我來點醒高盛CFO

首先，孫柏文想同大家拜年，祝大家今年金銀滿屋。因為啲國際銀行、金融機構喺鼠年都會繼續「有壓力」，所以買實貨金銀擺屋企，都係有根有據。

上個禮拜嘅春節假期，亦係滙豐（005）因次按發出該公司歷史以來第一次盈警嘅一周年紀念。咁就一年。相信就算可以用個腦預測到有咁多風風雨雨，都冇可能令個心安然接受。

去馬場驚買錯馬

事態發展至今，債市嘅心臟病仲未醫番好。唔好話價差，就連成交都冇乜。可能因為咁，上個禮拜四投行高盛嘅財務總監David Viniar就出嚟，公開哀求搵人幫佢指點迷津。

Viniar話，債券價格現在預測緊「worst recession最差嘅經濟衰退」。唔係「好差」，係「最差」。佢仲話：「Total disconnect between the equities market and the credit market股價同債價反映嘅未來背道而馳。」

我見到Viniar總監咁可憐，唔明點解股價雖然差勁，不過債價仲衰，所以今日就點醒吓佢。有如隔籬《國際視野》嘅王冠一兄成日搞笑咁話，每一個資產市場，就有如一個賭場、投注站。呢排股市面對嘅壓力，就係因為啲賭仔擔心盈利下跌。即係去馬場驚買錯馬。

買莊閒都賠三倍

如果用「百家樂」來比喻債市，今時今日債券嘅回報率，就係買「莊」或「閒」都有三倍。

大家可能會話：「兩邊都賠三倍？咁咪好着數？唔落注咪唔理性？」大家以上嘅問題，就係困擾Viniar嘅問題。

啲人唔玩「債市百家樂」，係因為唔知道買中有冇得賠。唔係驚賭場執笠，就係驚啲啤牌有事。甚至驚等收錢時啲差佬冚檔（希拉莉講過，希望見到持有次按債權嘅人，就算對方停供，都唔可以收番啲屋）。

所以淨係睇債價，跟住就話債市預測緊啲乜乜物物，根本上仲係生活喺爆發金融風暴前嘅「正常」世界。Viniar叔叔，希望你睇完呢篇文之後，可以同現實接軌。