避稅計中計 美稅局慘敗

噚日，孫柏文見到單花旗國新聞，想同大家分享。

事源2003年5月，有位 Robert Kahre仁兄，連同一共九個人，因涉嫌逃稅被捕。案情其實好簡單，Kahre係個僱主，佢出糧畀員工時，係畀啲19世紀花旗國政府嘅錢幣。

大家要記得，當年花旗國係採用「銀本位」（silver standard）。即係如果政府話一美元等於一盎斯白銀，你攞一美元紙幣畀政府，政府就會畀番一盎斯白銀你。花旗國政府自己當年都有出過面值一美元嘅一盎斯銀幣。

既然法定要認數

咁點解Kahre畀人拉？因為佢出糧時，如果你嘅薪金係「100美元」，佢會畀100個呢啲一盎斯銀幣你。大家作為白銀戰隊成員，都知道白銀賣緊13美元一盎斯，所以Kahre畀你嘅「100美元」，其實值1300美元。

呢個道理，花旗國稅局當然明白。而因Kahre一路報稅，都係用啲銀幣嘅面值，而唔係市場價值，所以稅局就拉佢逃稅。

到上個月中，花旗國聯邦法院陪審團，無法將佢哋入罪，稅局慘敗。 Kahre唔使坐監嘅原因，係因為花旗國政府從未將嗰啲銀幣作廢，到今時今日，仲係法定貨幣（legal tender）。根據兩個上世紀案例，話得係legal tender嘅錢幣、銀紙，政府就一定要尊重同接受貨幣嘅面值。

特區稅局贏梗你

咁我就喺度諗，如果壹傳媒出糧畀我係用美元，不過係19世紀嘅銀幣，咁咪可以避稅囉。因為正當花旗國政府都係用面值計嘅時候，特區政府冇理由夠膽話，嗰啲花旗國legal tender銀幣有其他價值計算方法。

為咗破解呢個疑團，我就搵律師攞意見，即係打電話畀我老竇。佢話：「又攪屎棍！寫埋啲咁複雜嘅嘢！」例牌鬧幾句之後就話，特區政府一定打官司，去到稅局稅務上訴委員會，納稅人一萬單都贏唔到一單。

講真，美稅局同Kahre嘅恩恩怨怨，根本毋須出現。因為，如果花旗國政府，當年唔係取消金或銀本位，濫發鈔票，引發通脹，製造紙幣狂魔，一美元仲買到一盎斯白銀，Kahre亦唔需要諗咁多屎橋去避稅。真係諷刺，Kahre變成黃金戰士，打敗花旗國稅局，力量來自紙幣狂魔！