銀行玩連舟 焗央行相救

當今世上，最有計劃經濟味道，常出現政府指導啲單位點做生意嘅行業，一定係最能代表「資本主義」嘅銀行業。特區都係咁，唔覺得諷刺咩？

大家都知道銀行係一個中間人，將存戶嘅錢，借畀有需要嘅人，從中賺取息差。情況有如麪包店買麪粉，跟住焗麪包賣。銀行只不過係另一門生意。不過政府唔會同麪包店話一定要保留8%嘅麪粉，作為後備，而銀行存戶嘅錢政府就會。

SIV走法律罅

當政府粗暴介入銀行運作，銀行嘅反應當然係細心研究政府啲規定，跟住搵「法律罅」去走。近年，啲國際銀行就發明咗一樣叫做SIV嘅嘢。

SIV係乜？就係銀行面對政府定下來嘅貸款上限，發明出嚟去繞過上限嘅工具。一間銀行收存戶錢，跟住放數，兩步都會喺銀行賬簿有紀錄。啲銀行知道政府官員會查賬簿，所以就將收存戶錢同放數嘅活動，畀咗由銀行成立、不過賬面上同銀行無關嘅SIV做。

大家可能會問：「存戶邊度會信呢啲SIV，存錢入去？」問得好！存戶信呢啲SIV，因為好多時候成立佢嘅銀行，會全面保證存戶嘅錢。

大家可能會再問：「咁同銀行自己做有乜分別？點解要畫蛇添足？」原因係銀行代SIV提供畀存戶嘅保證，賬簿冇紀錄，官員自然就唔使理。呢啲SIV就可以進行好多放數嘅活動，佢哋就借咗好多畀人做次按。孫柏文隻「愛股」滙豐都有個200億美元嘅SIV。

大家相信會話：「呢啲SIV咁危險，如果政府選擇介入銀行運作，應該快快手手禁止SIV嘅存在。」我同意，不過最弊花旗國政府居然想搞個叫做 SMLEC 嘅「超級SIV」。點超級法？呢個SIV唔會得一間銀行做保證，至少會有花旗、美銀、JP Morgan聯手保證，大玩鐵索連舟。聽聞仲想搵埋巴克萊同滙豐。

聯手保證攬住死

為乜搞個超級SIV？今時今日，好多問題債券冇買賣、成交。所以就搞個超級SIV去接貨。咁啲貨唔掂點算？擔保個超級SIV嘅銀行咪一齊出事囉。

咁危險點解啲銀行又想搞？

因為大家要記得，如果有人借100萬還唔到，就係嗰個人嘅問題；
如果有人借10億還唔到，就係銀行嘅問題；
如果有人借1000億還唔到，就係中央銀行嘅問題。

所以大家明白點解啲銀行要有咁大、搞咁大。全因想迫央行出手相救。