試卷一樣固然重要，但改卷結果嘅穩定性都不能忽視，唔可以因被審或被考嘅人係邊個，就放棄人人平等嘅原則。

例如噚日，《有線電視新聞台》就搵咗陶傑兄，試做連考評局都話冇標準答案嘅通識科試卷，跟住就畀咗3個教通識科老師改卷。為保公平性，冇同嗰3位老師講邊個係「考生」。

壓力測試要人人平等

結果係點？兩個老師肥陶傑佬，喺最後一條，一個老師仲要畀零分。

我嘅結論？呢個制度咪大公無私、人人平等囉！連陶傑都肥佬，一旦你呢個會考生攞到個E，仲唔勁過才子？呢個制度仲唔「公信第一」？

所以我就話花旗國財長應向《有線》學習。之前嗰個銀行「壓力測試」，未考已知邊份卷跟邊個考生，邊會大公無私、人人平等。

試想像吓，如果你係幫《有線》改卷嘅老師，未睇卷已知係特區文字界嘅JP Morgan--陶傑寫嘅，你都會淆底。

有好消息！唔使想像老師淆底，直情有得睇，google「有線」、「陶傑」就得。

特首驚我哋唔夠政治人才，如果以小弟嘅指標，即係搵陶傑做政治助理完全overkill，根據拉curve制度，每年有六成會考生即時qualify攞十幾萬人工。

不過花旗國財長可能會話：「唔睇人就改卷，分分鐘帶來系統性風險。」呢個都唔錯得晒，因陶傑被問及佢肥佬點睇時，都係答：「根本個試題唔合格。」通識科？玩完啦！