多謝渣打 債市快蘇醒

今時今日，大家都知世界出現金融危機。相信好多人都問：「究竟啲監管機構以前係咪白糧、瞓晒覺？」我只可以話，佢哋當時冇瞓覺，有履行監管銀行體制嘅責任。其實大家要問嘅，係點解今日唔履行該責任。

例如，監管機構一向以來都有規定啲銀行，收到每100元存款，可以放幾多債。又會規定可以放邊種債，同點放。而啲銀行本身呢幾年嚟都聽聽話話。

擬似銀行系統

大家可能會問：「如果有監管，規定有道理，銀行又聽話，咁點解又會爆發金融危機？」因為呢幾年，啲銀行就創造咗個「擬似銀行系統」。

呢個「擬似銀行系統」理論上同「受監管銀行系統」冇風險關係。不過，就係呢個「擬似銀行系統」出事，而忽然牽連到「受監管銀行系統」，所以先咁大鑊。

例如，銀行為繞過之前講過關於收存款同放債嘅規定，就走出去搞間獨立公司。首先，搵人夾錢做股東，跟住間獨立公司就瘋狂出短期債券，向市場有咁多借咁多。

有錢喺手，間獨立公司就買啲利息收入比自己融資成本高嘅長期債券。最後間獨立公司因發短期債券借錢，所以要不斷還錢。不過只要不斷借到新錢，成本又低過利息收入，間獨立公司就印銀紙。銀行賺乜？分紅、管理費囉。

置死地而後生

如果市場突然唔信間獨立公司手上長期債券嘅價值，間獨立公司借唔到新錢，不過舊債又到期，點算？間獨立公司拍賣手上資產，盡量還錢畀啲債權人。理論上，唔關銀行事。就係因為理論上唔關銀行事，所以監管機構冇得監管。

呢啲銀行搞嘅「獨立公司」，就係大家熟悉嘅SIV。問題就係點解啲監管機構，今時今日容許好多SIV資產同負債，被放入啲銀行。監管機構係咪瞓晒覺？

相信大家都知道點解啲監管機構容許呢個情況出現，就係好多SIV買咗嘅長期債券唔值錢，不過如果全世界都要將自己手上債券以真正價值入賬，大家就會一齊死，因為大家都資不抵債。

不過，如果冇真正市價，那裏會有成交？債市因此心臟病發，完全停頓。

所以今日孫柏文一定要多謝渣打銀行，早幾日決定跟隨規定唔救佢哋個SIV。個SIV就需要清盤，資產出賣，甚至公開拍賣。到時就算非常賤價，起碼有價。債市就可以像火鳳凰般，置諸死地而後生。