打死唔抽阿里巴巴

呢幾日，孫柏文重複又重複咁睇，封面用咗「盲眼橙色」嘅阿里巴巴（1688）招股書。係咁睇嘅原因，就係想領略到究竟做乜生意，可以上市時市盈率超過100倍。我簡直當咗本招股書為驚世秘笈。點知，睇咗四次都完全冇頭緒。簡直係太深、太難明，就連葵花寶典，就算未能完全掌握，都起碼會知欲練神功，必先自宮…唔通…馬主席，為咗100倍PE，實在太大犧牲啦！

講真，有邊個人搞公司，改名時可以連大盜都唔想做，嫌唔夠勁，以個打劫大盜嘅阿里巴巴命名？講多次，阿里巴巴真係100倍上市！俗語有云：「好佬怕爛佬，爛佬就怕潑婦。」今時今日，我哋呢班日日虎視眈眈，想打劫祖國散戶嘅特區大盜，一定要銘記：「散戶怕大盜，大盜就怕阿里巴巴！」100倍哦！

百蚊先買到1蚊利潤

好。入正題。今日，想同大家講點解我唔會抽阿里巴巴。每次有間公司上市進行招股活動，簡單啲嚟講，就係原先股東，想搵啲外邊人做拍檔一齊做生意。如果想入股，大家第一件事多數都會睇睇一股值幾多錢。阿里巴巴，就係間你要用超過100元先至買到1元利潤嘅人。即就算公司盈利完全派息，都係一厘息都冇。大家一定會話：「盈利增長強勁咪得囉！」啱。

再講，大家第二件事都會想知，點解公司股東想搵啲外邊人拍檔。有時，可能原先股東覺得生意已穩定，想追求刺激同更高回報，賣自己手上嘅舊股畀啲追求穩定回報嘅外邊人；又或者原先股東覺得生意其實可以大得多，所以發行新股畀啲追求刺激嘅外邊人，集資發大生意嚟搞。

如增長勁何解賣舊股

所以，就出現咗Alibaba's Paradox。如果阿里巴巴未來增長唔勁，又何德何能市盈率超過100倍上市？不過如果未來增長咁勁，又點解主要賣舊股？未解決呢個Paradox之前，又會有幾多機構投資者上市日接散戶貨？

有啲人話：「思捷（330）邢先生夠賣舊股，咪一樣升！」咁我又要反問：「究竟有幾多人，好似邢生或愛德華八世咁？不愛江山，愛美人。」記得為100倍，馬主席犧牲咗。

最後，我知道會有好多已借爆孖展抽阿里巴巴嘅人，用文字喺網上打我。不過就算打死，都唔抽阿里巴巴！