花旗國銀行的「冇事」煙幕

呢幾日，股市好似平穩好多。起碼比上個禮拜刺激大減。如果大家仲記得3月中花旗國傳出Bear Stearns（貝爾斯登）唔掂，仲因為會火燒連環船，迫到聯儲局喺花旗國上個禮拜一開市前，搞掂Bear Stearns嘅負債。

最後方案，就係摩根大通接管咗Bear Stearns嘅營運。聯儲局就出290億美元接管Bear Stearns嘅負債。

之後，大家都估再有邊間投資銀行會出事。而負債情況最似Bear Stearns嘅投資銀行，就係雷曼兄弟 Lehman Brothers，所以啲人就估佢係下一個。

點知，雷曼兄弟就喺禮拜二宣佈業績，居然上季度賺4億幾美元！全球股市嘅跌勢亦暫時停止。

雷曼兄弟咁叻嘅原因，好多都覺得因為市況轉穩。如果你咁都信，咁你就俾花旗國銀行嘅會計制度呃晒。

舊年，孫柏文曾經解釋過一種叫做negative amortization嘅銀行「收入」，起碼會計上當係「收入」。

上個禮拜，金管局總裁任志剛話銀行放債啲人唔可以淨係還息唔還本。大家都知道，還息唔還本，即係供款幾年之後，本金冇變。以前花旗國啲銀行仲利害，啲人做按揭首幾年連息都唔使還晒，即係供款幾年之後，本金會增大。

Neg-am「收入」，就係本金增大咗嘅部份。借錢嗰日，本金10萬，之後增大到11萬，嗰1萬嘅分別就係Neg-am「收入」。不但係充滿「水份」嘅收入，仲要如果出現斷供潮，以後盈利打擊仲大。舊年年中未出事時，已有好多銀行一旦扣除Neg-am「收入」，就會出現虧損。

債價跌負債減收入增

原來，又有一種更離譜嘅銀行「收入」。

大家都知道，喺新嘅會計制度之下，資產估值如有市價就跟市價計。

原來負債都係一樣，投資銀行發債券借錢，啲債券有市價。一旦市場覺得啲投資銀行風險高咗，啲債券價格就會下跌。

啲債券價格下跌，原來喺會計制度上，令負債下跌。負債跌咗嘅部份，就可以當係「收入」！就係因雷曼兄弟發嘅債，因市場對佢嘅信心大跌，所以價格下跌。因而令雷曼兄弟從呢個途徑錄得6億美元嘅「收入」。

大家要記得，佢哋只係賺咗4億幾。好彩，市場對雷曼兄弟長遠還款能力冇信心！越冇信心越賺錢！