測盈餘錯晒 測醫費啱晒？

好多人批評特區政府，面對一大批市民有逼切需要時，往往會做事慢、冇反應。孫柏文相信，噚日財政司司長曾俊華份財政預算案，就算不能完全改變呢個感覺，起碼證明對某啲訴求，政府反應都可以好快。

數碼鴻溝出現

試問，對上幾個禮拜，特區最大單新聞係乜？冇錯，就係陳冠希先生嘅「生活照」事件。喺呢件事中，大家有冇發現特區市民已經被分化成兩種人，第一種人睇到相，第二種人睇唔到。呢個分別，源自有啲人識上網，有啲人唔識。識上網同唔識上網，就係叫做「數碼鴻溝」（Digital Divide）。

有見及此，曾司長就宣佈喺各區成立「數碼中心」，亦即平民百姓稱為嘅「網bar」。曾司長明白上網其實都幾複雜，新手上路，需要教導。而今時今日都未識上網嘅人，好多都係啲叔叔伯伯，所以曾司長就會喺天水圍徵募啲結構性雙失少女，成為「上網輔導員」。

雙失少女教上網

亦因政府一路以嚟都希望社會和諧，開開心心，而呢啲官立網bar亦能幫助達到呢個目標。所以政府將網bar改名為「溫馨網bar」或「快活網bar」。到時候，啲叔叔伯伯就可以喺「上網輔導員」嘅指導之下，向佢哋啲朋友發放陳冠希嘅「生活照」。政府反應仲唔快？

仲有，曾司長話攞油麻地戲院嚟搞音樂。原先聽得唔清楚，搞到我好開心。我仲估政府撥亂反正，停止打壓fing頭文化，攞油麻地戲院改建成的士高，為促進音樂文化，補貼DJ捽碟，聽真啲先知原來搞粵劇。

不過認真而言。我最不滿今次財政預算案嘅地方，就係曾司長又想將強迫金伸延，又想搞強醫金。曾司長大大聲話2033年會點會點，實牙實齒預見25年後嘅未來。大佬呀！今年財政盈餘都估錯晒，25年後你又估得啱？唔好玩啦。

就算你覺得每年政府估盈餘會特登錯，不能作準，咁我又問你，有邊個喺1983年做嘅政府預測係啱嘅？多我都唔講，如果1983年對人口變化走勢嘅預測係啱，今時今日都唔會有咁多發電capacity啦！大家一定要繼續齊心反對強醫金！