聯儲局次按債券當金勞

曾幾何時，即07年7月，Bear Stearns嗰兩個炒賣次按債券嘅基金爆煲時，孫柏文喺度諗，如果我係聯儲局，又想保護嗰啲資不抵債嘅銀行，最終可以點做。

簡單嘅答案，其實由《金手指》創欄嗰日已講過。就係聯儲局化身成為紙幣狂魔，跟住走去啓動印刷機，濫發鈔票。亦因以上嘅理由，我重複又重複叫大家購買實貨白銀。

不過由信貸危機嘅開始，啲銀行逐個逐個宣佈有問題嘅資產，到銀行有倒閉危機。聯儲局如果濫發鈔票，又點樣可以幫啲銀行呢？究竟個步驟係點？同埋有乜嘢先至會觸發聯儲局行呢步？

資不抵債減息難救

喺呢場信貸風暴之前十幾年，差唔多每一次有金融危機，聯儲局只有一招－－減息。

最多學98年，對冲基金LTCM爆煲嗰次咁，舉辦一次武林會議，淨係出間房同三文治，叫啲銀行家坐低「搞掂佢」。即係呢場風暴前，除咗減息，聯儲局救市方法，同孫媽媽搞場雀局差唔多。

不過，之前十幾年嘅花旗國金融危機，根本就唔係啲金融機構資不抵債。出事單位往往資產能抵銷債務。出事原因只係周轉不靈，不斷借短錢去買啲要揸好耐，或者流通量唔大嘅嘢。一旦短期內借唔到新錢，還唔到舊債，資產又賣唔出，就會出事。不過，只要還款期增長，資產慢慢賣出，就會解決問題。

最弊，今時今日就算畀再長嘅還款期，金融機構都唔掂。因為佢哋資不抵債。如果資產根本少過負債，就算減息，筆債嘅利息少咗，都唔等於可以還債。到咗呢個地步，如果要救佢哋就只有三個辦法。

聯儲局變成當舖

第一，就係將貨幣貶值，令債務同時貶值，令資產跟隨不受控嘅通脹升值。不過，呢個方法可能唔夠快。

第二，就係當啲有問題資產，會計上暫時消失。到他朝有盈利之後，先至慢慢處理。不過，今時今日呢個消息靈通嘅世界，冇可能學80年代初咁，當啲問題資產暫時消失。任何一個採納呢個政策嘅金融機構，都會面對即時擠提潮。

第三，就係將聯儲局變成「當舖」。金融機構攞啲問題資產嚟，就借錢畀佢。之後，金融機構唔贖啲資產，當舖「沒收」資產。當然，呢個方案要聯儲局濫發鈔票，貨幣貶值，一貶就work。

不過，話將聯儲局變成「當舖」，絕對唔公平。絕對對啲當舖唔公平。因為當舖唔會收假金勞當真金勞。