對抗胡亂執法的方法

2006年，世界盃決賽，法國對意大利。加時階段，法國隊隊長施丹，頭槌頂落意大利馬達拉斯嘅心口。雖然，睇番以法文做旁述嘅YouTube短片，聽到旁述員重複又重複咁喊着話：「Mais pourquoi？」真係啓發到寫作題材。

不過，當時我好天真咁諗，一個頭槌又可以有幾多個寫作角度？點知，之後嘅十日，陶傑先生寫咗六篇，從不同角度談論施丹頭槌嘅文章。現在，孫柏文睇番嗰六篇文，都仲會不斷發出「係喎！」聲。同時敬佩陶傑先生嗰種將題材發揮得淋漓盡致嘅能力。一個頭槌，六篇文。

尊重司法制度

到今時今日，問大家有乜嘢話題同當年嘅施丹頭槌一樣，個個知發生咗，不過唔會令戰爭爆發、股市升跌？冇錯，就係「明星生活照」事件。

翻查紀錄，原來呢篇已經係我第五篇講呢件事嘅文。真係希望有一日，能達到我嘅終身目標，能夠有陶傑先生一成嘅功力。

入正題。今次「生活照」事件，其中一個令民憤飆升嘅原因，就係因為警方嘅執法態度。我哋香港人，其實骨子裏非常尊重司法制度，而對任何用手段進行私刑，都會走出嚟抗議。

例如，一個人被警方拘捕，律政司決定控訴，之後被法庭裁定有罪，所以需要坐監，香港人絕對覺得天公地道。不過當警方同律政司，令一個人未被裁定有罪，一個橫睇掂睇都唔似會棄保潛逃，一個好難信會即時威脅社會安全嘅人坐監，我哋就會非常鄙視執法機關。

權宜計失民心

我明白警方為求達到殺一儆百嘅效果，用權宜之計。特別因為以前用同一手段，攻擊啲例如玩黑色幽默「話會炸廸廸尼」嘅人非常有效，所以今次照辦煮碗。不過有如當年拿破崙嘅軍隊一樣，有時會走得太遠，去到莫斯科之後，要夾着尾巴撤退。最後誠信破產，威嚴完全崩潰，市民唔再覺得可以倚靠佢哋。

當然，如今次可以揭警方手段，全賴傳媒、網民嘅齊心協力。不過一旦冇人理，執法機關就會繼續繞過司法制度打壓市民。聽日，就提供一個例子。