越搞托市 越未見底

今日，首先要出個更正啓事。大家都知道，花旗國財長Hank Paulson呢排忙緊搞個叫MLEC嘅「接收冇交易、冇市價債券」超級基金。基金現在喺集資階段，籌集用嚟買貨嘅錢。花旗、美銀、JP Morgan應承會參與。

上周末，意大利央行行長Mario Draghi話，Fidelity同債王Bill Gross管理嘅債券基金PIMCO都會搞埋一份。所以噚日孫柏文話Bill Gross有份。不過噚晚，PIMCO發聲明話「不會參與」。

等發掘自己市價

如果要我分析，意國央行行長應該唔係存心老點。只不過事態發展立立亂，所以先至流言滿天飛。呢個MLEC十畫都冇一撇，嗰一撇仲要係用鉛筆寫，分分鐘擦埋。

講真，呢個MLEC我上個禮拜已經鬧過，Bill Gross亦話係lame（廢）。噚日，批評「用MLEC救市」建議又多一個人。佢就係前聯儲局局長格林斯潘。佢話，呢個MLEC接收啲冇交易、冇市價嘅債券，只會拖慢 price discovery。

Price discovery係乜？就係一樣資產發掘自己嘅市價。例如，啲銀行手上有好多票面值100元嘅債券。因為冇人出價買，所以就冇交易、冇市價。格林斯潘想見到啲銀行掛牌放盤，100元冇人買，就試90、80、70餘此類推。如果要去到1元先有人肯買，就算數。起碼啲債券搵到市價。

100元跌到1元咪好大鑊？係。資不抵債嘅投資機構就會執笠，銀行需要大規模撇賬，股價一定大跌特跌。不過，市場就可以見底復活，因為有番透明度，所以財長越搞托市，債市越未見底。相信格林斯潘同Paulson講：「Hank，this plan is so hard plastic。」

煙草商人鬧醫生

不過，格林斯潘批評呢個建議，真係非常諷刺。財長搞MLEC，都係想醫番好因為信貸泡沫爆破，衍生出嚟嘅「債市停頓」問題。大家要問問自己，呢幾年信貸泡沫點嚟？咪就係格林斯潘嘅聯儲局，當年瘋狂減息，濫發鈔票而成。

格林斯潘話MLEC阻住債市復活，話債市停頓問題唔係咁醫。就好似一個前煙草商人，走去鬧一個醫生，話：「肺癌唔係咁醫o架！」成單嘢真係硬膠。