家族風雨 阿哥下台

禮拜五，燈謎日。估一個家族。呢個禮拜，各大報章大篇幅報道關於一個有權有勢家族裏嘅風風雨雨。表面上，個家族只係宣佈，做咗領導人好耐嘅阿哥會退下火線；個家族管理嘅單位，由弟弟接管。其實，自從90年代初，單位失去咗「終極方向提供者」之後，外面已經傳咗好耐，兄弟之間對於個單位未來應該走乜嘢路，有分歧。不過最後「阿哥揸fit」嘅情況，要捱到2008年先至完結。

唔講郭家講古巴

大家如果估個謎底係某間本地大藍籌地產發展商，姓郭家族，咁你哋就估錯。孫柏文其實講緊古巴嘅卡斯特羅家族。由1959年起，自從共產黨叛軍成功推翻當時古巴政府之後，卡斯特羅都係該國嘅領導人。而附近嘅花旗國政府，就卡斯特羅上台不久之後，差唔多立刻實施經濟制裁。花旗國制裁，不過就有蘇聯嘅支持，卡斯特羅就繼續佢嘅烏托邦實驗。不過90年代初，蘇聯瓦解之後，古巴冇咗平價能源，經濟面對巨大危機。卡斯特羅最後迫於無奈，要聽佢細佬建議，小量採納有中國特色嘅社會主義。花旗國政府亦覺得到咗呢個時勢，經濟制裁應該見效，卡斯特羅投降。點知，搞搞吓佢老人家又唔開心，停止再走中國特色社會主義之路。不過卡斯特羅都仲安坐總統府。經濟制裁實施快近半個世紀，卡斯特羅居然可以 outlast十個花旗國總統。嗌幾多次Cuba Libre，經濟制裁都係唔掂。當年，花旗國甘迺廸總統實施經濟制裁有段小插曲，亦能反映當年佢嘅心態。原來，官員一早已準備好實施經濟制裁嘅文件。萬事俱備，只欠總統簽名。國家大事，如果覺得要做就應該即刻做。

經濟制裁得啖笑

不過當年甘迺廸就等咗一晚時間。大家不要以為甘迺廸進行最後斡旋。其實，甘迺廸鍾意食雪茄，最喜愛食H. Upmann 牌Petit Corona型號。佢等咗一晚時間先簽嘅原因，就係因為叫咗佢嘅助手Pierre Salinger一晚之內買晒華盛頓市中嘅嗰隻雪茄。買到1000口就簽。第二朝，Salinger畀咗1200口雪茄甘迺廸。甘迺廸收咗後就簽紙。經濟制裁實施，亦變成歷史。