李國寶 = 鍾亦天

噚日，孫柏文講過特區執法機關對付「生活照」事件嘅手法。求求其其捉幾個「鍾亦天」，未判監就要坐，就係一個最典型執法機關想繞過司法制度，夾硬進行私刑，對付佢哋眼中釘嘅手法。行私刑後，就可以走出嚟話自己有幾咁勁，做咗嘢。最弊，呢個現象除特區外，全世界都見得到。今日，就為大家提供個外國例子。

2001年，一間叫做Imclone研究抗癌藥物嘅公司，收到花旗國食物及藥物管理局通知，佢哋嗰隻旗艦研究藥Erbitux，需要延遲推出市場。管理局出決定之後嗰日，記得連《華爾街日報》嘅社論都大肆批評管理局「害死」啲需要呢隻藥嘅病人。Imclone嘅股價當然應聲下挫。

點知，當時身家有十億美元，教人煮餸嘅Martha Stewart，就喺管理局宣佈決定之前幾日，賣咗手頭上Imclone嘅股票。億萬富豪Martha蝕少幾多？四萬幾蚊。

跟住點？大家要知道，花旗國人民耐不耐就會瀰漫着一種憎人富貴厭人貧嘅怨氣。同金融業有關嘅執法機關，就爆發「暴徒審判式」嘅執法手段，夾硬嚟，用盡一切方法，都要搵人祭旗。

曾幾何時，Martha同Imclone嘅總裁拍過拖。所以就用以上嘅表面證據，話Martha涉嫌進行「內幕交易」。Martha喺花旗國出咗名硬淨，唔鍾意俾人屈，所以就決定唔妥協。

執法機關一路都搵唔到「內幕交易」證據，最後夾硬屈Martha犯咗幾條「阻擾調查程序」嘅法例。Martha最後都要坐監。至於「內幕交易」？就當冇發生過。不過Martha就變成人辦。就算冇犯法，不過你唔投降，唔肯俾佢任屈，都要死。手法唔似特區啲差佬咩？

就係因我記得Martha Stewart單嘢。我第一次聽到，李國寶被花旗國執法機關話涉嫌「內幕交易」，我已為李國寶擔心。佢哋根本就係暴徒，仲要好毒。最好就係迫你投降，跟住要你封嘴，佢就出一份鍾意寫乜就乜，「伊拉克有大殺傷力武器」式嘅調查報告。最緊要繞過司法制度，達到「做咗嘢」嘅政治目的，用輿論行私刑。

原先，特區人民知道因為根本沒有審過，疑點歸於李國寶。點知David Webb揸住未經法庭審過嘅調查報告，就當係聖經。David Webb真係要三思不同地方有不同執法標準。