重申一注獨贏買白銀

舊年，孫柏文作為一個財經口水佬，有時感受到一份深層次嘅孤獨感。7月尾叫大家沽滙豐，定112.5元目標價。除咗我非常尊敬嘅王冠一兄之外（多謝冠一兄！）不但冇人附和，仲要上電視台畀青姐胡孟青用雞毛掃打屎忽。

再講，我一向自稱為「白銀戰隊隊長」。對於招攬新隊員嘅難度嚟講，舊年我諗除咗美軍之外，就到「白銀戰隊」。就算到8月開始爆發國際信貸危機，白銀同其他例如股票嘅資產一樣，價格受壓，冇乜支持。

沽滙豐獲認同

唯一有好多人信嘅建議，就係我叫大家買中油香港（135）。不過，呢隻由建議日嘅6元一股，就好唔順利咁跌至噚日收市嘅3.84元。

不過今年嘅第一個月，我嘅預測能力好似有啲轉機。雖然中油香港仲係令大家同埋自己非常失望，不過滙豐跌同白銀升嘅預測，就越來越多人認同。

「一注獨沽滙豐」差不多到目標價時都講過，我由全香港睇滙豐睇得最淡嗰個，已變成一個溫和派。理由唔係我改變睇法或目標價，原因係因為其他財經口水佬比我睇仲淡，啲目標價越出越低，相比之下我就變成個溫和派。

美元跌金銀升

最後，今時今日我已經毋須要積極招攬「白銀戰隊新隊員」。孫柏文去到任何地方，都有人想入伍對抗「紙幣狂魔」。呢一刻，花旗國面對4%通脹，利息就三厘，負利率仲加埋世人對銀行體制出現信心危機，白銀跟黃金就變成資產避難所。

以前出於貪念買金銀嘅日子，已經正式畫上句號。上世紀80年代，金銀最後爆升嘅動力，係來自世人對美元信心開始崩潰，來自恐懼。大家已經開始見到呢個現象，所以08年至今，金銀走勢比股票強。



所以，重申一注獨贏買白銀。

建議有效限期：2016年3月6日 目標價：120美元一盎斯。