dot com惡習 按債還魂

孫柏文記得當年dot com時代，其中一個將泡沫谷大嘅「元兇」，就係一樣叫做vendor financing嘅嘢。Vendor financing就係賣電腦器材嘅公司，同想買器材嘅dot com講：「你今日已經可以攞走啲器材，不過錢就唔使今日畀。當我借住錢畀你先。」因為是賣方提供借貸，所以就叫做Vendor financing。

大家可能會問：「咁點解可以將泡沫谷大？」理由係，一間公司賣嘅器材可能好廢，不過因為提供有利條件，所以成功「賣」出。雖然錢未到手，不過賣方已可入賬，喺公布業績時話賺咗錢。當間間公司都用呢個方法推高生意額同「盈利」，就製造咗一片歌舞昇平嘅氣氛。

大家應該會再問：「如果dot com買方執笠點算？」問得好！當年dot com龍頭──思科Cisco，就係面對一批批攞咗佢哋啲器材嘅dot com執笠，所以進行大幅撇賬。撇到Cisco自己都話係一場百年難得一遇嘅水災，7年之後嘅今日，股價仲係潛水。

不過，未爆煲之前，每季出業績，都會被人稱為英雄中之英雄。

重施故技造靚盤數

今時今日，嗰啲投資銀行，居然重施故技。手上嘅按揭、企業債券可能好廢，不過因為佢哋想造好盤數，所以就同啲專買「財務橫屍」嘅禿鷹基金vulture fund講：「你今日已經可以攞走啲債券，不過錢就唔使今日畀。當我借住錢畀你先。」成功「賣」出之後，賬面上，啲債券價格繼續下跌，已經唔關啲投資銀行事。

到出季度業績時，就會因「解決」咗問題，被人稱為英雄中之英雄。不過，我一定要警告大家，如果有機會見到啲投資銀行家，千祈、千祈唔好問：「如果啲禿鷹基金執笠點算？」因為佢哋一定會話：「如果？如果？咁多如果？今日我公司嘅股價升咗呀！升咗呀！見唔見到呀？升咗呀！」