中電：香港民主概念股？

噚日，中電002升咗4.16%，全（股票市）場嘩然。一眾公用股分析員被問及中電大升嘅原因時，都個個口啞啞。有一個無奈嘅分析員，仲話可能係因為向中海油買天然氣嘅消息出籠，所以先至會大升，不過聽佢嘅語氣，好似佢自己都唔相信。

孫柏文話， 其實係因為周日舉行咗場特首選舉委員會選舉及其連鎖反應，先至係中電大升嘅理由。大家可能會問：「有關係？」有關係！表面來睇真係冇乜關係，不過，睇深一 層，唔係冇道理。首先，噚日完全冇新聞或公司公布，可以解釋到中電點解大升，不過，噚日係有市場傳聞話，有私募基金private equity想打中電主意。

私募基金係乜？就係一啲好有錢，不過冇投資項目限制嘅基金。私募基金資金來源，可能係大學嘅信託基金、有錢家族、甚至保險公 司。今次，我話私募基金睇中中電喺特區嘅發電業務，有穩定嘅回報，所以喺呢個低息環境之下，想高價買該業務。 咁點解中電想出售特區發電業務？因為嘉道理家族，可能睇到特區政府就快要檢討，特區發電公司一向有嘅利潤保證…sorry，I mean「利潤管制」計劃，而檢討結果可能對特區發電公司不利，所以先至想出售業務畀啲私募基金。

希望嘉道理全數派息

咁 點解政府檢討特區發電公司嘅利潤管制，會對發電公司不利？其實，我哋特區發電嘅利潤管制，一向以來都係發電公司加電費嘅理由。所以如果有用電者要求減電 費，利潤管制分分鐘會冇咗。而喺特區，因電費過高而去投訴得最厲害嘅用電者，就一定係一班冇發電業務，不過有好多喺港島商場嘅大地主。

咁點解政府會聽佢哋 嘅說話，減電費？理由係周日舉行咗嗰場特首選舉委員會選舉，「港島區發電派」候選人失利，「民主派」大勝，僅有嘅「可以講數派」委員就會變得非常矜貴，佢 哋要港島減電費，政府一定會檢討發電公司嘅利潤管制。雖然目的係打擊港島電費，不過，後果就係一竹篙打一船人，中電都會遭殃，所以，嘉道理家族先至想高價 賣盤。結論係，民主派越能威脅曾特首，中電就越會升，中電就會咁變成香港民主概念股！最後如果真係賣盤，我衷心希望嘉道理家族可以全數派息，跟住好似佢哋19世紀喺上海生活嘅Kadoorie祖先一樣，大 手、大手買白銀！

對和黃要有信心

今日，孫柏文首先想和應《曾淵滄專欄》一欄總舵主曾淵滄兄，對和黃13股價近期走勢嘅睇法。噚日，曾淵滄兄話：「和黃股價近日走勢很飄忽……老是一天升一天跌，真不 容易捉摸。」小弟一睇到呢個見解，非常同意。無辦法，有呢個現象係因為，一路以來被譽為和黃絆腳石嘅3G業務，進行文化大革命，將營運模式、服務收費方法 完全改變。雖然，我已經多次講過對今次改革嘅信心，不會因為市場仲未肯定今次改革會否成功，所以和黃走勢就會好飄忽。

仲 有，近幾年和黃每逢接近年中、年尾嘅時間，都會因為想粉飾中期或全年業績而賣「家當」。今年5月試過出售碼頭業務，現在市場就估究竟除咗 Priceline.com之外，仲有冇其他賣「家當」行動。市場一路都有傳聞，和黃會投降，將3G業務旗艦英國3UK出售。呢個傳聞我覺得好難相信，唔 係因為和黃有甚麼情意結，而係因為冇人可以出一個能夠滿足和黃（同我）嘅價。

不過，我相信和黃絕對有可能出售電訊業務，之不過唔係英國業務，而係和黃佔有五成股權嘅和記電訊旗下嘅印度2G電訊業務。呢幾日，《華爾街日報》、《金融時報》都紛紛傳出和電想賣印度業務嘅消息。大家都知道，和黃管理層作為理性生意人，真係乜都可以賣，最緊要係作價。

《華 爾街日報》就報道話，有人出價80億美元買和電印度業務嘅股權，《金融時報》仲誇張，話有人出價140億美元，即係差唔多1100億港元。如果我冇計錯， 和電將出售收益攞嚟派息，和黃就可以進賬550億港元。始終80億同140億美元分別好大，大家如果有跟住我嘅建議買咗和黃，就一定要忍耐和黃股價可能會 有比較大嘅波幅。

哈企來港上市，哈哈哈！

呢 幾日，特區金融業吹咗好多從哈薩克斯坦Kazakhstan嚟嘅風，話希望特區可以提供金融服務畀哈國啲企業。呢個消息，對於我呢個前石油分析員來講非常 鼓舞，因為哈國「寸油尺土」，肯定為我哋帶來無限商機。就連港交所周文耀，都話希望可以喺08年見到有哈國企業來港上市。

不過，我再諗深一層，某個國家嘅 企業想來港上市，使唔使出到港交所高層，好似「計劃經濟」咁話「希望見到」？不過最終，我都接受哈國企業來港上市，係一定需要港交所高層嘅「祝福」。無他 嘅，大家可以試吓問問喺我哋特區做企業融資嘅banker們，如果無端端攞一份哈國企業嘅上市申請去有關部門申請上市，一定會被證監會同港交所係咁叉、 叉、叉。因為證監會同港交所裏面啲官員，最怕就係孭鑊，只要冇公司可以成功上市，佢哋就唔會有鑊孭。近期一大班分分鐘會出事嘅祖國銀行點解可以上市？上市 係國家政策，就算出事，又點會輪到特區啲小官員孭鑊？

不過最後，就算冇啲驚孭鑊嘅官員，都未必有哈國企業來港上市。因為要我哋特區啲嬌生慣養嘅投資銀行 家，去好似哈國呢啲渺無人煙嘅地方，真係好難。大家只要睇下班要跑大陸投資銀行家、會計師、顧問等等嘅blog，就知道點解。

Land of Borat, in the middle of no where...

打工想上位咪學Yumiko

噚日，孫柏文講 過，今時今日如果你係一個想紅嘅藝人，就一定要有觀眾最想見到藝人應有嘅，最稀罕、最有價值嘅特質，就係要真honesty，同處變不驚 toughness。我講藝人可以點樣先至紅，全因為「藝人」都只不過係一樣產品，而要成功推廣任何產品，都一定要知道消費者（觀眾）嘅需要。我亦引用咗 啱啱甩過褲嘅Yumiko作為反面教材。

想知道點 解Yumiko係反面教材，一路都紅唔起，大家只要睇佢甩褲翌日，喺電視螢幕上喊，仲話因甩褲所以取消工作，就會明白得到。因為對於一般年輕人來說，實在 係太假太廢。試問，如果禮拜日甩褲嗰個唔係Yumiko而係張栢芝，你話張栢芝會唔會第日喺電視螢幕上喊，會唔會因甩褲取消工作？唔好話做藝人，喺任何行 業當中，一個將會好成功、大紅大紫嘅人，會覺得喺工作間中露出一條底褲係件可以令一個人取消工作嘅大事咩？

要向張栢芝學習

仲 記得好幾年前，張栢芝喺某個慈善表演當中，飛車失手，全身不能動彈。首先，佢真係有我話齋嘅「處變不驚」，出事之後雖然事後知道尾龍骨有裂痕，不過當時張 栢芝都仲即刻問工作人員：「拍得好唔好？我做得好唔好呀？」仲有，問完有關工作表現嘅問題，先至再問醫護人員：「我以後仲可唔可以生仔？」呢啲就係專業精 神，同埋「真」。其實，做緊任何行業工作嘅《金手指》fan屎，如果想上位，都一定要向張栢芝學習。

講番12．9「甩褲事件」，輿論一面倒批評當晚主持人曾志偉，批評原因係佢喺節目上要求重播甩褲片段。不過，孫柏文覺 得曾志偉嘅重播要求，就正正解釋點解佢可以成功做到我哋特區，數一數二嘅節目主持人。曾志偉成功係因佢可以成功掌握廣大觀眾嘅脈搏，試問嗰晚，有邊個觀眾 心底裏冇想睇重播嘅慾望？有邊個觀眾唔想甩褲片段，好似世界盃總決賽，施丹「頂你個肺」個片段一樣，不單止重播再重播，仲要多角度、慢鏡、遠鏡、近鏡重 播。最後仲要將戲劇性、張力推至頂峯，重播工作人員、各位主持、即場觀眾嘅反應。

記得邊個American Idol

孫柏文講 咗咁耐，係時候為大家提供一個最真honesty，同處變不驚toughness嘅例子。呢個例子就係香港出生，花旗國長大嘅William Hung孔慶翔。當年，佢憑一句：「I already gave my best, I have no regrets at all。」就即刻紅遍全世界。大家唔服嘅話，可以問自己一句，喺五屆嘅「美國偶像」American Idol當中，除咗孔慶翔之外，你又記得邊個？

-----------------

張栢芝 - My Idol! A brilliant mix of honesty, toughness, grace, talent and hardwork

3rd World Farmer Game - too easy to play

Ok, Greg 宋漢生 suggested this game for me to play.

It is called 3rd World Farmer game.

Well, I started playing the game. And found that it is piss easy to win, I credit this to the fact that I am Chinese. And there are only three values we really hold dear.

1. Health is critical 身體健康
2. Education, Education, Education 書中自有黃金屋
3. Productivity enhancement tools must be bought 錢生錢

The key to winning is to make sure you boost all three, and in the beginning rounds to abandon diversification and focus on hoping (praying?) that the one basket you put all your eggs into does not break. ie. Plant all peanuts, cotton, wheat or have only elephant, cow etc...

Ok, so what's the point? The point is that the white folks over in Europe think this game will make people think being a 3rd World Farmer is completely hopeless.

I say this... If they really want to make this game hard, have one more scenario (other than the ones such as Poachers, Civil War, corrupt officials) and that is developed nations embargoeing agricultural products. (chants of "Down Down WTO" by South Korean farmers still rings in my ear)

So the stuff grown/produced actually rots in the docks.

But what is most interesting in this game, is that when you become really rich and have everything and have all people healthy and educated, the most devastating thing that can happen to you is "National Bank Failure". Because there is nothing in the game you can do to avoid its impact.

Ha! exactly, proves my point that paper money backed by central banks are a total Scam. Therefore, the game should add an option "Buy Physical Silver"!!! With that option, you CAN avoid the impact of central bank failure.

Yumiko甩褲 vs 官恩娜被強吻 vs Jennifer Hawkins

講起查找不足，我不能不提周末甩褲嘅Yumiko，同埋早排被人「偷吻」 嘅官恩娜。佢哋兩個人一路都未能大紅大紫，原因其實好簡單。今時今日，觀眾最想見到藝人有最稀罕、最有價值嘅特質，就係要真honesty，同處變不驚 toughness。見到Yumiko喺事件發生之後第二日，喺電視螢幕上喊，仲話因甩褲所以取消工作，真係會令年輕人覺得佢又假又廢，咁樣點會紅？

試 問，如果當時Yumiko即刻展示燦爛笑容，用番幾年前fornari牛仔褲廣告裏面女主角咁着番條褲，仲要話再試跳，直至到成功為止，你估TVB唔會將 節目改名做「歡樂滿Yumiko」咩？幾年前，環球小姐冠軍，現今係地產代言人Jennifer Hawkins，都試過公眾場合甩褲，佢又點做？好有性格咁，向觀眾微笑(video)。

官恩娜仲弊，話被人「強吻」令佢精神崩潰。有幾崩潰？有線電視即場訪問佢嘅時候，仲記得用普通話做對答，喺被人嚴重非禮之後，仲記得謹守無線電視不明文「行規」（不准在本地電子傳媒上用廣東話），豈能唔覺得佢又假又廢呢，咁樣點會紅？

So Fake... So Sad... But for Yumiko... Nice ass! ho ho ho... = )

李超人 vs 股壇黑氣石孫柏文

今日，孫柏文首 先要多謝《利字當頭》一欄總舵主利世民兄，過去兩日「出山」寫咗兩篇關於宏觀貨幣政策嘅文章。小弟特別對世民兄點睇人民幣最為佩服，一句：「只要一天人民 幣不能自由兌換，就代表了人民銀行暗地裏明白，滙兌市場開放的結果將會是人民幣下跌。」就能道出自由浮動嘅人民幣應該會走的方向。

呢幾日，因為我知道自己罪孽深重，所以為求查找不足，決定閉門思過幾日。令我覺悟自己罪孽有幾深嘅，就係好多痛罵本人嘅網上討論區。孫柏文發覺原來我有一個超級大fan屎，網名叫kellygun，相信佢一定係出於一個恨鐵不成鋼嘅心態，喺全特區各大網上討論區發起多個「倒指」討論，討論標題仲要好有心思。

早排隔籬版《英之見》一欄總舵主，孫柏文非常敬仰嘅黃國英兄，曾經呼籲喜愛討論財經口水佬表現嘅網民：「網上輿論也極有影響力。其實網上批鬥，只會增加人家（財經口水佬）的無形壓力…最後可能只剩少數應聲蟲點綴。」仲有，黃國英兄仲話：「（口水佬）睇好睇錯根本無所謂，賭場黑氣石也有價值。」

而經過幾個月前，孫柏文建 議大家買熊證繼而輸清光嘅沉痛經驗之後，網民就開始叫小弟「黑氣石」Kryptonite。如果大家有留意花旗國漫畫，超人Superman嘅弱點，就係 一遇到「黑氣石」會超能盡失。無獨有偶，因為小弟喺兩個禮拜前曾經叫過大家「一注獨贏買和黃」，仲要話會升到100元一股，所以就引發好多「李超人遇上股 壇黑氣石孫柏文，和黃會唔會大跌呢？」之類嘅討論標題。和黃今日未大跌，黑氣石未靈驗，孫柏文亦希望唔靈驗。

官僚自願削權：異常驚訝

好多年以前，花旗國總統列根曾經講過：「呢個世界上，最有機會，一、永恒 不息，二、愈生愈大嘅，莫過於官僚體制bureaucracy。」列根總統對官僚體制嘅生命力有此評價，都係因為工作喺官僚體制裏面嘅官員，自古至今，都 只得一個目標，就係「保住個飯碗」。所以集結官員起來成為官僚體制嘅時候，官僚嘅生命力就會咁強大。我相信大家如果好似我一樣接受列根對官僚嘅評價，都會 認同我呢個解釋官僚生命力嘅方法。所以噚日，當我見到一段關於花旗國證監會Securities and Exchange Commission新聞嘅時候，我就覺得異常驚訝。

今 時今日，因為花旗國出現對上市公司管理層非常苛刻嘅Sarbanes Oxley法例，所以令到好多喺花旗國上市嘅外國公司，都想脫離花旗國證監會嘅監管。現行法例話如果一間喺花旗國上市嘅外國公司，就算成功申請除牌，不再 作公開交易，但只要有300名花旗國國籍嘅股東喺裏面，該公司都要繼續接受花旗國證監會監管。所以，令到有啲公司，出盡千方百計迫走花旗國國籍嘅股東。

例如，我哋特區人民非常熟悉嘅大東電報局，將公司憲章修改，話到明要所有持有少過十萬股嘅花旗國國籍股東，強制出售手上嘅股票。希望可以將花旗國國籍股東嘅數目減到少過300個。好多外國公司，將花旗國證券市場形容為北角嗰間「大酒店」──有入冇出。

不 過，呢段令我覺得驚訝嘅新聞就話，花旗國證監會作出讓步，外國公司脫離證監會監管嘅門檻會被降低。我第一個反應係如果門檻被降低，就會有大量嘅外國公司申 請除牌，繼而完全脫離花旗國證監會嘅監管，亦即係證監會自願地削權，令證監會嘅官員少咗嘢做。到時，如果有人問起：「點解有咁多人無所事事？」就會有好多 官員冇咗個飯碗。試問呢段新聞有冇令大家異常驚訝呢？

其實，孫柏文只得一個解釋，「保住個飯碗」只係花旗國證監會官員嘅第二目標，「搵個靚啲嘅飯碗」先至係第一目標。無他，因為各大花旗國投資銀行都希望Sarbanes Oxley壽終正寢，所以今次如果有大批外國公司離開花旗國，就可以更加能夠指出法例有幾唔好，就會有更大動力推翻Sarbanes Oxley。喺花旗國證監會返工嘅官員，可能好似我哋特區嘅官員一樣，「退休」嘅時候會重返私人公司工作，所以今時今日先至會作出令大家異常驚訝嘅「讓步」。