「一注獨贏」何處來

今日係《金手指》每日專欄面世兩周年紀念，孫柏文想多謝各位fan屎呢兩年嚟嘅支持。呢兩年真係發生咗好多風風雨雨。當然，參與投機買賣嘅各位，自問有邊「兩年」，股市唔係充滿風風雨雨？

兩年多前，當我知道《金手指》將會每日出街時，我就搵咗以前股票行嘅同事食晏晝。希望可以攞佢哋嘅意見。當時，就有一位現在已失散咗、無法聯絡得到嘅前輩，一齊食飯。佢當時係股票行裏面，資產管理部嘅首席基金經理，佢個名叫做Billy Ho。

通脹下保護自己

由好多年前，我喺股票行開始做嘢嘅一刻，Billy同我已經志同道合。原因係佢同我都深深相信，當時剛展開嘅原材料大升浪，一定會升到冇人信。除咗因印度同祖國等新興國家會令需求飛升之外，仲因我同佢都信，當時仲膨脹緊嘅花旗國樓市，一旦爆煲，就會引嚟中央銀行瘋狂濫發鈔票。鈔票一旦濫發，原材料價格通脹就會一發不可收拾。

仲記得當年我喺股票行做石油股分析員時，佢耐不耐就會走過嚟股票部，同我笑話我將中石油（857）、中石化（386）、中海油（883）等嘅股票目標價，定得太低。不過，真係令我哋產生絕對共鳴嘅原材料，就係白銀。

食晏晝當日，Billy同我講：「你家將會成為一個財經評論員。做你嗰行，每個會令人記得嘅評論員，都會有個代表佢嘅長線投資建議。」

佢都未講完，我已經話：「白銀。」

佢一聽到我咁講，就話：「你e家有個平台，好好把握呢個機會，教啲讀者點樣喺高通脹環境之下保護自己。」

就係咁，我就開始寫將會喺2006年3月6日出街嘅嗰篇文。文中話到明，對白銀作為長線投資建議，充滿無限信心。

我仲話：「每一次升，我都會出來邀功，每一次跌，我都會叫你趁低吸納。」亦提供每盎斯120美元嘅目標價。有效期十年。當日銀價？10美元一盎斯。

冇信心就買位置

篇文寫完之後有個小問題，就係唔知起乜嘢題，所以我就走去請教李兆富。佢睇完篇文後話：「你都好信白銀。」我話係。我又問佢起乜嘢題先可誇張地表達呢份信心。佢話：「以前同你入馬場，你話過冇信心就買啲位置，有信心一注獨贏就得。哈、哈！」

嗰篇文最後起乜嘢題？咪就係「一注獨贏買白銀」。番鬼佬話齋，the rest is history。

最後，我承諾會繼續努力，做到最好，就算幫唔到大家賺錢，都希望可以為大家提供一啲娛樂。再一次，多謝大家！