考評局應多啲睇《金手指》

呢排係學生哥嘅考試期。對於好多不能逃離香港教育制度嘅中五學生，佢哋就會第一次面對一場影響終生嘅考驗。正當呢場考試影響深遠，出試題時，就要做到能夠服眾考生。

繼05年考評局用咗我哋《蘋果日報》董橋社長，一篇題為「中年是下午茶」文章，裏面嘅一句「攪一杯往事，切一塊鄉愁，榨幾滴希望」，去考啲學生引嚟不滿之後（考生嫌太深）。最近考評局又因為一條試題出事。

喺啱啱考咗嘅綜合能力試卷，裏面就要啲考生分析啲年輕人潮流用語。試卷就列出咗十個呢啲潮語。

孫柏文第一眼睇呢十個潮語，已覺得有問題。因為話到明係當今潮流用語，居然連「硬膠」都冇份。

再睇，試卷除咗列出啲潮語之外，仲講晒啲潮語嘅定義，但就係喺呢到出咗事。今日特別想講試卷中講過嘅「屈機」。

潮語「屈機」定義出事

考評局話「屈機」嘅定義係：「『屈』指屈服，『機』是電子遊戲機。『屈機』指玩遊戲者因無力取勝而屈服。」作為fan屎嘅你，睇開《金手指》都知考評局嘅定義係錯、錯、錯。

如果你嘅前途，係因為呢張答錯加分、答啱肥佬嘅出錯試卷而變成崛頭路。你只可以怨你父母唔係考評局高官，因為如果佢哋係考評局高官，你根本毋須考會考。因為你已經一早逃離香港教育制度，唔係喺外國留學，就係喺國際學校讀書。

我以前都講過，「屈機」嘅定義係：「一個人發現機制嘅漏洞，重複又重複進行同一個行動去攞着數。」

「屈機」嘅起源應該係來自電視遊戲機。當玩家發現遊戲中有漏洞，就可以重複咁做一個動作去贏。90年代初，就有《快打旋風 2》裏面嘅「軍佬Guile」角色，狂出「亞力箍」一招，成為「屈機」嘅第一代代表。

如果你問我「軍佬」今時今日撈緊乜。我估佢退役之後，應該轉行入投資銀行，做次按債券業務。

我以前都講過，因為啲投資銀行，發現啲債券評級機制嘅漏洞，重複又重複咁瘋狂出AAA次按債券。搵咗好多錢。亦用過「屈機」去形容呢個情況。

我知道點解考評局唔包括「硬膠」喺潮語之內。因為驚啲考生用嚟形容考評局本身。