「生活照」揭網上樽頸位

今日，孫柏文首先想問，大家有冇集齊啲「明星生活照」？如果有，我想問大家係點樣集齊啲相？從收到第一幅相，到最後嘅幾百幅照片集，收相嘅渠道有冇變？有變，又點解變？

其實，從「生活照」事件第一日爆發。照片嘅傳播方式，不斷在變。首先，事件爆發嘅第一、二日，相得兩張，檔案大小只有幾百kilo，網上討論區就係最有效率嘅傳播途徑。

終極方法燒落光碟

到事件爆發嘅第五日，有十幾張相，檔案大小有幾個mega byte，已經冇乜人去網上討論區傳播照片。

原因當然唔係因啲差佬有效率，而係因太多人瀏覽，所以辦討論區網站嘅server頂唔順，啲人去到個討論區都 load唔到嘢。所以電郵就成為傳播照片嘅主要渠道，亦同時促進港人之間嘅友誼。

事件進展到第二個禮拜，忽然喺兩日之內，有如黃河決堤般，有幾百幅相出現。檔案已大到好多電郵服務收唔到，或者拒收。取而代之就係啲人對人（MSN），點對點（Foxy）嘅軟件。又或者用最終極嘅方法，鬼佬稱之為「sneakernet波鞋網」。即係將啲相燒落隻光碟，跟住着波鞋落街攞畀個朋友。

大家見到，正當要傳遞嘅檔案越來越大，就會不停遇到網上嘅樽頸位。不過問題係每個繞過樽頸位嘅方法，要越來越多嘅科技知識。原先只要識上網就得，之後就要有一個稱職嘅電郵服務。最後就係要識用啲特別軟件。

推動科技最佳環境

雖然，喺呢個情況之下，應該係推動唔識嘅人，學用科技嘅最理想環境。不過一個理性嘅用戶，應該信啲相唔會源源不絕，最終唔學用。

最後，點解唔係上面尹思哲兄寫呢個題材？因為我問過佢，集齊啲相未？佢不單止未有，仲好似漠不關心。試問，唔係想集齊，唔係想即時有最新嘅相，又點會遇到樽頸位？遇唔到樽頸位，又點會寫到呢個題材？