Friday, March 24, 2006

叫買白銀=有姿勢無實際?

嘩!孫柏文今次真係受寵若驚,近期小弟既名,係本欄隔籬左右,前前後後,曝光率奇高。有人話過,呢個世界係冇分正面宣傳,或者負面宣傳,所以見到人地講孫柏文,我就感受到一剎那既非理性亢奮。人氣急升原因,都係多得,3月6日小弟係本欄為大家用隻金手指篤既投資建議。嗰日,小弟編文,題為「一注獨贏買白銀」建議大家要強力買入實貨白銀,目標價為120美元一盎士,目標價有效年期為10年。當日,白銀現價為10美元一盎士。而當日,小弟又講過,每一次白銀創新高,我都會出呢邀功,每一次跌,我都會叫大家「趁低吸納」。

咁係上個禮拜五,見到白銀創22年新高,我就出咗呢幫我個隻金手指邀功。點知,觸動到蘋果財經版兩位高手,呢兩日出呢提點下我呢一個乳臭未乾既新進財經口水老(仔?)。首先係,我心目中德高望重既王冠一兄,係佢禮拜一「國際視野」欄,題為「有姿勢無實際、點贏?」一文,提出咗一啲令小弟有好多啟發既提點,所以,今日我會作一啲回應,以作報答提點之恩。第二就係隔籬利世民兄,佢我明天會回應。

而家,我試下總結冠一兄對小弟既提點。冠一兄最擔心既系,如果「盎斯銀價假如去到120美元,你估會是個甚麼世界?…世界末日囉!」。好彩,隻金手指,可以向冠一兄講一句:「I feel your pain,but don’t worry」。首先,我知道有人買黃金白銀,係用呢對沖「世界有末日」既風險。不過,小弟既目標價係排除咗「世界末日」既可能性。因為如果我既目標價,係以世界末日為出發點,我係唔會用美元作為目標價單位,而係會研究,究竟要用幾多盎士白銀,先至可以買到一張乘搭洛亞方舟既船飛囉。

第二,冠一兄又話過:「金價通常是銀價的50倍,如果10年銀價見120美元,那麼黃金豈不…?」冇錯,如果黃金價格飛升至6000美元一盎士,亦都真係會反映到世人普遍覺得「世界末日」即將降臨。不過,小弟可以同大家講,自羅馬帝國時代至十九世紀中,金價同銀價分別相差12至20倍,如果回到12倍差價,120美元一盎士白銀,亦只會等如1440美元一盎士黃金。同埋,小弟唔排除120美元一盎士白銀,唔係反映世人覺得「世界末日」即將降臨,只係反映世人覺得「美元/帝末日」即將降臨。
最後想澄清,小弟係一個不折不扣既樂觀者,如果我係一個覺得會有「世界末日」既悲觀者,我就唔可以每一次浦完吧之後,同自己講:「唔使驚,你下一次一定可以識到女仔。」所以,多謝冠一兄關心,不果唔使膽心!

No comments:

Post a Comment