任志剛延誤拯救負資產？

舊年之前，孫柏文聽過好多花旗國樓宇按揭嘅故事。聽過好多「乜話？佢都做到按揭買樓？」嘅故事。其中一個最離譜嘅例子，喺06年發生。聽聞，當時有個年薪1.2萬美元、摘生果維生嘅農工。佢零首期，成功借到錢，買到間70萬美元嘅屋。

大家可能會問：「月薪1000美元，可以零首期借五百幾萬港紙買樓？」冇錯，當時嘅信貸泡沫就係咁瘋狂。

雙失青年入市救市

大家可能記得，我曾經講過一種按揭，叫做NINJA按揭。即係解釋為借款人no income（冇收入）、no job（冇工做）、no asset（冇資產）。

咁嘅人，我哋特區曾經都有好多，我當年都係一個。不過我哋就冇叫呢類人NINJA，特區叫法就係「雙失青年」。

大家要知道，以前最多「雙失青年」嘅年代，亦係樓市最悲慘嘅時候。政府當年推出多項政策，希望推高樓市，不過都係失敗。我喺到諗，我「雙失」嘅年代，亦係花旗國信貸泡沫嘅膨脹期。點解我當時都係NINJA，但唔可以零首期買樓？

大家諗吓，如果當年啲「雙失」個個借到錢買樓，當年啲負資產就可以甩難。引進花旗國式嘅放債方法，唔係終極推高樓市嘅方法？點解啲薪高糧準嘅特區高官，冇行呢個政策？仲唔係失職？

利用外資穩定銀行

大家可能會話：「信貸泡沫嘅後遺症，就係銀行體制出現動盪。金管局總裁任志剛就係因為呢個理由，先至唔批准咁嘅放債方法。」

我話冇可能。任志剛咁醒，一定知道咁嘅放債方法，同佢嘅政策目標非常脗合。

大家要記得，任志剛想見到非常穩健嘅本地銀行體制。當花旗國嘅放債公司聯同啲投資銀行，為本港「雙失青年」向全世界撲水，本地銀行仲唔穩健？

因為可以借錢畀NINJA買樓嘅資金來源，一定係非理性。到時候收嘅利息，本地銀行根本冇可能競爭。所以本地銀行惟有撤出按揭市場，到時樓價大跌，本地銀行冇事。死，都係死啲外國資金。

最弊就係信貸泡沫已爆破。外國投資者已經冇機會經「雙失青年」、投資銀行將財富轉移畀我哋特區負資產業主。真係可惜。真係希望當年唔係任志剛阻住佢哋啲錢嚟，延誤拯救啲負資產業主。